او هُداوند! بێتئوار مبئے
اَساپئے زَبور. سئوتے.
1او هُدا! بێتئوار مبئے،
هامۆش مبئے و هُشکا مَنِند، او هُدا!
2بچار که تئیی دژمن چه پئیما گُرّنت و
چه تئو نپرت کنۆکانی سر چۆن بُرز اِنت.
3تئیی کئومئے هلاپا په چالاکی پندلَ سازنت و
تئیی گرانکَدرێنانی هلاپا شئور و سلاهَ کننت.
4گوَشنت: «بیاێت گار و گُمسارِشَ کنێن که کئومے مماننت و
اِسراییلئے نام په یاتێا هم پَشت مکپیت.»
5په همدلی شئورِش کرتگ و
تئیی هلاپا اَهدے بستگِش.
6اِدومی و اِسماییلی،
موآبی و هاگاری،
7گێبالی، اَمّونی و اَمالیکی،
پیلیستی و سورئے نندۆک،
8آشوری هم گۆن آیان همراه اَنت و
په لوتئے چُکّان باسکے بوتگاَنت. اۆشت...
9گۆن آیان هما پئیما بکن که تئو گۆن میدیانا کرت،
گۆن سیسِرا و یابینا، کیشونئے کئورئے کرّا،
10که اِندۆرا تباه بوتنت و
زمینئے کَد و سَمات بوتنت.
11اِشانی سرداران اُرێب و زِهێبئے پئیما کن،
شهزادگانِش زِبَه و زَلمونّائے ڈئولا،
12که گوَشتگاَتِش: «بیاێت هُدائے چراگاهان په زۆرَ گِرێن.»
13او منی هُدا! اِشان دَنزێئے پئیما بال دئے،
چۆ که پَلارے، گواتئے دێما.
14اَنچش که آس جنگلا سۆچیت و
کۆهان مانَ داریت،
15گۆن وتی توپّانان رَندااِش کپ و
گۆن سیَهگواتان بتُرسێنِش،
16دێمااِش چه شرما سیاه کن
تانکه تئیی نامئے شۆهازا ببنت، او هُداوند!
17شرمسار بات و اَبدی تُرسێا کپاتنت،
رُسوا بات و بمِراتنت.
18بِلّ بزاننت که تئیی نام هُداوند اِنت و
تهنا تئو، او بُرزێن اَرشئے هُدا،
سجّهێن زمینئے سرا هاکمیَ کنئے.