1Izyraeu tõ tuisary tõ moroto rokẽ kynexine toto Jerusarẽ po. Imehnomo a imenekatoh tomase, 10me tapyi tõ ahtao toiro tapyi taõkõ menekatohme ytotohme Jerusarẽ pona osesaritohme, Ritonõpo nymenekahpyry tosaryme. Imehnõ nexiase imehnõ pata tõ po, pata tõ pitiko po roropa. 2Jerusarẽ po toytory se exiketõ ahtao, kure rokẽ tyripose toto morotona imoihmãkomo a.

3Izyraeu tõ nexiase imehnõ pata tõ po, oturuketõ roropa te, rewita tomo te, Ritonõpo Tapyĩ poko erohketõ te, Saromão poetory tõ pakomotyamo, enara. Tosarykõ po toh nexiase.

Juta tõ tuisary tõ, Jerusarẽ po exiketõ ynara nexiase:

4Juta pakomotyamo:

Ataia, Uzia mũkuru, Zakaria pary. Itamuru tõ kynexine: Amaria te, Sepatia te, Maarareu, enara, Pereze, Juta mũkuru pakomotyamo;

5Maaseia, Paruke mũkuru, Kou-Hoze pary. Itamuru tõ kynexine: Hazaia te, Ataia te, Joiaripe te, Zakaria, enara, Sera, Juta mũkuru pakomotyamo.

6Pereze pakomotyã 468me orutua kõ nexiase, soutatume exiketomo.

7Pẽjamĩ pakomotyamo: Saru, Mesurã mũkuru, Joete pary. Itamuru tõ kynexine Petaia te, Koraia te, Maaseia te, Itieu te, Jesaia, enara;

8Kapai roropa Sarai maro, Saru ekyry tomo, enara.

Atapona 928me orutua komo, Pẽjamĩ tomo toh nexiase Jerusarẽ po; 9Joeu, Zikiri mũkuru toto tuisaryme nexiase. Juta, Senua mũkuru tuisa akorehmaneme nexiase.

10Oturuketomo:

Jetaia, Joiaripe mũkuru, Jakĩ maro;

11Seraia, Hiukia mũkuru, Mesurã pary. Itamuru tõ kynexine: Zatoke te, Meraiote te, Aitupe, oturuketõ tuisary Ritonõpo Tapyĩ tao. 12Atapona 822me orutua komo, erohketõme toh nexiase Ritonõpo Tapyĩ tao;

Ataia, Jeroão mũkuru, Peraria pary. Itamuru tõ kynexine Anazi te, Zakaria te, Pasua te, Maukia, enara. 13Atapona 242 orutua kõ nexiase, typoenoke exiketomo;

Amasai, Azareu mũkuru, Azai pary. Itamurukõ kynexine Mexiremote te, Imea, enara. 14128me orutua kõ nexiase, oxiekyry tomo, soutatu tõ orẽpyra exiketomo. Toto tuisary nexiase Zapitieu, orẽpyra exiketõ ekyry. 15Rewita tomo:

Semaia, Hasupe mũkuru, Azarikã pary. Itamuru tõ kynexine Hasapia te, Puni, enara;

16Sapetai te, Jozapate roropa rewita tõ emese kure exiketomo. Erohketõ tuisaryme toh nexiase Ritonõpo Tapyĩ poko jarao.

17Matania, Mika mũkuru, Zapiti pary, Asape ekyryme nexiase. Ritonõpo Tapyĩ tao eremiaketõ tuisaryme nexiase, toto eremiary poko, “Kure mase, Ritonõpo,” kary poko eya xine Ritonõpo eahmaryme;

Pakepukia, Matania akorehmaneme nexiase.

Apata, Samua mũkuru, Karau pary. Jetutũ ekyryme nexiase ynororo.

18Atapona 284 rewita tõ nexiase pata kurã Jerusarẽ po.

19Ritonõpo Tapyĩ omõtoh erase tomo: Akupe te, Taumõ maro, jekyry tõ maro: 172 orutua kõ atapona.

20Imehnõ Izyraeu tõ nexiase tosarykõ po, imehnõ pata tõ po, pata pitiko po roropa Juta nonory po, imehnõ oturuketomo te, imehnõ rewita tomo, enara. 21Ritonõpo Tapyĩ poko erohketõ toh nexiase Opeu po, Jerusarẽ po. Toerohtohkõ tuisary tõ nexiase Zia te, Kixipa, enara.

22Mokaro rewita tõ Jerusarẽ po exiketõ tuisary nexiase Uzi, Pani mũkuru, Hasapia pary. Itamurukõ kynexine Matania te, Mika, enara. Asape ekyryme nexiase ynororo. Mokaro nexiase eremiaketomo, eremiatoh rinanomo, Ritonõpo eahmary poko Itapyĩ tao. 23Tuisa konõto nyripohpyry nexiase, imoihmãkõ akorehmananõ atakenaka etyorõmãko mã toto kokoro rokẽ eremiatoh poko, Ritonõpo eahmary poko Itapyĩ tao.

24Petaia, Mesezapeu mũkuru, Zera ekyryme, Juta parỹpyryme roropa toerohse Izyraeu tõ akorehmaneme, Perexia tuisary konõto ẽpataka.

25Izyraeu tõ tuhke toh nexiase pata tõ po tutupikõ pũto. Juta tõ nexiase Kiriate-Arapa po te, Tipõ po te, Jekapazeeu te, pata tõ pitiko po roropa, moro pata tõ pũto. 26Tõsesarise toto: Jesua po te, Morata po te, Pete-Parete po te, 27Hazaa-Suau po te, Peresepa po te, pata pitiko tõ po roropa moro pata tõ zomye. 28Zikirake po toh nexiase te, Mekona po te, pata pitiko tõ po roropa moro pata tõ pũto te, 29Ene-Rimõ po te, Zora po te, Jaramute po te, 30Zanoa po te, Aturã po te, pata pitiko tõ po roropa moro pata tõ pũto. Pata Rakixi po toh nexiase te, tutupi tõ po roropa ameke pyra; pata Azeka po te, pata pitiko tõ po roropa moro pata pũto. Ynara nexiase, Juta tõ moroto ehse toh nexiase Peresepa poe ikurenaka, jakanahmã Hinõ pona inikahpozakoxi.

31Pẽjamĩ tõ nexiase moroto Kepa poe inikahpozakoxi te, Mikima pona te, Aia pona te, Peteu pona te, pata tõ pitiko po roropa moro pata tõ pũto te, 32Anatote po te, Nope po te, Anania po te, 33Hazoa po te, Rama po te, Kitaĩ po te, 34Hatite po te, Zepoĩ po te, Neparate po te, 35Rote po te, Ono maro, jakanahmã Emese kure Erohketõ esary po. 36Toitoine rewita tõ roropa, Juta tõ nonory po aepyhpyã taropose toh nexiase Pẽjamĩ tõ nonory pona.