1Ki Job jiin a: 2Nn, yimme piak ki teen niib. Li-i tee ki i kpo, yanfoon mun saa kpoe. 3Ŋaan n mɔk yan nan yaa mɔk nae. I ki cheemi. Sɔɔ kur mi linba kur ki i yet na. 4Ki n yɔɔsnba gbaa laan mɔtana. Bi laame, ŋaan ki n be fanu, ki ki mɔk bisiati; yosau din be ki Yennu gat n miaru. 5Yaa ki mɔk daamii nae, ki i laan, ki liat nirɔ nba yaa wun baa na. 6Ŋaan nanyukii nan binba ki mi Yennu na be parmaasir nie, ki bi yennii tee panii nba ki bi mɔk na.

7Nɔɔnii nan bonkobit gbaa, ŋaan bi mɔk linba ki bi saa fit wanna. 8Boin bonfoa nba be tingbouŋ na paak, nan nyun ni bonfoa na, ki bin tura yanfoon. 9Bi kura mi nan Yennu jii u yiikooe ki namm. 10Yennu-e ŋmakitir u naamii manfoa; ki nisaarik kur manfoor be ŋɔɔ Yennu yiikoo ni. 11A lamm nba bant jeet manu biaŋinba na, nnae ki a tuba gbia maan.

12-13Nikpera mɔk yanfoon, ŋaan Yennu-e mɔk yanfoon nan paŋ. Nikpera sub, ŋaan Yennu sub ki mɔk paŋ ki tuun u toona. 14Li-i tee ki Yennu bet yoo nba, ŋmee be ki saa fit ŋamm maa? ki ŋmee bia saa fit fat daanɔ nba ki Yennu kɔɔnɔ dansariki? 15Yennu-i soor saak yoo nba, yonkoonin tuu baare, ki wuu taŋi ŋaa saak yoo nba, nyunmɔnn n pubir. 16Yennu paar, ki nyant yoo kur; ki binba ki bi kpannib na, nan kpinkpannii damm kur be u paŋ nie. 17U nyint doo diara yanfoon, ki bia te tɔɔndamm na tuun nan jatit na. 18U liatir kpanbara, ki teeb yommii. 19U sikint mannteeb nan niib nba be paŋ ni. 20Ki kpaanteeb nba ki niib teemm yada na, ki u loont bi mɔi, ki nyint nikpera na yanfoon. 21Ki binba be paŋ ni na, ki u dintib fei, ki bia gɔi doo diara yiikoo, 22ki te yentu saa bunbɔnn nba naan kpeentiŋ na ni. 23U teen digbana paŋ nan yabint, ŋaan u tuu tan te ki bin nyannibe ki bia biirib, 24ki te digbana tɔɔndamm na kpantir jatit, ki te li ŋmatib, ki bi lin lintir 25ki turin bunbɔnn ni, ki lian nan dayibira na.