1Job, mɔtana, gbiintir linba ki n yaa man beta na fanu. 2N teen siir nan man yet linba kur be n dudukit niwa. 3N maan kur yeene, ki n piak barmɔnii. 4Yennu Seeke namin, ki turin manfoor.

5A turin gatu, li-i tee ki a saa fit. Teent siir ki nɔi nanin. 6Min nan fin tee yomme Yennu boor. Ti kura na, Yennu jii nɔɔnne ki nant. 7Li paak, li ki ŋan ki fii tiinin jaŋmaanii. N kii diinani.

8Maa gbat linba ki a pake na a: 9“N ki tun biiri. N ki tun siar ki biiri. N ki tun kpeti, n nyii biit niwa, 10ŋaan ki Yennu la nyiiruk nba ki u jii lekin, ki ŋmaŋitin nan n tee u dataake na. 11Ki u bobin jarit n taa ni; ki gorii taaŋmaatir nba kur ki n chat.”

12Ŋaan Job, n yaa man yeta nan a biira. Yennu yab ki gar nisaarik kur. 13Bee teen ki a nyiir Yennu nan linba paak teen ki u ki gat nisaarik miaru? 14Yennu lek yɔɔ piak, ŋaan sɔɔ ki gbiin maan nba ki u piak na. 15Nyiɔk nba ki niib tuu gɔɔnt na, Yennu piak damiit nan yirintu nie. 16U tuu te ki bin gbiint waa piak linbae, ki bi tuu tin jaŋmaanii nan kpaanii nba ki u teemm na. 17Yennu piak a lin te bin nyik toonbiit tumue, ki bia gɔɔrib, ki bi daa mɔk dont-n-mɔŋ. 18U kan te ki bin la biiru. U saa tinnib ki bin nyi kuun ni. 19Yennu teen nirɔ yiaru, ki yekitir u gbanant nan tont, a lin ŋmakitɔ u binbeŋ ni. 20Baatɔɔ mɔb ni ki man, ki u jekpaŋit gbaa tuu tone. 21U gbanant tuu fɔɔre, ki u ki naan nirɔ, ki a fit laat u kpaba kur; 22ki li kan wei nan wun saan kpeentiŋ.

23Li pasiar Yennu malakanba, binba tee tusaa tusaa na yenɔ nba tian niib bi toona po nae saa baar ki tan sommɔ. 24Ki malaka na sii mɔk ninbatinu ki yet a, “Ŋaamɔ, li ki tee wun saan kpeentiŋi. Paatii nba saa pa ki ŋaaue na.” 25Ki u gbanant saa ŋamm pant ki mɔk paŋ, 26ki wuu miar Yennu yoo nba, Yennu saa gat turɔ, ki u saa jiantɔ nan kpinkpammuk, ki Yennu saa ŋamm ŋmant bont kur fanu ki turɔ. 27Ki u saa yet niwor ni a, “N tun yanbɔmma. N ki tun linba ŋani, ŋaan ki Yennu tinnin. 28U fat nyinnin, ki n ki saan kpeentiŋi, ki daa mɔk manfoor.”

29Yennu yɔɔ tuun linba nae yoo kur, 30ki tint nisaarik manfoor, ki teenɔ parmaasir u manfoor benu ni.

31Job, ji gbiintir mɔtana linba ki n yaa n beta; ŋminin ki ŋaan man pak. 32Ŋaan li-i tee ki a mɔk siar ki saa yeti, ŋaant man gbatir, ki n sii mɔk parpeenn ki sak nan a mɔk mɔnii. 33Ŋaan li-i kii tee nna, fan ŋmin, ki gbiint ki turin, ki n saa wanna faa saa la yan biaŋinba.