Bibeli Luayãtaalá 1 Piɛɛ 1

PIƐƐ LÁ SƐ̃IA

Yã́ pↄ́ kú láɛ bee guuↄ

Piɛɛ láɛ bee kɛ̃̀ za Loma Yesude pↄ́ aa fãaaa wà tà bùsu pↄ́ wì mɛ tia Tuukii bùsuuↄnɛɛ. Gãli pↄ́ aa ku a guuↄ dɛ gãli pↄ́ Pↄlu ń aà ìwaↄ dàalɛdaalɛↄ ũ. Yↄ̃a pãsĩ ń lé an Yesudekɛ yã́i, ↄ̃ wàlɛ ĩadamá. Piɛɛ tò an laai tà Yesu Kilisiwa, à mɛ̀ an baa ku Kilisi taasikɛa guu.

Fↄkpaama ń Lua sáaukpaao gbɛa, Piɛɛ lá Lua ń suabà dↄ̀ńgu, ↄ̃ aa tãmaa pↄ́ lí ń nɛo vĩ Yesu Kilisi gaa ń aà vuao sabai (1.3-12). À ń gbá laai aaↄ itɛ̃kɛ, aa tó ń kua aↄ adoa naa Yesu Kilisiwa (1.13-2.10). À Yesu ↄlɛsɛ̀ à yãdàonɛ́ à mɛ̀ à kũ̀ aaↄ náai vĩ ń yãkɛaↄ guu, atɛ̃sa kua yↄ̃a guu. À lɛdàmá an kua dṹnia guu, à mɛ̀ aa misiilɛ gbãadeↄnɛ, zĩkɛnaↄ misiilɛ ń diiↄnɛ, nↄɛↄ misiilɛ ń zã́ↄnɛ, Yesudeↄ píi iↄ yekↄ̃zi (2.11-4.19). Lɛɛ 5 guu à lɛdà Yesude gbɛ̃zↄ̃ↄↄwa ń ɛ̀waasoↄ ń luanaaikɛnaↄ píi, à mɛ̀ aa zɛ gbãa kua yã'ĩa guu, aa Lua lɛgbɛ̃anɛ́ papaa dã́. Lápi làa ń fↄkpaamáo.

À kũ̀ láɛ bee kyokɛnaↄ wɛtã luanaaikɛa guu, baa tó aalɛ taasi kpeletaa bui kɛ, kɛ́ an kua e Lua tↄbↄ, i zɛ'ↄlↄ Yesusaideↄnɛ yã́i. Tó luanaaikɛnsaiↄ yãmaa pↄ́ aalɛ kɛↄ è, aa Lua sáaukpa yã́kpalɛkɛgↄↄzĩ (2.12).

Tãmaa pↄ́ lí ń nɛ́o

1Mámɛmaa Yesu Kilisi zĩna Piɛɛ, mámɛ ma láɛ bee kɛ̃̀ Lua gbɛ̃́ pↄ́ aa dɛ nibↄↄ ũ dṹniaɛ bee guu aa fãaaa bùsuɛ beeuↄnɛ: Pↄ̃ntu, Galati, Kapadosi, Azi ń Bitinio. 2Mae Lua dↄ̀aa á dↄ̃, ↄ̃ à á sɛ́, a gↄ̃ aà pↄ́ ũ ń aà Nisĩna gbãao, kɛ́ à misiilɛ Yesu Kilisiɛ, aà au i á gbãsĩ wolo. Lua gbɛ̃kɛ ń aafiao kã́fĩɛ́.

3Wà Lua wá Dii Yesu Kilisi Mae sáaukpa! Aà sùuu zↄ̃ↄ guu à wá í dafu ń Yesu Kilisi fɛlɛ bↄa gau gbãao, ↄ̃ wá tãmaa pↄ́ lí ń nɛ́o vĩ, 4asa gba pↄ́ dilɛaɛ́ luabɛpi lí ↄ̃̀ↄkpao, ìli gbãsĩkpao, a maa lí láao. 5Lua sↄu mà à á suaba a náai pↄ́ álɛ kɛ yã́i, ↄ̃ àlɛ á dↄ̃́a ń a gbãao e à gɛ bↄò gↄↄgbɛzãzĩ. 6Álɛ pↄnakɛ ń yã́pio, baa kɛ́ álɛ taasikɛ gĩa yↄↄ yã'ĩa bui dasi yã́i. 7Lá wì vua maa dↄ̃ tɛ́ guu, màa yã'ĩapiↄ lɛ́ á luanaaikɛa yↄ̃, asa á luanaaikɛapi bɛɛɛ vĩ dɛ vua pↄ́ a gawi ì láaa maamaaɛ. Tó a bↄ maa, Lua a á sáaukpa Yesu Kilisi mↄgↄↄzĩ, a á kpɛla ń gawio. 8Baa kɛ́ i aà eo, á yeaàzi. Baa kɛ́ i wɛsiaàlɛ gĩao, álɛ aà náaikɛ, ↄ̃ álɛ pↄna zↄ̃ↄ pↄ́ gɛ̃̀ oaa kɛ, 9kɛ́ álɛ á luanaaikɛa gbɛ'e á suabaa ũ yã́i.

