1ܡܘܼܚܸܒܝܼ̈، ܠܵܐ ܗܲܡܸܢܝܼܬܘܿܢ ܠܟܠܔ ܚܕܵܐ ܪܘܼܚܵܐ، ܐܸܠܵܐ ܨܲܚܨܹܝܡܘܼܢ ܠܪ̈ܘܼܚܹܐ ܕܚܵܙܹܝܬܘܿܢ ܕܐܸܢ ܡ̣ܢ ܐܲܠܵܗܵܐ ܝܢܵܐ، ܣܵܒܵܒ ܪܵܒܵܐ ܢܒ݂ܝܼܹ̈ܐ ܕܲܓܵܠܹ̈ܐ ܦܠܝܼܛܹܐ ܝܢܵܐ ܓܵܘ ܥܵܠܡܵܐ. 2ܒܐܵܗܵܐ ܝܵܕܥܝܼܬܘܿܢ ܪܘܼܚܵܐ ܕܐܲܠܵܗܵܐ: ܟܠܔ ܪܘܼܚܵܐ ܕܡܵܘܕܝܼܵܐ ܕܝܼܫܘܿܥ ܡܫܝܼܚܵܐ ܗܘܹܐ ܠܹܗ ܒܲܪܢܵܫܵܐ، ܡ̣ܢ ܐܲܠܵܗܵܐ ܝܠܵܗ̇؛ 3ܘܟܠܔ ܪܘܼܚܵܐ ܕܠܵܐ ܡܵܘܕܝܼܵܐ ܒܝܼܫܘܿܥ، ܠܹܐ ܝܠܵܗ̇ ܡ̣ܢ ܐܲܠܵܗܵܐ. ܐܵܗܵܐ ܝܠܵܗ̇ ܪܘܼܚܵܐ ܕܡܫܝܼܚܵܐ ܕܲܓܵܠܵܐ، ܕܫܡܝܼܥ ܠܵܘܟ݂ܘܿܢ ܕܒܹܐܬܵܝܵܐ ܝܠܵܗ̇، ܘܐܵܕܝܼܵܐ ܓܵܘ ܥܵܠܡܵܐ ܝܠܵܗ̇. 4ܐܲܚܬܘܿܢ ܒܢܘܿܢܹ̈ܐ، ܡ̣ܢ ܐܲܠܵܗܵܐ ܝܬܘܿܢ ܘܓ݂ܠܝܼܒܵܝ ܠܵܘܟ݂ܘܿܢ، ܣܵܒܵܒ ܗ̇ܘ ܕܝܼܠܹܗ ܓܵܘܵܘܟ݂ܘܿܢ ܒܘܼܫ ܓܘܼܪܵܐ ܝܠܹܗ ܡ̣ܢ ܗ̇ܘ ܕܝܼܠܹܗ ܓܵܘ ܥܵܠܡܵܐ. 5ܐܵܢܝܼ ܡ̣ܢ ܥܵܠܡܵܐ ܝܢܵܐ. ܒܘܼܬ ܐܵܗܵܐ ܡܸܢܕܝܼܵܢܹ̈ܐ ܕܥܵܠܡܵܐ ܟܹܐ ܗܲܡܙܸܡܝܼ ܘܥܵܠܡܵܐ ܟܹܐ ܫܵܡܹܥ ܐܸܠܵܝܗ‌ܝ. 6ܐܲܚܢܲܢ ܡ̣ܢ ܐܲܠܵܗܵܐ ܝܘܲܚ، ܘܗ̇ܘ ܕܝܵܕܹܥ ܠܐܲܠܵܗܵܐ ܟܹܐ ܫܵܡܹܥ ܐܸܠܲܢ، ܐܝܼܢܵܐ ܗ̇ܘ ܕܠܹܐ ܝܠܹܗ ܡ̣ܢ ܐܲܠܵܗܵܐ ܠܹܐ ܫܵܡܹܥ ܐܸܠܲܢ. ܒܐܵܗܵܐ ܟܹܐ ܦܵܪܫܲܚ ܪܘܼܚܵܐ ܕܫܪܵܪܵܐ ܡ̣ܢ ܪܘܼܚܵܐ ܕܚܸܠܛܵܐ.

