1Ki Elihu ŋamm yet a: 2Job, li ki ŋan ki fin yet nan a ki tun ki biir Yennu, 3koo ki boi Yennu nan, “N toonbiit daamiia nlee? Maa ki tun biit na, n nyɔɔt tee lanne?” 4N loon ki man gat fin nan a yɔɔsnba nae mun.

5Gotir sanpaapo, a saa la nan sanpagbant na fɔk nanawa. 6Li-i tee ki a tun bonbiir, li kan teen Yennu siar. A lekii tun ki kpet taar munŋaawa, ŋaan li kan daamii Yennu. 7Faa tee popeenn daanɔ na, li sommit Yennu-u? Yennu ki loon siar a boori. 8A yaa toonbiit paake ki a lɔɔ di fara, ki toonŋana nba ki a tuun na, ki li sommitɔ.

9Li-i tee ki niib be mabir ni, bi tuu duune, ki fabin ki loon sɔɔ n sommib. 10Ŋaan bi ki baat Yennu boor, wunba tee bi naamii daanɔ, ki teemm dindann yoo nba ki bi be werebuk ni na. 11Bi ki baat Yennu boor, wunba teent subinii na, ki te ki ti mɔk yan ki gar bonkobuk, koo nɔɔŋ nba be kur. 12Bi tun buie ki loon sommir, ŋaan ki Yennu ki teemm gatu, kimaan bi mɔk garuk, ki tee toonbiit damm. 13Li ki mɔk nyɔɔt nan bii mɔ mɔnii; Yabint Yennu ki laatib, koo ki gbia bi miaru.

14Job, a yet nan a kan fit la Yennu, ŋaan dimin sukuru, a maan be u boor. 15A dukii nan Yennu ki daar niib tuba, ki bia ki fiin toonbiit po. 16Li ki mɔk nyɔɔt nan fii tun kii piak; li tee barmɔniie nan a ki mi faa piak linba.