1Pê hũmre nõ ita japrỳ te Raxaro ita xà. Ne pêmehkjêjê pê Marij me Marta mea mã krĩ jacot japrỳ teMehkênpupunxà jõ krĩ ata kam mehkrĩ. 2Ne Marij ata pê amcro ata na Jeju par kam ampo cacôcuxwati ata jaxwỳ, ne ihkĩa to cumã incrà. 3Mã Raxaro kjêjê cahãj itajê te Jeju mã hũjarẽnto hajỹr xà ata kujahêc he:

— Me ijõ Pahhi, por amã gõ ikwỳ nõ kĩnti ataxà! — hajỹr.

4Mã Jeju jũpar ne cute harkwa to:

— Quê ha nee hicu xà kam hà ita ihcuran nare. Ne hàata kôt quê ha me hàhtôa ne quêt ipê Pahpãm kra carôt tỳjti na meijahkre pej. Ne hà ata kôt quê ha me hàhtôa ne quêt me Pahpãm carôt tỳjti ata pupu ne amji mã me hũpa — hajỹr.

5Ne pê ihtỳj Jeju mã Marta me ihtõj Marij ata kĩn, ne hanea ne cumã Raxaro kĩn. 6Mã Jeju te Raxaro xà na harẽn par cakrô, curia hàhhuc xà ata kamapu mõ, ne apu ihkên, ne ahna amcro pijakrut. 7Jirô pê mã ri cute me ipê ihkôt me ipa catêjê mãharkwa to:

— Hacme, hacpỹ mã Juta jõ pjê wỳr — hajỹr.

8Wa me cumã:

— Me ijõ Pahhi, mãr curmã curi Krĩpinkrên catêjê kẽn to ame acapêr prãm ta? Ca ajte ramã hacpỹa mã amji jaxàr prãm? — hane.

9-10Mã Jeju me imã:

— Nee ita na cute imã jũ mãn nare, ne jũ wỳr quê jũ na me ito. Pom ca me pyt pupu, mã hapôj ne ma acjêjmã caxwa ata jĩkjê na ri ite hajỹar. Ne wa cormã iteijàpên xà jipêj nare kam, quê nee jũ na me iton nare. Ne hanea ne cu caxwari me papa, ne pahtỳj me papihur to ame papa. Ne pom pyt me pamã ahcujro, cu kam ame papa, ne me pamã papa xà jahkre pej, ne nee amepapihur, ne me pahkên mã me pancjêj nare. Ita jĩkjê na mã Inxũ te ito hajỹar. Mã Pahpãm teikrã kam imã ite amji jahkre pej jõr, cwỳrjapê ri imãampo te amji kam hapac xà cunea jahkre pej, na wa nee ikênmã icjêj nare.

11— Me pajõ ikwỳ nõ Raxaro ramã nõ ne apu gõr cakrô, wa ha itỳj ihcujrõ ne hỹr — hane.

12Na wa me cumã:

— Pahhi, quê ha cute nõ ne hõt na, quêt taa nõ ne gõr, ne amji cajpẽ. Ampo na? He cormã me hỹrmã me pahcator xà ita ampỳa mã — hane.

13Ne pê tee Jeju ame imã ramã Raxaro tyc na harẽn tohahkre, na wa itỳj amji mã me to hõtxwa mã hõt na amji mã ame to hane! 14-15Mã Jeju hirãa pê me imã:

— Ramã Raxaro tyc, ne me acwỳrjapêa ri, ampeaj kam hũrên ijakry. Quêt taaty, wa nee curi apu imõr nare na ri ihtyc. Ne ihkôat ca ha atỳj ito amji mã me ahimpej. Hacme, ne me hõmpu — hane.

16Mã Tome ita me imã:

— Hacme, me pajõ Pahhi kôt, quê cuxà me pajipej — hajỹr.

17Mã ramã cute kẽn kre kam me Raxaro jarêt na amcro te cwat, wa Jeju me, me icator. 18Mã Mehkênpupunxà jõ krĩ ata ri rec pyxit jĩkjê kam xa, Krĩpinkrên wỳr. 19Cwỳrjapê pê Juta catêjê hàhtôa ne me cato, cute me Marta me Marij pupun, ne me cupê hũjapê cutor prãmte. 20Mã Marta te Jeju te ajpên hàhtêp to mõr na harẽn par, ne ma hỹrmã tẽ ne cute pry kôt ihcajpar. Pê Marij curia ikre kam jỹ. 21Mã Marta Jeju mã:

— Ijõ Pahhi, ca ha ita ri apu mõ na mã, quê ha neeikjê ipê ihtyc nare, ne ramã ihtyc, ca hakàn pê acator. 22Cakrô ca ha ahnaa Pahpãm na ahwỳ, quê ha amã ateampo cunea na gàhwỳr xà atajê gõ — hane.

23Mã Jeju cumã:

— Quê ha akjê ihtỳj hacpỹa mã me amãihtĩr — hane.

