1Ki Job jiin a: 2N por Yabint Yennu nba fo na, wunba ki sak ki turin mɔnii, ki te ki n binbeŋ toŋ na sann ni, 3Yennu nba daa turin manfoor ki n be na, 4n kan ban jii n mɔb ki pak bonbiir, ki n jerin bia kan ban faar faaki. 5N kan yet a linba ki i piak na tee barmɔnii. N sii kpan see nan n ki biir siare, ki saa tuu n kuun daar. 6N sii yɔɔ yeene nan n mɔk mɔnii, kimaan n dudukit beerin daa kur nan n ki biir siari.

7Binba kur tee n datai ki kɔn nanin na, bin la tubdatu nan toonbiit damm na. 8Dindann boor bee ki toonbiit damm mɔki, yoo nba ki Yennu tan saa boi bi manfoor po na? 9Yennu saa gbat bi mɔnii, yoo nba ki daamii baariba-a? 10Bi bo sii loon parpeenn nba ki u teemm nae, ki meiɔ yoo kur.

11Ŋaant ki man wanna Yennu paŋ yabint nba tee biaŋinba, ki bia kat wanna Yabint Yennu nba lor biaŋinba. 12Ŋaan i poŋ la linba kur ki u tuma, ki bee teen ki i piak baryana na?

13Ki Sofar jiin a: Yabint Yennu nba daar tondamm nan toonbiit damm tuba biaŋinbae na. 14Bi saa fit mar waas bonchiann, ŋaan bi tan saa kpi bi kur tɔbii nie, koo bi waas tan kii di gboot. 15Ki binba saa tenn na, yiariie saa kpib, ki bi pakɔi tan kan mɔ fabin bi kuun po gbaa. 16Toonbiit damm na tan sii mɔk likirii nba ki bi kan fit kan, ki bia sii mɔk liant bonchiann, 17ŋaan niŋanɔe tan saa liar, ki niburchimɔ n yent u likirii maŋ. 18Toonbiit damm na maa ŋei, ki li tee nan nanaat gbandiat nae, koo ki tee nan sukir nba ki kpaguurɔ be li ni na. 19Toonbiit damm maŋ tan saa dɔɔr gɔɔn ki bi mɔkint na be-e, bi-i taŋi fiir yoo nba, bin ji got kɔŋ bi mɔkint maŋ. 20Jaŋmaanii tan saa kpirib nan nyunmɔnn nba tuu sik biaŋinba nae, ki wouŋ n pebirib nyiɔk ki yaat namm. 21Yondo po wouŋ nae saa pebir ki nyinnib bi ŋei ni; 22ki li saa da gar bi paak, ki kan tinib ninbaauk, ki bi lek sii koor a bin chiar paak. 23Baa sii tiin na, wouŋ na fuur sii waa beerib, ki jeentib nan biiru paŋ.