1Pegketbes, sinugid gasi i Yahweh ki Noe, kwan, “Sumled ke bekeꞌ esawa mu sampay mengeꞌ keyegangan mu dut kelang kapal letew, sabab ikew lang nebiriꞌ ku metignaꞌ tiban eset ginsaʼt mengeꞌ taaw et itueng penewnan. 2Bibit key et tegpitung megesawa neng ginsan kaya meridiꞌ neng mengeꞌ ayup. Eset mayang meridiꞌ, duwang ginisan lang neng megesawa bitaꞌ. 3Bitaꞌ gasi pitung ginisan et mengeꞌ begit neng megesawa apang diki metpuꞌ itueng kekenyeng ginisan atuʼt dunyaꞌ. 4Sabab kepituan pedlekan ku ne dunyaꞌ et seled epat neng pulung eldew bekeꞌ epat neng pulung gebi. Sabab imeteyen ku ginsan ginisan neng mengeꞌ megiginawa atuʼt dunyaꞌ neng ginuna ku.” 5Kineradya i Noe ginsan tinahag kenye et Empuꞌ Yahweh.

6Enem neng gatus neng teun ne umur i Noe ganang liminiyud atuʼt dunyaꞌ. 7Siminakat si Noe iba ye esawa bekeꞌ telung keyegangan yeng lelaki sampay mengeꞌ esawa dye apang mepelegyuan dye pegdeklaꞌ et danum. 8Nememayaꞌ kedye ginisan et mengeꞌ meridiꞌ bekeꞌ mengeꞌ menungang ayup. Maya gasi mengeꞌ begit sampay mengeꞌ ayup neng meglempey et lugtaꞌ. 9Tegsengkesewanan et ginsan neng ginuna et Empuꞌ Elohim diminateng dut kelang kapal letew sigun et tahag et Empuꞌ Elohim ki Noe. 10Indyariꞌ, pegketbes et pitung eldew, liminiyud ne eset sengkedunyaan.

11Neinabu itue ganang enem neng gatus neng teun bekeꞌ duwang bulan sampay sempuluꞌ pitung eldew umur i Noe. Simimpuk ginsan buwal et danum. Ngiminanga diriguangan et langit bekeꞌ diminlek. 12Diminlek et seled epat neng pulung eldew bekeꞌ epat neng pulung gebi. 13Ating eldew et tagnaꞌ et pegdelek nekesled si Noe, iba ye esawa ye bekeꞌ telung keyegangan yeng lelaki si Sem, si Ham bekeꞌ si Japet, iba dye mengeꞌ esawa dye. 14Nememayaꞌ kedye ginsan neng ayup et gebaꞌ bekeꞌ mengeꞌ meguep neng ayup sampay ginisan neng meglempey neng ayup dut dunyaꞌ. Duun gasi mengeꞌ reramu bekeꞌ ginsan keginisan neng begit. 15Nemengdateng ki Noe tegsembatu-sembatung ginisan et megesawa neng mengeꞌ ayup neng megbibiyag. 16Nemenakat libun lelaki samat sinugid et Empuꞌ Elohim ki Noe. Pegketbes, tinengleb i Yahweh lelengewan et kelang kapal letew.

17Diminlek bekeꞌ liminiyud et epat neng pulung eldew bekeꞌ epat neng pulung gebi. Siminipwat danum, angkansa, limintew lang kelang kapal letew dut dibuwat et lugtaꞌ. 18Dimineklaꞌ bekeꞌ riminarem danum atuʼt dunyaꞌ, segwaꞌ limintew lang kelang kapal letew. 19Pelahyun pegdeklaꞌ et danum seked nererep ginsan neng kebudbukiran. 20Misan mengeꞌ bukid neng melangkew nelimunan et limang depa sabab et pegdeklaꞌ et danum. 21Angkansa, natey ginsan neng megiginawa atuʼt lugtaꞌ. Nemematey ginsaʼt mengeꞌ begit bekeꞌ ginsaʼt mengeꞌ meklag bekeꞌ mengeꞌ ayup sampay mengeꞌ meglempey et lugtaꞌ. Nemematey gasi ginsan taaw. 22Natey ginsan neng megiginawa atuʼt lugtaꞌ. 23Tinpu et Empuꞌ Elohim ginsan neng negbiyag atuʼt dunyaꞌ samat mengeꞌ taaw bekeꞌ mengeꞌ ayup sampay mengeꞌ begit. Selyu si Noe mene sampay mengeꞌ iba ye dut kelang kapal letew netinda. 24Senggatus bekeꞌ limampulung eldew tinetegan et danum atuʼt dunyaꞌ.