24Mã Marta cumã:

— Quê ha ampo cunea jamre xà ata jõ amcro kam ihtỳj hacpỹa mã ihtĩr na, imã hahkre pej — hane.

25Mã Jeju cumã:

— He ampeaj kam ri, ipê hacpỹa mã mehtyc to ihtĩr catê. Na quê ha jũm te ihkên ton to ipa na, quê ha ramã Pahpãm mãa jũm ata tyc pyràc. Cakrô quê ha ito amji mã ihhimpej na, wa ha cumã cute amji kam hapac xà tuw pejti gõ, quê ha Pahpãmmã jũm ita ihtĩr rohnỳtti mã. 26Ne por jũm ito amji mã ihhimpej to ipa ata, quê hanee jũm ata ihtyc ne ihtyc tu nare. Ne ca? Xà ca ha ajkĩ pijamã ijũjarẽn xà itato amji mã ahimpej? — hane.

27Mã cumã:

— Ỹhỹ ijõ Pahhi, wa itỳj apê Pahpãm kraa to ihkra naamji mã ato hane, ne imãa apê Crixtô pê, por pê Pahpãm pjê ita kamate me ito ahimpej xà na ato awjahkre ata mã ca — hane.

28Jirô pê mã ri Marta te amji jaxàr ne ihtõj mã hàkjêr ne kyre pê cumã hũjarẽn to:

— Pajõ Pahhi cator ne cute ana hàhwỳr — hajỹr.

29Mã Marij te harẽn par, ne hãm pyrentu, ne ma Jejuwỳr tẽ. 30Pê nee cormã krĩ mã hàr nare, ne cormã Martaihcajpar xà ata kam, curia pry kam apu mõ. 31Ne pê ramã hõtpê Juta catêjê kwỳ ikre kamame ipa, cute me Marij jũjapê tête me cumãn prãmte. Ne cute me Marij xãm na me hõmpun, mã hũjarêan kam hãm ne ma tẽ, mã ma ihkôt me pra. Ne pê ihtỳj cute kre wỳr ihtẽm ne kam apu incwỳr na amji mã me to hane.

32Mã Marij Jeju wỳr cator, por curi xa ata ri, ne ihpar cahê na ihkõn krã na hỹr, ne cumã:

— Ijõ Pahhi, ca ha ita ri apu mõ na mã, quê ha neeikjê ipê ihtyc nare, ne ramã ihtyc, ca hakàn pê acator — hane.

33Mã Jeju te Marij cwỳr na hõmpun. Ne hanea ne cuteJuta catêjê kwỳ incwỳr na me hõmpun. Ne hõtpê ahna incrycre, ne cumã amji kĩn nare. 34Mã cute mehcukij, ne me cumã:

— Mẽr jõ ri ca ate me hir? — hajỹr. Mã Marij cumã:

— Ajpên mõ ne hõmpu — hane.

35Mã Jeju te ahna kẽn kre pupun ne apu kam amrã.

36Mã Juta catêjê me ajpẽn mã:

— Me hõmpu he, cumã Raxaro kĩan to ihkĩn na mã apu kamamrã! — hane.

37Mã mehkwỳ me harẽn to:

— Hõtpê cute into tũm caprãr, ne quê rỳ mã Raxaro tyc xwỳjrea na jũ na to, quê ha nee ihtyc nare. Nehamre ramã ihtyc, ne jũ mã mã quê ha to? — hane.

38Mã hipêr ahna Jeju crycre, ne cumã amji kĩn nare, mã ma kẽn kre wỳr tẽ, ne cute kẽn kre jarkwa pupun, mã kẽn nõa te kre ata jarkwa jihê, Juta catêjê te amji jarêt xà ata kôt.

39Mã cute kre na harkwa hyr to:

— Me kẽn te kre jarkwa jihê ita capa — hajỹr. Mã Raxaro kjê pê Marta ita te cumã harẽn to:

— Ijõ Pahhi, ramã harêt na amcro te cwat ita kam ramãihkro — hajỹr.

40Mã Jeju cumã:

— Xà wa ite curmã me amã amji jarẽn to: “Ca ha ate me ipar na, ca ha atỳj me Pahpãm carôt pupu” hajỹr nare? — hane.

41Mã cute me kẽn kre ata jihê mẽn. Mã Jeju kàj mã irĩt ne cute Hũm mã harkwa to:

— Inxũ, wa hõtpê amã icakôc, ca atỳj ikampa pyrên riijakry. 42Ampo na mã wa ite icakôc xà ita ton? He me hàhtôti atajê mã wa ite icakôc xà ita ton, mã cute me ipar. Ne ate ikujahêc na me ijahkre pej to prãm to wa ite me cumã hajỹr — hajỹr.

43Ne cute hũjarẽn to hajỹr jirô pê mã ri cute Raxaro mã hàkjêr to:

— Ikwỳ nõ Raxaro, ajpên põ mã acato! — hajỹr.

