1Báaaden gbɛ̃́ pↄ́ Dii aà tàae wòlowà

à aà duuna kɛ̃̀wà ũ.

2Báaaden gbɛ̃́ pↄ́ Dii lí aà tàae yãda lↄo

mɛ́ mↄafili kú aà nↄ̀sɛ guuo ũ.*

3Kɛ́ má nílɛ ń ma duunao, ma ibàba,

ma wii ìↄ dↄ za kↄↄ e oosi.

4N ↄtↄ̃ↄlɛaa fãanɛ ń gwãasĩnao,

ma yɛ̃̀ɛɛ làa lá guantɛ̃na ĩatɛ̃ ma gbɛ̃wa.

5Ɔ̃ ma wenɛ ma duunai,

mi a yãvãi ulɛnɛ lↄo.

Ma mɛ̀ má a tàaeↄ onɛ Dii,

ↄ̃ n ma duuna kɛ̃̀a.

6N náaikɛna wabikɛma a gↄↄwa,

tó yã'ĩa lɛ́ mↄ́, a aà le lↄo.

7Ma ulɛkĩin n ũ,

ni ma bↄ wɛ́tɛ̃a guu,

ni liamazi ǹ ma suaba.

8Dii òmɛɛ à mɛ̀: Má yãdanɛ,

mí n da zɛ́ pↄ́ dɛ ǹ sɛwa,

má lɛdama, míↄ wɛ́tɛnzi.

9Ńsu ǹyↄ̃ ku làasoosai

lán sↄ̃́ ge sↄ̃baonawao.

Tó ni ã̀asĩna kánɛ́ ge kpío,

aali n dↄ̀ↄ sɛo.

10Yã'ↄ̃ma ì li gbɛ̃vãiↄla,

Dii gbɛ̃kɛ ì li aà náaikɛnaↄla.

11Gbɛ̃maaↄ, à pↄnakɛ ń Diio,

nↄ̀sɛpuadeↄ, à gulakɛ, í yáalↄ.