Bibeli Luayãtaalá Yobu 33

Lua ì gbɛ̃nazĩna gba laai

1Ma yãma sa Yobu,

swã́kpa ma yã'oai.

2Gwa, ma bↄ ń yã́o sa,

a dↄ ma lɛ́u.

3Ma yã́ↄ lɛ́ bↄ ma nↄ̀sɛmaa guuɛ,

málɛ yã́ pↄ́ má dↄ̃ o ń nↄ̀sɛmɛndoo.

4Lua Nisĩna ma kɛ,

Gbãapiide lɛ́'ĩanapi ma gba wɛ̃ni.

5Tó ńyↄ̃ fↄ̃́, yãwea,

sↄukɛ, ní yã́zãsia.

6Má kɛ́, má doũnnↄ Luaɛɛ,

à gĩtↄ̀ à ma kɛò sↄ̃ɛ.

7Ńsu vĩakɛmɛɛo,

má ↄtↄ̃ma gbãao.

8Ń ò ma swã́ mà,

má mà n yã'ò n mɛ̀,

9ń tàae vĩo, ń zɛ̃a,

ń kú gbãsĩsai, ń yãvãi vĩo.

10Ɔ̃ Lua íbɛlɛsɛ̀nnↄ,

à n dilɛ a wɛ̀lɛ ũ.

11Ì galakpanɛ,

ìↄ n tàasika n yãkɛa píi guu.

12Málɛ onɛ, n yã́ bee nao,

asa Lua zↄ̃ↄ dɛ gbɛ̃nazĩnaa.

13Bↄ́yãi ńlɛ zↄadↄ Luawa

kɛ́ ìli yã́zãsi gbɛ̃nazĩnawao ni?

14Lua ì yã'o gɛ̃n doɛ,

ìli a gbɛsisio.

15Ì yã'onɛ́ wɛ́pungu'ea ge nana guu gwã́,

gↄↄ pↄ́ i niazĩde kpà gbɛ̃́ↄla,

aalɛ ipi o ń wúlɛkĩi.

16Ɔ̃ ì yã'o ń swã́u,

ì to vĩa ń kṹ ń ĩadama yã́o,

17kɛ́ gbɛ̃́ↄ e mikɛ̃ yãvãiwa,

mɛ́ aasu ĩ́anadão.

18Ì gínɛ́ màa aa ta miau,

ì kpánɛ́ wà ń dɛdɛ ń fɛ̃ndao.

19Ì gbɛ̃́ toto ń wawãwão aà wúlɛkĩi,

ì ĩakpaaàzi kã́mabosai,

20ↄ̃ pↄblea ì kɛɛ̀ bↄlↄ ũ,

ìliↄ ye a pↄeã blɛi seo.

21Aà mɛ ì ibaba,

aà wá pↄ́ ulɛa yãa ì bↄ gupuau sa,

22e aà wɛ̃ni kãikũ ń miao,

àlɛ sↄ̃ malaika gbɛ̃dɛnaↄzi.

23Ń beeo tó a malaika vĩ kↄ́ↄ ũ,

gbɛ̃́ pↄ́ dɛ gbɛ̃ↄn ↄ̀aa sↄoↄla,

a yã́ pↄ́ zɛvĩ ↄlↄɛ̀,

24i sùuukɛaànↄ à onɛ́:

Ásu to aà ta miauo,

ma aà misia zɛ́ è.

25Aà mɛ i dafukũ lán nɛ́tɛ̃nawa,

iↄ tɛkɛ lán ɛ̀waasowa,

26i wabikɛ Luawa, i kɛaànↄ na.

Tó a è Lua a wɛgwà, a kúkuakɛ,

Lua i ɛa to aàↄ naanↄ.

27A gɛ́ gbɛ̃́ↄ kĩ́i, i mɛ:

Ma duunakɛ̀ ma yã́zɛde fuangbà,

ↄ̃ Lua i a fĩabomɛɛo.

28À ma mìsi, mi ta miauo,

málɛ pↄnakɛ aà gupuau sa.

29Ń èa? Lua ì yã́ beeↄ kɛ píi,

ì kɛ gbɛ̃́ɛ gɛ̃n pla, baa gɛ̃n àaↄ̃.

30Ì aà si gawa,

kɛ́ gupua wɛ̃nide e biiwà.

31Swã́kpa ǹ ma yãma, Yobu,

ǹyↄ̃ n lɛ́ kpaaũ, mapi má yã'o.

32Tó ń yã'oa vĩ sↄ̃, o,

asa má ye mà yãnakpama.

33Tó ń vĩ sↄ̃o, ma yãma.

Nílɛ mà ↄ̃nↄ danɛ.