10Ãnabiↄ dↄ̀aa gbɛ̃kɛ pↄ́ Lua a kɛɛ́ yã'ò, aa suabaapi yã́ gwà aa a tàasikà. 11Kilisi Nisĩna kú ń guu, à dↄ̀aa taasi pↄ́ Kilisipi a kɛ ònɛ́ ń gawi pↄ́ a e a gbɛao, ↄ̃ aa wɛ̀ɛlɛ wà yã́pi zɛ́ dↄ̃ ń a kɛgↄↄo. 12Ɔ̃ Lua tò aa dↄ̃̀ kɛ́ yã́ pↄ́ aalɛ opi dɛ ń gↄↄ pↄ́ ũo, á pↄ́ɛ. Tiasa baonakpanaↄ yã́pi òɛ́ ń Lua Nisĩna pↄ́ Luapi aà zĩ̀ à bↄ̀ luabɛ gbãao. Baa malaikaↄ ì dɛ̃ɛka yã́pi dↄ̃ai.

Wá kua àↄ adoa

13Ayãmɛto à á làasoo vu iu, íↄ ázĩa kũa dↄ̃, á wɛ́ iↄ dↄ gbɛ̃kɛ pↄ́ Lua a kɛɛ́ Yesu Kilisi mↄgↄↄzĩzi seasai. 14Lá á dɛ Lua Nɛ́ pↄ́ lɛ́ aà yãmaↄ ũ, ásu to dↄ́ɛ'ĩi pↄ́ á vĩ yãa á wɛ́siagↄↄ dↄaaɛ́o. 15Lua kua adoaɛ. Lá à á sisi à á sɛ́, á kua líↄ adoa á yãkɛa píi guu màa sↄ̃. 16Asa a kɛ̃a láu wà mɛ̀:

Á kua líↄ adoa,

asa ma kua adoaɛ.

17Lá Lua ì yã́kpalɛkɛ ń baadeo a yãkɛawa ń wɛgwasai, tó álɛ aà sisi Mae, à vĩakɛɛ̀ á nibↄkɛ guu la. 18Á dↄ̃ lá Lua á bↄ́ kua gii pↄ́ dɛ á fɛlɛkaa ũ guu. Lua i á bo ń pↄ́ pↄ́ a gawi ì láao no, vua ge ã́nusu, 19à á bó ń Kilisi pↄ́ dɛ sã sãasai gbãsĩsai ũ au gawideoɛ. 20Lua dↄ̀aa aà dìlɛ zadↄ̃ i dṹnia kálɛo, ↄ̃ à bↄ̀ɛ́aànↄ gupuau gↄↄ gbɛzãɛ beeↄzĩ. 21Aà yã́ musu ↄ̃ álɛ Lua náaikɛ. Lua aà bↄ̀ gau à gawi kpàwà, kɛ́ à e a náaikɛ, á wɛ́ iↄ dↄazi.

22Lá misiilɛa sĩanaɛ á gbãsĩ wòlo, ↄ̃ á gbɛ̃kɛ vĩ ń kↄ̃o mↄafilisai, àↄ yekↄ̃i ń nↄ̀sɛmɛndoo. 23Lua á í dafu ń a yã́ wɛ̃nide pↄ́ ìↄ ku gbãaoɛ. Yã́pi dɛ pↄbui pↄ́ ì ga ũo, pↄbui pↄ́ lí gaoɛ.

24Gbɛ̃́pii dɛ lán sɛ̃waɛ,

an gawi píi dɛ lán sɛ̃vuwaɛ.

Sɛ̃ ì gaga, a vú ì kwɛ́,

25ãma Dii yã́ ìↄ ku gↄↄpiiɛ.

Yã́pi mɛ́ dɛ baona pↄ́ wa kpàɛ́ ũ.

Notes