Bibeli Luayãtaalá Soũↄ 104

Dii Pↄ́piikɛna táasilɛa

1Má Dii sáaukpa.

Dii ma Lua, ń zↄ̃ↄ maamaaɛ,

ń gawi daa pↄkasa ũ, àlɛ tɛkɛ,

2gupua fĩfĩama zwãa ũ.

N musu kpàlɛ lán pɛwa,

3n bɛkpà lousisiaa.

N luabɛpuana kɛ̀ ń sↄ̃́go ũ,

niↄ bɛ ń ĩ́anao.

4Ni ĩ́ana gbaɛ n zĩnaↄ ũ,

ni tɛ́ zĩ n zĩkɛnaↄ ũ.

5N dṹnia kàlɛ, n a zĩ́napɛ̀lɛ,

a deea vĩ bauo.

6N ísia lɛ̀aàla pↄkasa ũ,

í kù gbɛ̀sĩsĩↄla.

7N ípi lèle ↄ̃ à bàasi,

n pũnawà ↄ̃ gili gɛ̃̀u.

8Gbɛ̀sĩsĩↄ lɛsĩ kũ̀, gusalalaↄ ɛɛnkũ,

ↄ̃ í tà gu pↄ́ ń dìlɛɛ̀u.

9N kↄↄ dà ípiɛ, a e vĩao,

a e ɛa da tↄↄlɛa bau lↄo.

10Ń tò nibↄnaↄ ì í pisi swa'ↄnaↄu,

ↄ̃ a í ìↄ bàalɛ gbɛ̀sĩsĩↄ zãnguo.

11Sɛ̃̀a pↄ́pii ìↄ a imi,

a í ì sɛ̃̀a zàa'ĩnaↄ imi bↄ.

12Bãↄ ìↄ ka swapiↄ saɛ,

aaìↄ pɛa a dào guu, an wii ìↄ dↄu.

13Za n bɛ ni lou gbaɛ gbɛ̀sĩsĩↄwa,

n zĩ gbɛ ì dṹnia kã́.

14Ni to sɛ̃ bↄlɛ pↄtuoↄnɛ,

ni blɛ bui kpa sɛ̃̀wanaↄwa.

Ni blɛ bↄlɛ tↄↄlɛ, aai ble.

15Vɛ̃ɛ pↄ́ ì ń pↄ kɛ na

ń nísi pↄ́ ì ń lɛkpɛ yↄo

ń blɛ pↄ́ ì ń gba gbãao.

16Dii líↄ ì mↄ̀sɛ e maamaa,

sɛdɛ lí pↄ́ a bà Libãpiↄ.

17We bãↄ ì sakpɛdadau,

wàalianaↄ ì bɛkpa pɛ̃li láu.

18Gbɛ̀sĩsĩ lɛsĩↄ dɛ tueↄ kúkĩi ũ,

gbɛtↄↄↄ dɛ ɛ̃́n'ui'uinaↄ ulɛkĩi ũ.

19N mↄvua kɛ̀ gↄↄ tàasikabↄ ũ

ń ĩatɛ̃ pↄ́ a gɛ̃a kpɛ́u gↄↄ dↄ̃o.

20Ni to gu si, ↄ̃ gwãasĩna ì kɛ,

ↄ̃ lákpɛ pↄ́ↄ ì fɛlɛ ń táo píi.

21Nↄ̀ↄmusuↄ ì ↄ́ↄlↄ maafɛi,

aaì pↄblea wɛɛlɛ Luawa.

22Tó ĩatɛ̃ bìlɛ, aaì lↄ̀ↄ gá,

aaì ta wúlɛi ń tòou.

23Gbɛ̃nazĩna ì bↄ gɛ́ zĩkɛi,

ìↄ yãma azĩawa e oosi.

24Dii, n yãkɛaↄ dasi fá!

Apii bↄ̀ n ↄ̃nↄ guuɛ.

Dṹnia pà ń pↄ́ pↄ́ ń kɛ̀ↄ.

25Ísia ku, a zↄ̃ↄ mɛ́ a yàasa,

pↄ́ bɛ̃́ɛ pↄ́ kú a guuↄ lɛ́ vĩo,

a nɛ́na a zↄ̃ↄ píi.

26Gó'ilɛnaↄ ìↄ bɛu

ń kwãsa pↄ́ ń kɛ̀ à kↄ̃̀ↄ'ouo.

27Pↄ́piↄ wɛ́ dↄnzi ḿpii,

kɛ́ ǹ blɛ kpámá a gↄↄwa.

28Ni kpámá, aaì sɛ́lɛ,

ni ↄ poonɛ́ ↄ̃ pↄmaaↄ ì ń kã́.

29Tó n mikpɛlìnɛ́, bíli ì ń kũɛ,

tó n wɛ̃ni sìmá,

aaì ga aa ɛa ta tɛ̃́ɛnauɛ.

30Tó n n Nisĩna gbàɛ,

pↄ́ bɛ̃́ɛↄ ì bↄ,

ni to tↄↄlɛ ɛa dafukũ.

31Dii gawipi aↄ ku gↄↄpiiɛ,

Dii pↄ i kɛ na a yãkɛaↄwa.

32Ì dṹnia gwa ↄ̃ dṹnia ì lua,

ì ↄkã gbɛ̀sĩsĩↄwa ↄ̃ súɛlɛ ì bↄ.

33Má lɛsi Diiɛ e ma wɛ̃ni lɛ́uɛ,

má a Lua táasilɛ e ma kua lɛ́uɛ.

34To ma làasoo kangu,

mí pↄnakɛnnↄ, Dii.

35To duunkɛnaↄ midɛ dṹnia guu,

vãikɛnaↄ su aaↄ ku lↄo.

Má Dii sáaukpa.

Àleluya!

Notes

*104:4 Ɛbɛ 1.7

†104:6 Daa 1.1-2

‡104:7 Daa 1.9

§104:14 Daa 1.11

*104:19 Daa 1.14