1Thilsoh hijat nung hin Job akamkan apen nikho agaosap tai. ✡ 2Job in aseijin, 3“Kapen nikho le keima mihem a kahung kijil na jan chu chulmangin umhen, 4Hiche nikho chu muthim soh jeng hen, Chung Pathen a ding jengin jong mang helhen, chule khovah in salvah hih helhen. 5Hiche nikho chu muthim khojinin kitom mang jeng hen, meivomin khu jeng hen chule muthim chun kichat tijat sah hen. 6Hiche jan chu nikho kisimna a konin kichop mang jeng hen, kum sunga nikho kisimna a avellin kisimtha kit tahih hel hen, lha kisimna holah a jong avellin hung kilang lut hihhen. 7Hiche jan chu nao kijil theilouna jan hihen. 8Gaosap them Leviathan suthou thei khop a gaosap them hon hiche ni chu gaosap uhen. 9Hiche nikho chule jingvalpa jong thim den hen, vahding kinem hen lang ahinlah pannabei hihen lang jingkah khovah jong muhih beh hen. 10Kanu naobu khah louva anakoi nikho chu gaosap in umhen, leiset gim gentheina jouse mudinga eina pen sah jeh chun. 11Ipijeh a athisa a kanapen louham? Kanu naobu a konna kahung doh a chu kana thilou ham? 12Ibola kanu phei chunga chu eina kilup sah ham? Ipi bolla kanun anoija eina vah ham? 13Kahung pen chun ana thiden leng kei tua hi lungmong tah a kauma kaimutna kicholdo tadinga. 14Leiset leng le prime minister oupe u oupe tah tah mangthahsa hotoh kicholdo khoma kium dinga. 15Sana haotah tah le ain sungu dangka dimset ho chutoh kichodo khom tading. 16Athisa a peng chapang holeh naosen khovah mukhalou ho banga eina kivui den lou ham? 17Mithisa ho lah a chun miphalou in hahsatna asosah tah lou jeh chun thachol jouse aki choldo tai. 18Thikhol khulla chun sohchang kihen ho jong angah a pangpa sapsetna ajatapouve. 19Mihao leh migenthei aum khomun chule soh jong apupa a konin a ongthol tai. 20Ipi dinga migentheipa hi khovah kimusah a migentheipa hi hinkho kipea ham? 21Thiding angaicha lheh uvin ahinlah thina chu ahung lhung pon, gou kiselguh sangin ngahlel tah in ahollun ahi. ✡ 22Gentheina jouse athoh chai uva athi teng uleh kipana adimset jiuvin lhankhuh amu teng uleh akipah jiuve. 23Akhonung ding neilou Pathen in hahsatna dimsetna aumkhum ho chu hinkho kipeuva ham? 24Khoisatna ding kanei theipon, kathoh hahsat hohi twi bangin akisung lhai. 25Keiman kaki chat pen ipi ham khat kachunga asoh in, hatah a kakichat leh kalung gimna pen ahung lhung tai. 26Lungmonna kanei poi, thipbeh cha umna kanei poi, choldona kanei pon, boina le hahsatna bou ahung ji'e.”