Bibeli Luayãtaalá Yobu 27

Yobu yãnakpaa azĩawa

1Yobu ɛ̀a pɛ̀ a yã́lɛ lↄ à mɛ̀:

2Lua ku! À gì yãnakpáia,

Gbãapiidepi tò ma pↄ yà.

3Gↄↄ pↄ́ Lua ĩ́an wɛ̃nide ku ma mɛu,

e ma wɛ̃ni lɛ́u,

4yãfaasai a bↄ ma lɛ́uo,

máↄ mↄafili vĩo.

5Kai! Má o á yã́ mɛ́ kú bauo.

E mà gɛ gaò má zɛ ń ma yãnakɛoɛ.

6Ma maakɛ ↄ̃ ma zɛò, má bↄ a kpɛo,

ma làasoo a ma dayãuo e ma wɛ̃ni lɛ́u.

7Lua to gbɛ̃́ pↄ́ íbɛlɛsɛ̀manↄ gↄ̃ lán gbɛ̃vãiwa,

aà to gbɛ̃́ pↄ́ fɛ̀lɛmanↄ gↄ̃ lán faasaidewa.

8Tó Lua tò a yãmansai ã́nuatò,

bↄ́ aà wɛ́ aↄ dↄii?

9Lua a swã́sɛ aà wiilɛai

gↄↄ pↄ́ wɛ́tɛ̃a aà lèe?

10Aà pↄ a kɛ na Gbãapiidewae?

Aↄ Lua sisi mↄ̀ↄmↄↄe?

11Má Lua gbãa yã́ bↄↄlɛkɛɛ́,

má Gbãapiide yãkɛae ulɛɛ́o.

12Ápii á è lá a dɛ.

Bↄ́yãi álɛ yãpã bↄlɛi?

13Baa pↄ́ Lua dìlɛ gbɛ̃́ pãsĩɛn kɛ,

zia pↄ́ Gbãapiide dìlɛ gbɛ̃vãiɛ.

14Baa tó aà nɛ́ↄ dasi,

wa ń dɛdɛ ń fɛ̃ndaoɛ,

blɛ ali mↄ́ aà buiↄwao.

15Gagyã a aà nɛ́ pↄ́ gↄ̃̀ aà kpɛↄ sɛ́lɛ,

aà gyaaↄ nɛ́piↄ ga ↄ́ↄlↄ.

16Baa tó à ã́nusu kã̀aaazi lán bùsuwa,

mɛ́ à pↄkasa nↄ̀nↄaaazi lán bɛ̀lɛ zɛwa,

17gbɛ̃maaↄ mɛ́ aa aà pↄ́piↄ da,

yãesaideↄ mɛ́ aa aà ã́nusupiↄ kpaalɛkↄ̃ɛ.

18Kpɛ́ pↄ́ a dↄ̀ dɛ lán dã̀nsakpɛwaɛ,

lán gudↄ̃ana kolakpɛwa.

19A wúlɛ ↄde ũ, ãma a fɛlɛ lↄo,

tó aà wɛ́ wɛ̃̀, a e á kú ã́nuau lↄo.

20Pↄ́ pↄ́ ì to vĩa ń kṹↄ daaàla lán íwa,

zàa gwãasĩna a aà sɛ́.

21Gukpɛ ĩ́ana a aà sɛ gɛ̃ò zɛ́a,

i aà go a tía.

22Lua a kakpálɛwà aà wɛ̃nagwasai,

gbɛ̃vãipi i tílɛ àↄ bↄ Lua ↄzĩ.

23Wì ↄtaakãaawà,

wìↄ fionadadawà e aà go a tía.