Surat i Pablo ki
PILEMON
Kepurisnan et itueng Surat neng Pilemon
Si Pilemon sembatung kilalang mengengandel dut Empuꞌ na lengku kebayaꞌ eset Pengempuan naꞌ benwa dut lungsud et Kolosas. Ya in dereakan i Onesimo, itueng uripen neng nekebuluy. Eset sembatung timpu nekilala i Onesimus si Pablo, sementaraꞌ na ya eset seled pipirisuan. Negmendyaring mengengandel si Onesimo pebiyaꞌ eset ki Pablo. Itueng surat i Pablo ki Pilemon, peingasiꞌ na terimanen kenyeng uripen, diki lang bilang uripen neng inampun temed erapun tipused eset Empuꞌ. Sabab gaay i Pablo ipeuliꞌ si Onesimo ki Pilemon kaya sasew.
Ketulduan et itueng Surat
Penagnaꞌ 1-3
Pegbantug ki Pilemon 4-7
Peingasiꞌ tudyu ki Onesimo 8-22
Ketimpusan 23-25
1Mewanan ki Pablo, na nepirisu sabab et pegpeabar ku et Menungang Abar pasal ki Jesus neng Kristo, bekeꞌ mewanan eset ki Timoteo na kityung tipused dut Empuꞌ.
Ki Pilemon gasi na pegmerganen kay neng saliꞌ ku neng mengengeradya, 2bekeꞌ eset mengeꞌ mengengandel na negmegtingtimung eset benwa mu, ki Apia na dameng libun neng tipused, bekeꞌ ki Arkipo na dameng saliꞌ sundalu i Jesus Kristo.
3Meseʼt dimyu teyen itueng redyikiꞌ bekeꞌ itueng kesenangan mewanan eset Empuꞌ na kityung Amaꞌ bekeꞌ ki Jesus Kristo neng Begerar tyu.
Itueng Pegmergaꞌ bekeꞌ Pegandel i Pilemon
4Tipused Pilemon, daran ku megpeselamat eset dakeng Empuꞌ sasat ku pegpenelang pepebayaꞌ ku ikew, 5sabab mekeebaran ku itueng pasal et dimung pegandel eset kityung Empung si Jesus bekeꞌ dimung pegmergaꞌ na pepebiriꞌ mu ne eset ginsan kenyeng mengengandel. 6Pegpenelang ku na baꞌ ipenugid mu dut ibang taaw pasal et pegandel mu na maya teyen teup keretian dut ginsan neng indeginis na maya kityu dut biyag eset Empuꞌ sabab pekikipegsembatu kew ne dut ki Jesus Kristo. 7Biꞌbilaꞌ, ipineksan mu aku sabab et pegmergaꞌ mu eset mengeꞌ mengengandel sampay pinebasag mu aku banar. Itue ne gasi negpeenep eset atey et ginsan neng mengengandel et Empuꞌ.
Negpeingasiꞌ si Pablo dut ki Pilemon pasal ki Onesimo
8-9Na, tiban gaay ku megpeingasiꞌ dimu. Sewd mu ne, mekedyari ku menahag dimu eset kebayaan i Jesus neng Kristo. Sabab itueng ginis na sugat na keredyanen mu, temed pegmerganen ku ikew na lebing menunga baꞌ engaten ku lang dimu. Na, aku si Pablo nesugid itue, sembatung megurang na taaw et seled pipirisuan sabab et pegpengandel ku ki Jesus Kristo. 10Angkansa megpeingasiꞌ ku dimu na tebangan si Onesimo. Na ya in samat yegang ku ne eset pengandel atueʼt seled pipirisuan. 11Sene tiꞌ, ya kaya kepulusan eset dimu, segwaꞌ tiban ya kepulus-pulus na dimu bekeꞌ daken.
12Pegpebibit ku dimu ki Onesimo riminupuk ku ne banar. 13Kegeayan ku teyen na tumerna lang ya eset daken apang kesubli mu ya na ketabang eset daken na megpelatap et Menungang Abar et Empuꞌ sasat seled pipirisuan ku peꞌ. 14Temed mendiꞌ ku buwaten atin, selyu baꞌ diki tinugut mu, apang diki megmendyaring leges imbes pegtabang mu daken mewanan eset seled atey mu.
15Meraliꞌ meparak eset dimu si Onesimo mengeꞌ sengkerit neng timpu, apang pegseuliꞌ ye dimu, kebayaꞌ ne dimu daran. 16Tiban tuꞌ, lein lang ye sembatung uripen lang, temed lebi ne atin, baꞌ diki sembatung pegmerganen naꞌ tipused pekikipegsembatu ki Kristo. Ya in mergaꞌ eset daken temed lebi ne eset dimu, dut sembatung uripen sampay sembatung tipused nega dut Empuꞌ.
17Angkansa teyen, na baꞌ aku pegekuen mu na iba-iba mu tantu, terimanen mu ya, na samat pegterima mu eset daken in. 18Na baꞌ ya in nekebuwat et keselaan eset dimu, etawa nekeutang gasi, eset daken mu mene sukuten. 19Keremut ku et negsurat et itue.
Aku ne itueng si Pablo, na megbayad dimu.
Diki ne gaay ku iperendem nega dimu itueng utang mu eset daken itueng pegkilala mu ki Kristo. 20Pegmerganen ku neng biꞌbilaꞌ, begeyan mu aku et keksanan eset mepikiran mu, supaya meksanan atey ku sabab et keradya et Empuꞌ seled kite.
21Nesewran ku na buwaten mu itueng ginsan neng pegtewen ku, sampay megluwas nega. 22Sembatu nega, penyapan myu aku et sisingled, sabab pegeerapen ku na gaayeʼt Empuꞌ na aku mekepeuliꞌ nega esentin, na samat dimyung pegpenelenganen.
Pengemuring Pemangling
23Pegpenglingen ke i Epapras na iba ku neng nepirisu sabab et pegpengandel ye ki Jesus Kristo. 24Megdemikian gasi, kire Markus, si Aristarko, si Demas sampay ki Lukas na mengeꞌ kesebeyaan ku na mengengeradya.
25Pegpenelang ku na maya eset dimyu redyikiꞌ i Empung Jesus Kristo tyu!
Seked atue mena tiban.