1Yabint daanɔ nba tee Yennu na piak.

U yi tingbouŋ na kur,

laa nyii yondo po ki saa tuu yonbaa po.

2Yabint Yennu yentu nyi Sayɔnn doo nba fan na ni.

3Ti Yennu baate, ŋaan u kan baar soon nna,

muu sii die ki be u tɔɔnn, ki wonpaaruk da ki lintirɔ.

4Ki u saa yiin sanpaak nan tiŋ ki bin di siara,

ki la waa saa bu u niib buut biaŋinba.

5U yet a, “Taant niib nba ŋamm bi mɔŋ na ki turin,

binba mann maruŋ ki senn mɔsonn nanin.”

6Sanpagbant mɔɔntir nan Yennu-e tee Kasii Daanɔ,

ki saa bu buut.

7“N niib, gbiintir, ki man pak.

N niib Israel teeb, n saa di siara ki biiri.

Mine tee Yennu, ki tee i Yennu.

8N ki yakii nani i maruŋ paak,

koo i mujoonu piinii nba be n tɔɔnn po na paak kaa.

9N ki loon naajai nba be i naagɔtit ni,

koo buunii nba be i buloi ni na,

10kimaan bonkobit nba kur be muuk ni na tee n yabe,

nan nei nba kur be kunkona tusaa paak na.

11Nɔɔnii nba kur be tee n yabe,

ki bonfoa nba kur be muuk ni na tee n yabe.

12“Kom-i bonni mɔkin, n bo kan betini,

kimaan durinya nan linba kur be li ni tee n yare.

13N ŋman naajai nantii? Koo n nyu buunii sɔmii?

14Ii ŋaan ki i niipoturu-ii tee i maruŋ ki teen min Yennu,

ki bia tuu tur min Yabint Daanɔ linba kur ki i senn mɔsonn.

15Ii tuu yiin min Yennu yoo nba ki i la daamii,

ki n saa fati, ki i sii baakitin.”

16Yennu yeen nɔɔnbiit damm a:

“I la yaak lee ki sii piak n sennu po?

Bee ki i sii piak n mɔlor po?

17I ki sak nan min ŋmakiti, ki yêt n sennu.

18Nanyukii nba kur ki i lab, ki i sob yɔɔs,

ki pukin i mɔŋ bonchonchona ni.

19“I teen siir nan mabiit pakue, ki i mɔi farik nan faak,

20ki teen siir nan yin pak ki biir i tiɔŋ ninjamm,

ki paab maan.

21I tun linba na kurawa, ŋaan n ki yet siari,

ki i ji dukin nan n mun tee nan yimm nae.

Mɔtana, n saa yakii naniwa, ki kat wanni, i numm ni.

22“Gbiintir linba na man, yimm nba yêtin na,

nna-i kaa, n saa boontiwa, ki sɔɔ kii be ki saa tinniini.

23Niipoturue tee maruŋ nba baakitin,

ki n set saa tinn binba kur saak n mɔb.”