Bildad mɔmaan

1Tɔn, ki Bildad, wunba tee Sua booru ni nirɔ na, jiin a: 2A saa pak li mɔbonbooru ki lin wei nlee? A mɔbona tee nan wouŋ nba da ki gaar nae. 3Yennu ki lebitir barmɔnii, u ki gbaar nan wun tun linba ŋani. 4A waas na sii tun yanbɔmme ki biir Yennu; li paake ki u dat bi tuba laa jaŋib biaŋinba. 5Ŋaan ŋmantir ki barin Yabint Yennu. 6Li-i tee ki a mantik tee niŋanɔ ki tee kasii, ŋann Yennu saa baar ki somma, ki bia fiin a ŋaak, ki li tee a paatii. 7Ki mɔkint nba kur ki a kɔŋ na kii tee siar, li kan yekin nan linba ki Yennu saa ŋamm ki tura na.

8Boin ti yeejamm nba din gar na, ki laan bi baanba din tumii bee, 9kimaan bi marit wonne, ki ti ki mi siari, ki daa nba ki ti mɔk tingbouŋ na paak tee nan yunyuŋ nae. 10A ŋaan ki yaayoo ni yandamm na n wanna; a gbiint baa saa yeta linba a:

11“Gartuut kan fit set siaminba ki nyun kaa. A kan ban lar siaminba ki bakir kaa. 12Ki li-i tee nyun na tan fɔɔri, ŋanne tuu sint koor, ki ki kpaat jaŋ nan bin chɔɔr ki tun nann toonn. 13Niib nba ki mi Yennu tee nan gartuut na nae; baa ki mi Yennu na, bi ki mɔk dindanni. 14Bi dindann tee na poruk ŋmiiuk nae. 15Li-i tee ki bi deen poruk ŋmiiuk paak, li saa fit diaba-a? Li-i tee ki bi bib soor gunguŋ, li saa fit sommib ki bin seta-a?”

16Toonbiit damm kpaatire nan mɔɔt nba ki yonnu nyi li paak na, ki bia tee nan mɔɔt nba tuu lat kpaab kur po na. 17Ki bi jiina tuu lor lint tana, ki soor tann kur kenken, 18ŋaan fi-i jikii ŋabirir, sɔɔ ji kan ban bann nan li bo see leŋi. 19Nn, kpinkpammuk nba kur ki toonbiit damm mɔke na, nigamme ji tuu baar ki gaar bi setu.

20Ŋaan Yennu kan ban nyik binba waau fanu na, koo ki tur toonbiit damm na sommiri. 21U saa te ki a la laat, ki bia hoot, 22ŋaan te fei n di damm nba ki loon a maan na, ki tondamm na ŋei saa boont.