Unang surat i
PEDRO
Kepurisnan et itueng Surat neng 1 Pedro
Itueng na unang surat i Pedro surung dut mengeꞌ mengengandel i Jesus, betangen atue “Tawʼt piniliꞌ et Empuꞌ”, neparak ne dut leing-leing probinsiya et Asia Minor, dut tampaꞌ iragaꞌ. Sebaban et itueng surat ipepangger seled et mengeꞌ memegbatsa, na pegsendalen et ketiksaan sabab et pengandel dye ki Jesus Kristo. Tumanen i Pedro itue pebiyaꞌ et perendemen dye ating Menungang Abar pasal ki Jesus Kristo, pasal et Kesimayaan ye, pegbiyag peuliꞌ teyeg et kepeteyan, bekeꞌ pegdateng Ye atue peuliꞌ na subaliꞌ ibgey kedye et pegarap. Sabab et itue, subaliꞌ dye terimanan bekeꞌ sandalen itueng ketiksaan, bilang kesulayan et kedyeng pengandel, baꞌ banar etawa kaya. Masi itue maya ganti kedye dut Eldew et Pebunayag i Jesus Kristo. (1 Pedro 1:7)
Pedingan et kepenggeran ye, ipeasi-asi gasi i Pedro kedye na biyagan bilang mengeꞌ taaw neng pekikisembatu ki Kristo.
Ketulduan et itueng Surat
Pemangling teyeg i Pedro 1:1-2
Rendeman pasal et Kepuwasan i Empuꞌ 1:3-12
Ating Bebresan i Empuꞌ 1:12
Pengangey Tudyuꞌ dut Pasek Metignang Pengebiyagan 1:13—2:10
Mengeꞌ Biyag na Batu bekeꞌ Piniliꞌ na Bangsa 2:1-3
Kristo bekeꞌ mengeꞌ Mengengandel Ye, antangan Dye mengeꞌ Batu Pengbenwa 2:4-10
Pengsukuꞌ Tyu dut mengeꞌ Begerar Tyu 2:11—4:19
Pegsukuꞌ Tyu dut Mengiibut eset Kityu 2:13-17
Adyat dut mengeꞌ Keseraan 2:18-25
Adyat dut mengeꞌ Mengesawa 3:1-7
Ketiksaan bekeꞌ Kesendalan sabab et Metignaꞌ 3:8-22
Pengebiyagen sabab et Empuꞌ 4:1-6
Menungang Pengendelen et mengeꞌ Beybegeyan et Empuꞌ 4:7-11
Pasal et Ketiksaan et Mengengandel i Jesus 4:12-19
Adyat dut mengeꞌ Pengibuten bekeꞌ Ibang Mengengandel 5:1-11
Emuring Pemilin i Pedro 5:12-14
Pemangling teyeg i Pedro
1Mawaꞌ ki Pedro neng Apostol i Jesus Kristo negsurat et itue surung dut mengeꞌ taaw et Empuꞌ na nemegpekparak na mengeꞌ nemenumpang dut mengeꞌ probinsiya et Ponto, Galasia, Kapadosia, Asia bekeꞌ Bitinia.
2Kemyu piniliꞌ et Empuꞌ Amaꞌ uyun dut Kenyeng kesesewran tihad negaʼt tagnaꞌ tiꞌ, supaya mepepasek metignaꞌ et Empung Nakem apang kesunud ki Jesus Kristo, bekeꞌ megmendyaring melinas sabab dut kewasa et Kenyeng pegkepatey neng simayaꞌ.
Kumansang teyen redyikiꞌ bekeꞌ kesenangan et Empuꞌ eset dimyu ginsan.
Kelang Pegarap Tyu na Biyag Kaya Seskeran
3Deyewen tyu ating Empuꞌ bekeꞌ Amaꞌ et Begerar tyu neng si Jesus Kristo. Sabab et kelang ingasiꞌ et Empuꞌ kityu, pinegyegang tyu peuliꞌ et sembatung bagung biyag na maya pegarap, sabab lang et pegkebiyag peuliꞌ i Jesus Kristo teyeg dut kepeteyan. 4Na mekpetan tyu ating menungang redyikiꞌ na diki merungkat, kaya meridiꞌ, bekeꞌ diki megberuba. Ating kementirian naꞌ atin nepanyap et Empuꞌ dimyu dut langit. 5Sabab et pengandel myu, kemyu dyeganan et kepengyedian et Empuꞌ sasat pegtetegeyan myu kepuwasan neng pinanyap na ipebunayag dut emuring eldew.
6Sabab et itue, mepatut na kemyu menep asal, misan ne tiban kemyu kelabay et iba-ibang pegsulay seled et senung timpu. 7Deuluꞌ bulawan neng mekeusibaꞌ, pepelabay nega dut apuy supaya mesewran baꞌ banar tantung bulawan. Megdemikian gasi dimyung pengandel, luwas nega dut bulawan, atin pepelabay gasi dut pegsulay supaya mesewran baꞌ banar mebentel apang kemyu deyewen, mepebantug, bekeꞌ untebien eset Eldew na mepebunayag si Jesus Kristo eset sengkedunyaan.
