1Ki Job jiin a: 2Li-i tee ki n daamii nan n parbiir kpiasu bo mɔk bikinuie, 3li kpiasu bo sii yab ki gar mɔkgbeŋir ni tanbiiniiwa. Li paak, a daa te ki n mɔbongbeŋa na n yaar litani. 4Yabint Yennu yekin peenii, ki li lɔbii na saat n gbanant kur powa. Yennu-e bir biiru na chinchuuntuk a lin biirin.

5Boŋ-i ŋman mɔɔt, li tuu manɔe, ki naab-i ŋman sinkpinkoont, u tuu ŋmine. 6Ŋmee saa fit di jesisabuk nba ki yaarin kaa leŋi? Manlante be jenpeenn ni? 7N ki mɔk niɔŋ nan li jebooru, ki mi-i dii linba na kur, n par paak tuu pukire.

8Bee Yennu kan turin linba ki n boi li po na? Bee teen ki u kan jiin n miaru? 9N sunman wun bo kpimi. 10Li-i tee ki n bo bann nan u saa tun nna, n bo sii yuuk ki mobite nan kpinkpammuk, n bo kan boi n gbananyekitir nba tee biaŋinba. N mi nan Yennu tee kasiie. N ki ban yêt u sennii. 11Panboorbee ki n mɔki, ki li saa te ki n be n manfoor ni? Bee paake ki n sii be manfoor ni, yoo nba ki dindann kaa na? 12Yennu jii tanne ki namimi-i? N gbanant tee kutmɔnte-e? 13Pansiar ki be ki n saa fit tinn n mɔŋ, siar boor ki be ki n saa saan boi sommir po.

14Mi-i be daamii na booru nie, ki n loon yɔnanmɔnii, laa lek tee ki n yêt Yennu koo ki n ki yêtɔ. 15Ŋaan yimm nba tee n yɔɔsnba na tee kpinkpannii damm, nan bunii nba tuu koon biaŋinba, yoo nba ki saak ki baa nae. 16Ki sakaana nan nyuntana kɔr bunii na, 17ŋaan yonnu-i nyikint, lin bot, ki bunii na n biar dɔɔ yann, ki koon. 18Ki niib bonchiann kpaan nyun ki bot, ki lin lintir kunkoouk paak ki tan kpo. 19Ki niib bonchiann nyii Sieba nan Tema doi ni ki kpaanir, 20ki bi dindann na kpo bunkoonii na boor. 21I tee nan bunii maŋ nae n boor. I la linba baarima, ki ŋmat jir poor nan jaŋmaanii. 22N ban boi-i maa i turin piinii, koo i tur sɔɔ fobit piinii n paaki, 23koo i tinnin ki n nyi dataak, koo tondaanɔ nuu ni-i?

24Tɔn, ii tumiin, ki wannin n biit nba tee linba, ki n sii tee soon nna, ki gbiint turi. 25Barmɔnpakue lebitir dudukit, ŋaan i yeen baryanae na, 26ki dukii nan n ki piak siari, ŋaan wouŋo da; ki bee teen ki i jiint n mɔbona nba kaa dindann na? 27I tan saa tɔ naatɔɔte ki fit gaar kpeebii, ki kpar i yɔnanmɔnii ki mɔkit. 28Gotir n numpo, n kan faar faaki. 29I mantik dukin fɔkit bonchiann; nyikin ki daa fa faak ki paami. I daa biirimi; n mɔk mɔnii, 30ŋaan ki i dukii nan n faa faake. I dukii nan n kan fit bɔkit bonŋann nan bonbiiri.