44Mã por Raxaro tyc ata tĩr pyrentu. Mã cupẽhkà te ihpar me hũhkra cunea cajpre ita kam, jũ wỳr quê mõr pej, na ri ajpên põ mã toamji rẽn to mõ. Mã hanea ne ihkuc na hê. Mã Jeju te ame hõmpu atajê mã harkwa to:

— Intête me cupẽhkà te ihcupu ata pô, quê ihtỳjtẽ — hajỹr. Mã cupê ipôt par, mã ma põ mã tẽ.

45Mã Juta catêjê jàhtôa ne me Marij pupun to mõatajê, te me Jeju te Inxũ carôt kôt hàpên xà pihho pejti ton ata na mehõmpun, ne ihtỳj amji mã me to ihhimpej pyrentu. 46Ne mehkwỳ te nee me hajỹr nare, ne ma cute me amji jacjên, ne Parixêw catêjê mã, Jeju te ampo tonxà atajê na harẽn.

47Mã Parixêw catêjê me, cute Pahpãm mã mehcajrẽn catêjê jõ pahhi me, cute me cuprõn, prohti kam catêjê me, ne cute me ajpẽn par, ne me ajpẽn mã:

— Ampo to mã cu ha ajte me? Nãmri jũm xũmre itacarôt catia to hàpên xà pihho pejti pit ton to mõ. 48Cu cama ahna me hamã, ne nee intête mehcahpêrkàr nare, quê ihtỳj me cumã ton to mõ, quê ha mehcunea ahna me hõmpu, ne me kampa, ne ihkôat meamji kampa. Quê ha Roman catêjê jõ pahhi me hõmpu, neihtỳj hacpỹa mã me pahna apkjê, ne me pahkam tẽ, ne mepapê Pahpãm to amji kam me hapac xà jũrkwa pytà, neame pajõ krĩ to kêanre ne — hajỹr.

49Mã caku ata na Cajpa ata pê Pahpãmmã cute mehcajrẽn catêjê jõ pahhiti. Na ri cute harkwa to:

— Pỳhàpà, ajte me acunea pê amji jahkre kêatre! 50Ne imãa ite amji kam ijapac xà te hajỹr he. Quê ha jũm xũmre pyxit peaj nety, cu ha nee me pahcunea me pahtyc nare. Nãmri quêha pyxit peaj te ihtyc nare na, cu ha me pahcunea me pahhi tu. Cwỳrjapê ri Jeju pyxit peaj ne ihtyc xà — hajỹr.

51Ne pê Cajpa ihcakôc xà ata kam, nee amjia kôtihcakôc nare, Pahpãm pê cumã ihcakôc xà ita tohahkre. Ne pê cupê Pahpãm mã cute mehcajrẽn catêjêjõ pahhiti. Cwỳrjapê pê Jeju te Juta catêjê cuneaincwỳrjapê ihtyc na, me cumã amji jarẽ. 52He nee mã Juta catêjê incwỳrjapê pit mãihtyc xà nare. Ne pjê cunea kam, mehcunea pê Pahpãm kraame ipicràn atajê to cute cuprõn, ne me to pyxitpeaj prãm to, quê ha ihtỳj ty.

53Ne amcro ata kam cute me Jeju curan prãmte pê me cupê Juta catêjê jõ pahhi kwỳ cunea ahna me ajpẽn pa. 54Cwỳrjapê pê nee Jeju hirã pê ajco apu Juta jõ pjê kam ipa nare. Na wa ma, por põ na pire mã, pjê kam põ kam me hamreare ata wỳr Jeju me, me mõ, por Pĩxôhrôt jõ pjê ata wỳr, necuria wa me ijàhhuc.

55Ne pê ramã amcro incrêre me Hakren xà jõ amji kĩnwỳr. Pê amji kĩn ata xwỳjrea na Juta catêjê jàhtôa ne Krĩpinkrên wỳr me cato, cute ame ampo kên ton atajê to me hapac kêt, ne ame amji cũmpej. Ne amji kĩn ata na mempejti na ame ipa xà caxuw. 56Ne pê mehcunea ame Jeju japên to me ipa, ne ajco ahna ame ajpẽn cukij, Pahpãm to me amji kam me hapac xà jũrkwa kam. Ne me ajpẽn mã:

— Pỳhàpà, mõrmõ quê ha ajkĩ ihtỳj ajpên Jeju amji kĩn ita wỳr mõ, nare, quê ha nee mõr nare? — hajỹr.

57Me Pahpãm mã cute mehcajrẽn catêjê jõ pahhi kwỳ me, me cupê Parixêw catêjê kwỳ me, cute me Jeju jaxàr na me ajpẽn par. Cwỳrjapê ri cute ahna meharkwa, quê jũ ri jũm hõmpu, ne uua ne me cumã harẽ, por jũ ri apu mõr xà ata ri.