1Nangho Pakai, na Pathen a mong nahinau photchetna ding in, nachalsam kalval uva navotol louhel diu ahi. Hichu athiho lunghempina ahi. 2Pakai, na Pathen diuva nangho atheng nahi tauve, leiset chunga nam jouse lah a goulu pena nalhen doh’u ahitai.
Satheng leh satheng lou
3Chule gancha boh kiti phot naneh thei lou diu ahi. 4Hichengse vang hi naneh thei diu ahi: bongchal, kelngoi, kelcha, 5sajuh, pelkai, sakhi, gam kel, chule molchunga kelngoi jaona neneh thei diu ahi. 6Nanghon a-an lhai umho naneh thei diu ahi. 7Hinlah a-an lhai umlou sa vang chu naneh lou diu ahi. Hichu sangong sang, talep, bui amaho cheng hin an-lhai aneiyun ahinlah a-ihdoh pouvin ahi. Hijeh achu hiche gancha hohi nangho dinga atheng lou ahi. 8Chule vohcha jong naneh lou diu ahi. Anlhai aneiyin hinlah a-ihdoh poi, hijeh achu nangho dia atheng lou ahiye. Hiche gancha hose hi neh jong naneh thei lou diu chule tohjong natoh khah lou diu ahi. 9Twikhanglen'a cheng ganhing lah a, aling nei naneh thei diu ahi. 10Hijeh chun twikhanglen'a um alingnei naneh diu, hinlah aling nei lou kitiphot vang naneh lou diu ahi. Ajeh chu hichengse hi nangho dia atheng lou ahi. 11Chule nanghon chungleng vacha namkim naneh thei diu ahi. 12Hinlah vacha hichengse hi naneh thei lou diu ahi: muthang chule mubong naneh lou diu, 13chule Muvom, muthi, sumbupi, 14va-ah leh ama tobang va dang jouse, 15muthi, muthi-muhchom, chule adang phabep jaona, 16sumbupi nou, sumbupi len, sumbu changlit, 17muthibong, sumbu changlit, sumbupi, Egypt mite muthi, 18bah chule adang phabep jaona naneh lou diu ahi. 19Tollham a ganhing vahle jouse hi naneh lou diu ahi, ajeh chu atheng lou ahi. 20Hinlah vacha lhanei atheng kitiphot chu naneh diu ahi.
21Ganthikam kiti naneh louhel diu ahi. Nakhopi sunguva kholjin miho naneh sah thei diu ahilouleh na hetkhah lou mikoma najoh thei diu ahi. Amavang nanghon naneh thei louhel diu ahi. Ajeh chu Pakai, na Pathen diuva atheng nahiuve. Chule nanghon kelchanou chu kelchapi noituiya nahon lou diu ahi.
Hopsom peh ding dan
22Gasoh lah a somakhat ding nakoi doh diu gasoh jouse lah a, somakhat kumseh le na katdoh diu ahi. 23Hiche somakhat chu Pathen houna muna nahin choi diu Pakai, Pathen in amin dopsang nadinga alhenna muna chu nahin choi diu, hichu Pakai angsunga naneh diu ahi. 24Pakai, na Pathen uvin phatthei nahin boh tenguleh mun gam lha tah hijongleh lousohga tamtah nalo diu, chuteng hoilai muna kon hijongleh somakhat nahin choi diu ahi. 25Amun chu agamlhat behseh a ahileh, hiche gasoh chu najoh diu najohna manu vang chu Pakai, na Pathen'u houna muna chu nalhut diu ahi. 26Nahung lhun tenguleh, nanghon nadeichan nasumuva nakichoh diu bongchal, kelngoi, kelcha, lengpitwi chule adang donthei nachoh jeng theiyu ahi. Chuteng nangho leh nainsung mi teuvin Pakai ansunga an-najon khom diu ahi. 27Chule nalah uva Levi mite nahebol jing diu ahi. Ajeh chu amaho chenna ding nei louva um ahiuve. 28Kumthum lhinsih leh somakhat achombeh a nahin choi diu, hichu khopi toh kinaichaa nakhol khom diu, 29hichu Levi mite napeh diu ahi. Ajeh chu amaho gam nei louva khosa ahiuvin, hichu amahon aneh uva lungkim sela umdiu ahit. Chutile Pakai, na Pathen uvin phatthei naboh diu ahi.