Bibeli Luayãtaalá Làasoode 10

Sↄũkɛ kai

1Ũsĩn gɛↄ ì to tulalekɛna nísi gĩ ĩ́ikũ,

sↄũkɛ yↄↄna ì gbɛ̃́ pↄ́ ↄ̃nↄ ń bɛɛɛo vĩ tↄ́ ↄ̃̀ↄkpa.

2Ɔ̃nↄna làasoo ì ta ↄplaai,

sↄũ pↄ́ ì ta ↄzɛɛi.

3Baa tó sↄũ bɛ zɛ́u,

aà ↄ̃nↄ ìↄ kɛ̃́sãwàɛ,

ì to gbɛ̃́pii a mìsaikɛ dↄ̃.

4Tó gbãade pↄ pànzi,

ńsu go n tíao.

Kua n laaiwa ì láka tàae zↄ̃ↄa.

5Ma yãvãie è dṹniau,

a dɛ gbãade zãa yã́wa ũɛ.

6Wì sↄũↄ kpa kpala gbiau dasi,

mɛ́ ↄdeↄ ìↄ ku kpala yãfũnau.

7Ma zↄↄ è di sↄ̃́ kpɛ,

mɛ́ wɛ̃́ɛↄ bɛ kɛ̀sɛ lán zↄↄwa.

8Gbɛ̃́ pↄ́ lɛ́ ɛyↄ̃ a zu a guu,

gbɛ̃́ pↄ́ lɛ́ gĩ gboo, mlɛ̃ a aà só.

9Gbɛ̃́ pↄ́ lɛ́ gbɛwi, gbɛ a aà kɛ'ĩa,

gbɛ̃́ pↄ́ lɛ́ lipaa, lí a aà kaikɛ.

10Tó mↄo lɛnao, mɛ́ wi a lɛkɛo,

sema ǹ gã̀sĩwa bↄbↄwà ń gbãao,

ãma ↄ̃nↄ ì to wà zɛ'eɛ.

11Tó mlɛ̃ bↄn'ãa kɛ̀ a kↄ̃̀ↄ'onaɛ à aà sò,

a ài vĩ a guu lↄo.

12Ɔ̃nↄna lɛgbɛ'i na,

ãma sↄũ lɛ́ ì aà kaalɛɛ.

13Ì na yã'owa sↄũsↄũ,

ì a midɛ ń mìsaiyãvãio,

14asa sↄũ ì da yãaɛ.

Lá gbɛ̃e yã́ pↄ́ a mↄ dↄ̃o,

démɛ a fↄ̃ yã́ pↄ́ a kɛ aà kpɛ oɛ̀i?

15Sↄũ zĩ ì aà kpasa,

ↄ̃ ìliↄ wɛ̃́lɛ zɛ́ dↄ̃o.

16Waiyoo bùsu pↄ́ a kía dɛ ɛ̀waasona ũ,

mɛ́ aà ìwaↄ ìↄ blɛ gbɛ̃ kↄↄ.

17Násaa bùsu pↄ́ a kíaá kíabuiɛ,

mɛ́ aà ìwaↄ ì pↄble a gↄↄwa

gbãakãfĩa yã́i, i kɛ idɛkɛa yã́i no.

18Tó gbɛ̃́ màa vĩ,

aà kpɛ́ zaↄ ìↄ wozuzuaɛ,

tó à ↄkpà a sì, aà kpɛ́ ì ibↄ.

19Wì blɛ zↄ̃ↄ kɛ pↄnakɛa yã́iɛ,

vɛ̃ɛmia ì mↄ́ ń yaalↄo,

ãma ↄ̃a mɛ́ ì mↄ́ ń a píio.

20Ńsu kía sↄ̃́sↄ̃o, baa n nↄ̀sɛu,

ńsu ↄde kao, baa n kpɛa,

asa bã a yã́pi sɛ́lɛ gɛ́ siuinɛ́ɛ.

Notes

*10:8 Soũ 7.16, Yaa 26.27