Bibeli Luayãtaalá Yáasiↄ 22

1Tↄ́ na dɛ àizɛɛa,

na ń gbɛ̃́ↄ dɛ vua ń ã́nusuola.

2Ɔde ń taasideo zĩ́na doũɛ,

Dii mɛ́ ń kɛ́ píi.

3Laaide ì dↄaa vãi e, ↄ̃ ì ulɛɛ̀,

ↄ̃nↄsaide ì gi àↄ gɛ́, ↄ̃ ì wɛ́tɛ̃a e.

4Zĩabusaa vĩakɛa Diiɛ guu gbɛ

mɛ́ àizɛɛ ń bɛɛɛo ń wɛ̃nio ũ.

5Lɛ ń baio ku gbɛ̃́ dↄ̀ↄsai zɛ́u,

gbɛ̃́ pↄ́ ye aafiai ì kɛ̃́má.

6Ɛ̀waasona da zɛ́ pↄ́ dɛ aà sɛwa,

tó à zↄ̃ↄkũ̀, a bↄuo.

7Ɔde ì gbãamↄ taasideɛ,

pↄsɛ̃ana ì zↄble pↄdeɛɛ.

8Gbɛ̃́ pↄ́ vãi tↄ̃̀ a yã'e a kɛkɛgↄↄ,

aà pãsĩkɛgo a aà gbɛ̃.

9Lua a báaada gbɛ̃́ pↄ́ gbɛ̃kɛ vĩgu

kɛ́ ì blɛli taasideↄnɛ yã́i.

10Láanide yá, sòle i midɛ,

yãkele ń wío i láa.

11Nↄ̀sɛpuade pↄ́ a lɛgbɛ'i na,

ↄ̃mɛ aↄ dɛ kía gbɛ̃na ũ.

12Dii ìↄ wɛ́tɛ dↄ̃ai,

ì mↄafilide ɛɛkaɛ̀ a ↄzĩ.

13Màade ì mɛ nↄ̀ↄmusu ku bàasi,

a ma dɛ gãaɛɛ.

14Káalua lɛ́á ɛ̀ zòoloɛ,

gbɛ̃́ pↄ́ Dii láaizĩ̀wà ì lɛ́lɛ dau.

15Faasaiyã ìↄ dↄ nɛ́ↄ sↄ̃wa,

totoa ń flão a to aa kɛ̃wà.

16Gbãasaide wɛtãa ì aà kã́fĩ,

ↄde gbaa pↄ́ ì aà kɛ̃́sã.

Ɔ̃nↄnaↄ lɛdama

17Swã́kpa ǹ ↄ̃nↄnaↄ yã'onɛ ma,

ǹ n nↄ̀sɛ wɛ̃ ma yãdanɛɛ,

18asa a maa ǹyↄ̃ kũa n sↄ̃ guuɛ,

iↄ dↄ n lɛ́u.

19Baa mpi, málɛ yãdanɛ gbã,

kɛ́ ǹyↄ̃ Dii náai vĩɛ.

20Ma yã'onɛ kɛ̃̀nɛ mɛ̀n baakwi,

yã́piↄ lɛdama ń dↄ̃ao vĩ.

21Málɛ yã́ pↄ́ sĩana vĩ danɛ,

kɛ́ ǹ e ǹ yã́zãsimá a zɛ́waɛ.

22Ńsu gbãasaide ble aà gbãasaikɛ yã́io,

ńsu gbãamↄ wɛ̃nadeɛ yã́kpalɛkɛkĩio.

23Asa Dii a yã́sińnↄɛ,

i gbɛ̃́ pↄ́ lɛ́ ń wɛtãↄ wɛtã.

24Ńsu gbɛ̃́kpa ń pↄkũmadeoo,

ńsu bɛbɛ ń pↄfɛ̃deoo,

25kɛ́ ńsu ǹ aà dàa sɛ́lɛ

ǹ nzĩa kpa yã́io yã́i.

26Ńsu gbɛ̃pãle fĩa di n miwao,

ńsu kpɛ́gaausíɛ̀o.

27Tó ń pↄe vĩ ǹ fĩaboòo,

wa n wúlɛbↄ sɛ n zíɛɛ.

28Ńsu kↄↄ baa vĩo,

n deziↄ mɛ́ dà za zi.

29Ń gbɛ̃́ pↄ́ gↄ̃i vĩ a ↄzĩ guu dↄ̃a?

Ade a zĩkɛ kíaↄnɛɛ, ì kɛ táaaↄ a kɛnɛ́o.

Notes

*22:11 Mat 5.8