8Ingga nebiriꞌ myu Ya kwit tiꞌ, segwaꞌ Ya pegmerganen myu ne. Ingga gasi mebiriꞌ myu Ya tiban, segwaꞌ nengandel kew ne Kenye. Sabab et itue, megapew ne enep dut dimyung pusuꞌ dut kelang kesegyanan na diki mapet-apet ituturan, naꞌ teyeg Empuꞌ dut langit neꞌ kesegyanan. 9Sabab nekeyg myu ne buaꞌ et dimyung pengandel eset Kenye, ating kepuwasan et kurudua myu.
10Pasal et kepuwasan na itue, inintetew et menunga et mengeꞌ tarus neng nenarus pasal et pinanyap dimyu neng redyikiꞌ na itue e. 11Inintetew dye itue e baꞌ ingyan bekeꞌ enungkwan meinabu. Pasal et itueng penewnan, atin pegtentuen et Nakem i Kristo neng diminapel kedye na pinegnaan neng pinebunayag eset kedye neng lagiꞌ ating keliyutan sandalen i Kristo bekeꞌ itueng kesunud na kebentugan na meterima Ye.
Ating Bebresan i Empuꞌ
12Ganang ipinebunayag dye pasal itueng keberbenaran itue, lahyun gasi sewd kedye et Empuꞌ na atin pegbuwaten dye in asal kepulusan myu, diki lang kedye. Itueng keberbenaran na itue nekingeg myu tiban dut menunulduꞌ et Menungang Abar et Empuꞌ. Pegberes dye dimyu pebiyaꞌ dut kepengyedian et Empung Nakem neng pinesurung kedye teyeg dut langit. Pasal gasi keberbenaran na itue, gey-gaay dye na mesewran misan mengeꞌ dereakan et Empuꞌ dut langit.
Pengangey Tudyuꞌ dut Pasek Metignaꞌ neng Pengebiyagan
13Angkansa penyapaꞌ myu dimyung mengeꞌ pikiran dut pegbuwaten myu pebiyaꞌ medehengen myu atin apang megpekepangger kew bekeꞌ mengarap kew banar et redyikiꞌ neng mekpetan myu ganang mepebunayag peuliꞌ ne si Jesus Kristo. 14Bilang mesinunuren neng mengeꞌ keyegangan, ibutaꞌ myu Empuꞌ bekeꞌ endey ibuten ating meyeyaat neng napsuꞌ samat pegbuwaten myu sene tiꞌ na kemyu ingga peꞌ mekeretiꞌ banar pasal et Empuꞌ. 15Segwaꞌ samat Empuꞌ neng pasek metignaꞌ neng neningkag dimyu, kwantin gasi dimyu megpepasek metignaꞌ kew gasi, misan enu eluen myu. 16Sabab nekesurat dut Kesuratan, na kwaʼt Empuꞌ, “Megpekepasek Metignaꞌ kew, sabab Aku tuꞌ mepasek metignaꞌ.”
17Kaya misan sinu peginturen et Empuꞌ. Sama-sama ukumen Ye ginsan kuyun dut mengeꞌ buwat dye. Asal sabab et pegtingkagen myu Ya et Amaꞌ baꞌ menelangin kew, untebiaꞌ myu Ya sasat kew pebibiyag et diki mekwit atuʼt dunya. 18Sewd myu baꞌ enu lingkat dimyu dut kaya keguna-guna neng pemimiyag neng pinusakaꞌ myu dut dimyung kegunggurangan. Ating lingkat dimyu diki mengeꞌ ginis mekerungkat etawa mekamin, samat pirak bekeꞌ bulawan. 19Segwaꞌ timbus kew pebiyaꞌ et mergaꞌ neꞌ duguꞌ i Kristo, antangan Ye ating bibili na kaya keraki-daki etawa kebulilian neng sinimayaꞌ dut Empuꞌ pasal et dimyu. 20Piniliꞌ et Empuꞌ ne lagi Ya, mura pinendyari ating sengkinleban, segwaꞌ alang-alang dimyu ya pinebunayag mura mapet kepuspusaʼt penewnan. 21Sabab si Jesus Kristo, nengandel kew dut Empuꞌ neng nemiyag peuliꞌ Kenye teyeg dut kepeteyan bekeꞌ binggey Kenye kebentugan, angkan dimyung pengandel bekeꞌ pegarap dun net Empuꞌ.
22Sabab lininasan myu ne diriꞌ myu sabab et pegtumanen myu et keberbenaran, mesungduan mebentel neng pegmergaꞌ et kede sembatu na pengandel samat dimyu, meatur bekeꞌ tantu banar teyen dimyung pegmergaan. 23Sabab pinegyegang kew peuliꞌ, diki sabab et atin mepapas, erapun inyet kaya megpapas in, sabab et atin pebibiyag bekeꞌ megteternaꞌ neng Beres et Empuꞌ. 24Samat sinugid et Kesuratan, kwan,
“Ginsaʼt taaw antang samat mengeꞌ beririꞌ,
bekeꞌ samat mengeꞌ burak dut kelnangan ginsan kemayad-ayad.
Segwaꞌ mengeꞌ beririꞌ mekerungley, bekeꞌ mengeꞌ burak megkerep.
25Segwaꞌ ating beres et Begerar neng Empuꞌ tatap kaya seskeran.”
Na itue ne ating Menungang Abar neng pineabar dimyu.