7ܡܘܼܚܸܒܝܼ̈، ܫܒ݂ܘܿܩܘܼܢ ܕܡܲܚܸܒܲܚ ܚܲܕ ܠܗ̇ܘ ܐܚܹܪܢܵܐ، ܣܵܒܵܒ ܚܘܼܒܵܐ ܡ̣ܢ ܐܲܠܵܗܵܐ ܝܠܹܗ؛ ܘܟܠܔ ܡ̇ܢ ܕܟܹܐ ܡܲܚܸܒ، ܡ̣ܢ ܐܲܠܵܗܵܐ ܦܝܼܫܵܐ ܝܠܹܗ ܝܠܝܼܕܵܐ ܘܟܹܐ ܝܵܕܹܥ ܠܐܲܠܵܗܵܐ. 8ܗ̇ܘ ܕܠܵܐ ܡܲܚܸܒ، ܠܹܐ ܝܵܕܹܥ ܠܐܲܠܵܗܵܐ، ܣܵܒܵܒ ܐܲܠܵܗܵܐ ܚܘܼܒܵܐ ܝܠܹܗ. 9ܒܐܵܗܵܐ ܐܘܼܪܚܵܐ ܦܝܼܫ ܠܹܗ ܓܸܠܝܵܐ ܚܘܼܒܵܐ ܕܐܲܠܵܗܵܐ ܠܟܸܣܠܲܢ: ܕܫܘܼܕܸܪܹܗ ܠܒܪܘܿܢܹܗ ܝܼܚܝܼܕܵܝܵܐ ܠܕܘܼܢܝܹܐ ܕܚܵܝܲܚ ܒܝܼܹܗ. 10ܐܵܗܵܐ ܝܠܹܗ ܚܘܼܒܵܐ، ܠܵܐ ܕܐܲܚܢܲܢ ܡܘܼܚܸܒ ܠܲܢ ܠܐܲܠܵܗܵܐ، ܐܸܠܵܐ ܕܗ̇ܘ ܡܘܼܚܸܒ ܠܹܗ ܐܸܠܲܢ ܘܫܘܼܕܸܪܹܗ ܠܒܪܘܿܢܹܗ ܚܘܼܣܵܝܵܐ ܡ̣ܢ ܓܹܒܵܐ ܕܚܛܝܼܵܬܲܢ̈. 11ܡܘܼܚܸܒܝܼ̈، ܐܸܢ ܐܲܠܵܗܵܐ ܗܵܕܟ݂ܵܐ ܡܘܼܚܸܒ ܠܹܗ ܐܸܠܲܢ، ܐܘܼܦ ܐܲܚܢܲܢ ܘܵܠܹܐ ܝܠܵܗ̇ ܕܡܲܚܸܒܲܚ ܚܲܕ ܠܗ̇ܘ ܐܚܹܪܢܵܐ. 12ܐܘܼܦ ܚܲܕ ܗܲܪ ܠܹܐ ܝܠܹܗ ܚܸܙܝܵܐ ܠܐܲܠܵܗܵܐ، ܐܝܼܢܵܐ ܐܸܢ ܡܲܚܸܒܲܚ ܚܲܕ ܠܗ̇ܘ ܐܚܹܪܢܵܐ، ܐܲܠܵܗܵܐ ܒܸܬ ܥܵܡܹܪ ܒܝܼܲܢ ܘܚܘܼܒܹܗ ܒܸܬ ܦܵܐܹܫ ܡܘܼܟܡܸܠܵܐ ܒܝܼܲܢ. 13ܒܐܵܗܵܐ ܟܹܐ ܝܵܕܥܲܚ ܕܒܸܥܡܵܪܵܐ ܝܘܲܚ ܒܝܼܹܗ ܘܗ̇ܘ ܒܝܼܲܢ، ܣܵܒܵܒ ܝܘܼܗܒܹܠܔ ܠܹܗ ܐܸܠܲܢ ܡ̣ܢ ܪܘܼܚܹܗ. 14ܘܐܲܚܢܲܢ ܚܙܹܐ ܠܲܢ ܘܒܝܼܵܗܒ݂ܵܐ ܝܘܲܚ ܣܵܗܕܘܼܬܵ‌ܐ ܕܒܵܒܵܐ ܫܘܼܕܸܪܹܗ ܠܒܪܘܿܢܵܐ ܕܗܵܘܹܐ ܦܵܪܘܿܩܵܐ ܕܥܵܠܡܵܐ. 15ܟܠܔ ܡ̇ܢ ܕܡܵܘܕܹܐ ܕܝܼܫܘܿܥ ܒܪܘܿܢܵܐ ܕܐܲܠܵܗܵܐ ܝܠܹܗ، ܐܲܠܵܗܵܐ ܟܹܐ ܥܵܡܹܪ ܒܝܼܹܗ ܘܗ̇ܘ ܒܐܲܠܵܗܵܐ. 16ܘܐܲܚܢܲܢ ܝܕܝܼܥ ܠܲܢ ܘܗܘܼܡܸܢܲܢ ܚܘܼܒܵܐ ܕܐܝܼܬ ܠܹܗ ܐܲܠܵܗܵܐ ܠܟܸܣܠܲܢ. ܐܲܠܵܗܵܐ ܚܘܼܒܵܐ ܝܠܹܗ، ܘܗ̇ܘ ܕܥܵܡܹܪ ܒܚܘܼܒܵܐ، ܒܸܥܡܵܪܵܐ ܝܠܹܗ ܒܐܲܠܵܗܵܐ ܘܐܲܠܵܗܵܐ ܒܝܼܹܗ. 17ܒܐܵܗܵܐ ܦܝܼܫ ܠܹܗ ܡܘܼܟܡܸܠܵܐ ܚܘܼܒܵܐ ܒܝܼܲܢ، ܕܗܵܘܹܐ ܠܲܢ ܗܹܒ݂ܝܼ ܒܝܵܘܡܵܐ ܕܕܝܵܢܬܵ‌ܐ، ܣܵܒܵܒ ܟܡܵܐ ܕܝܼܘܲܚ ܓܵܘ ܐܵܗܵܐ ܕܘܼܢܝܹܐ، ܐܲܝܟ݂ ܡܫܝܼܚܵܐ ܝܘܲܚ. 18ܠܲܝܬ ܙܕܘܼܥܬܵ‌ܐ ܒܚܘܼܒܵܐ، ܐܝܼܢܵܐ ܚܘܼܒܵܐ ܓܡܝܼܪܵܐ ܟܹܐ ܛܵܪܹܕ ܠܵܗ̇ ܙܕܘܼܥܬܵ‌ܐ، ܣܵܒܵܒ ܒܙܕܘܼܥܬܵ‌ܐ ܐܝܼܬ ܓ̰ܘܼܢܓ̰ܵܪܵܐ، ܘܐܢܵܫܵܐ ܕܙܵܕܹܥ ܠܹܐ ܝܠܹܗ ܦܝܼܫܵܐ ܡܘܼܓܡܸܪܵܐ ܒܚܘܼܒܵܐ. 19ܐܲܚܢܲܢ ܟܹܐ ܡܲܚܸܒܲܚ ܣܵܒܵܒ ܐܲܠܵܗܵܐ ܩܲܕܡܵܝܬܵ‌ܐ ܡܘܼܚܸܒ ܠܹܗ ܐܸܠܲܢ. 20ܐܸܢ ܚܲܕ ܐܵܡܹܪ: ”ܐܵܢܵܐ ܟܹܐ ܡܲܚܸܒܸܢ ܠܐܲܠܵܗܵܐ،“ ܐܝܼܢܵܐ ܣܵܢܹܐ ܠܐܲܚܘܿܢܘܼܗ‌ܝ، ܕܲܓܵܠܵܐ ܝܠܹܗ. ܣܵܒܵܒ ܐܸܢ ܚܲܕ ܠܵܐ ܡܲܚܸܒ ܠܐܲܚܘܿܢܘܼܗ‌ܝ ܕܚܸܙܝܹܗ ܝܠܹܗ، ܠܹܐ ܡܵܨܹܐ ܡܲܚܸܒ ܠܐܲܠܵܗܵܐ ܕܠܹܐ ܝܠܹܗ ܚܸܙܝܹܗ. 21ܘܐܵܗܵܐ ܦܘܼܩܕܵܢܵܐ ܐܝܼܬ ܠܲܢ ܡܸܢܹܗ: ܗ̇ܘ ܕܡܲܚܸܒ ܠܐܲܠܵܗܵܐ ܘܵܠܹܐ ܝܠܵܗ̇ ܕܡܲܚܸܒ ܐܘܼܦ ܠܐܲܚܘܿܢܘܼܗ‌ܝ.