Bibeli Luayãtaalá Soũↄ 77

Lua dↄnlɛ bɛɛkɛa taasi guu

1Asafa lɛ.

2Ma lɛzù Luazi,

ma wiilɛ̀wà,

ma lɛzù Luazi aà ma yãma.

3Kua taasi guu ma Dii kĩ́i wɛ̀ɛlɛ,

ma ↄ dↄa Luazi gwã́ kpasasai,

ma nↄ̀sɛ i nínio.

4Kɛ́ ma làasoo tà Lua kĩ́i,

ↄ̃ málɛ kãsãnkɛ,

kɛ́ ma aà wàaipà,

ma nisĩna vùa.

5Ń ma wɛ́ kũa, mi e i'òo,

ma gↄ̃ bíli guu, mi dↄ̃ lá má oo.

6Ma làasookɛ̀ yãawa

ń wɛ̃̀ zizi pↄ́ gɛ̃̀ↄ yã́o.

7Lɛ pↄ́ má dà yãa dↄ̀magu gwã́,

ma làasookɛ̀wà mà wɛɛlɛ dↄ̃.

8Ma mɛ̀: Dii wá vũaa gↄↄpii yã̀?

Wá yã́ a kaaàgu lↄoa?

9Aà gbɛ̃kɛ mìdɛ míↄmiↄ yã̀?

Aà yã́ aↄ gbooa gↄↄpii yã̀?

10Wá wɛ̃nagwaa yã́ sã̀ Luagu yã̀?

Aà pↄ pàwázi, a wá wɛgwa lↄoa?

11Ɔ̃ ma mɛ̀: Yã́ pↄ́ má kũan kɛ:

Musude ↄzɛɛdↄ̀wɛ̃ɛɛ.

12Má làasookɛ Dii yãbↄnsaɛↄwa,

mí aà yã́ pↄ́ a kɛ̀ yãaↄ dↄ gbɛ̃́ↄgu.

13Má n dabudabukɛaↄ wàaipa píi,

mí n yãzↄ̃ↄkɛaↄ onɛ́.

14Lua, n zɛ́ gbãsĩ vĩo.

Dii kpele mɛ́ zↄ̃ↄ lán Luawai?

15Ḿmɛ ń Lua dabudabukɛna ũ,

n n gbãa ↄ̀lↄ buiↄnɛ.

16N n gbɛ̃́ↄ mìsi ń n gã̀sa gbãao,

wá Yakↄbu ń Yosɛfuo buiↄ.

17Ísia wɛsìnlɛ Lua,

ísia wɛsìnlɛ ↄ̃ à kↄ̃dɛ̀,

à lùalua za a ɛu.

18Lou kwɛ̀, a pũnaa kↄ̃fĩ dↄ̀ luabɛ,

n kà tɛdeↄ kpa loupilɛa ũ.

19N pũnaa kↄ̃fĩ dↄ zàa'ĩana guu,

loupilɛa dṹnia pù píi.

Tↄↄlɛ gbãlɛ à lùalua.

20N zɛ́ dà ísiau,

n gɛ̃kĩi bↄ̀ í zↄ̃ↄ guu,

wi n kɛ̀sɛgbɛ eo.

21N dↄaa n gbɛ̃́ↄnɛ lán sã waiwa

Mↄizi ń Aalonao sabai.