1Angkansa ganang diki kay ne mesendalan mengrendem, pinegmenunga kay ne petektak atuʼt lungsud et Atinas. 2Angkansa tinahag kay dimyu si Timoteo na kityung tipused, bekeꞌ mengengeradya et Empuꞌ dut megpebunayag et Menungang Abar tudyu ki Kristo. Tinahag kay gasi ya supaya megpebasag bekeꞌ megpeteger dimyu et dimyung pengandel et Empuꞌ, 3apang kaya sembatu dimyu mesasew pikiran sabab et mengeꞌ pegsulay na itue. Sewd myu ne gasi subaliꞌ maya ketiksaan dumateng dimyu, sabab atin ne eset pegpanduꞌ tyu. 4Tantu banar, kwit iba-iba myu nega kami, pegsugiren kay ne lagi na kityu tiksaen. Na atin ne pesi neinabu, asal sewd myu ne. 5Sabab et itue ganang diki ku ne mesendalan negtahag ku ne ki Timoteo dut dimyu, apang meketuturan daken pasal et dimyung pegandel dut kityung Empuꞌ. Megtelas ne atey ku kaluꞌkaluꞌ nebibit kew ne et menunuksuꞌ i Seytan. Na baꞌ kwantin, meugaraʼt kepulusan eset dameng pinegsenseraan dut dimyu.

6Segwaꞌ tiban nekepeuliꞌ ne si Timoteo, na maya bibit ye menungang tuturan pasal et dimyung pegandel bekeꞌ pegingin. Tinuturan ye pasal et dimyung pengrendem damen, na ingin-ingin myu na mebiriꞌ kami peuliꞌ. Megdemikian kami kwantin gasi, ingin kay mebiriꞌ kemyu. 7Angkansa mengeꞌ ketipusdan, misan ne mekansang keliyutan sampay ketiksaan kay, neimuyuk myu kami sabab et dimyung pengandel dut ki Jesus. 8Samat tiban kiminesan kay ne, sabab nesewran kay ne na mepagen ne pegandel myu, dut Begerar tyu neng si Jesus. 9Pegserungsukuran kay Empuꞌ pasal et dimyu, sabab et ginsan neng keksanan na nerasa kay, pasal et dimyung pengandel. 10Pegpenelang kay banar gebi bekeꞌ eldew, na mekitaꞌ kay kemyu peuliꞌ, apang metebangan baꞌ enu nega kekurangan myu pasal et dimyung pengandel.

11Na tiban turunan teyen damen et kityung Empuꞌ Amaꞌ, bekeꞌ si Jesus neng Begerar tyu na mekerateng kay dut dimyu. 12Buwaten teyen et Begerar na ipelembuꞌ sampay ipekansang pegingin myu dut kesebeyaan bekeꞌ dut sinu-sinu, tiat pegingin kay dimyu. 13Pebesagen ye teyen pusuꞌ myu, apang kaya seseweyan dimyu, bekeꞌ mendyaring pasek metignaꞌ kew dut elepan et Empuꞌ Amaꞌ tyu, baꞌ matuꞌ ne Begerar tyung si Jesus kebayaꞌ ginsan neng kenyeng mengeꞌ taaw neng mengengandel kenye.