1Morarame pata apuru tyrise ahtao te, omõtoh tonõ apuru tõ tyrise roropa ahtao esaka te, soutatu tõ tymenekase ahtao omõtoh erase tõ te, eremiaketõ, rewita tõ roropa toerohtohkõ poko tyrohmanohpose toto ahtao, 2orutua kõ asakoro tymenekase ya pata Jerusarẽ tuisaryme toto ehtohme: jakorõ Hanani te, Hanania, soutatu tõ tuisary, tapyi jamihmã tao. Ritonõpo omipona exiketyme kynexine, zae exiketyme roropa, imehnõ motye. 3Mokaro asakoro turuse ya, pata Jerusarẽ omõtoh etapuruhmakatohme xixi tõnuhse ahtao rokene, axitũ toehpitose ahtao. Mame toto a apurutohme ropa kokonie pukuro, tysorotohtose ehtohme, moroto ro erase tõ ahtao. Imehnõ erase tõ tymenekapose eya xine ahno Jerusarẽ põkõ rãnao, eraseme toto ehtohme osa tõ tao te, imehnõ roropa eraseme ehtohme tytapyĩkõ etonie.

4Mame pata Jerusarẽ zumo nexiase, yrome pata põkõ tuhke pyra nexiase. Tuhke pyra roropa tapyi tõ nexiase tukurãkase ropa exiketomo. 5Ritonõpo a osenetupuhtoh tyrise ukurohtaka ahno enehpotohme oximõme, tuisa tõ maro, tamuximãkõ maro, toto ekyry tõ esetykõ enetohme. Pape enease ropa tymerose, apitoryme aehtyã ropa Papironia poe esetykomo. Ynara tymerose moro pape pokona:

6Izyraeu tõ tarose ahtao Napukotonozo a typoetoryme Papironia pona, Juta põkõ tuhke tarose eya. Mokaro tooehse ropa Jerusarẽ pona Juta patary tõ pona roropa, tosaka xine. 7Ituisary tõ ynara nexiase: Zoropapeu te, Jozue te, Neemia te, Azaria te, Raamia te, Naamani te, Moatekai te, Piusã te, Mixiperete te, Pikiwai te, Neum te, Paana, enara.

8Sero nase tymerose atakenaka, Izyraeu tõ oxiekyry tõ, Papironia poe aehtyamo, tuisa tõ esety tymerose, atapona tuhke imaro xine exiketõ roropa:

Paro tomo 2.172me, 9Sepatia tomo 372me, 10Ara tomo 652me, 11Paate-Moape (Jesua pakomotyã Moape roropa) 2.818me, 12Erão tomo 1.254me, 13Zatu tomo 845me, 14Zakai tomo 760me, 15Pinui tomo 648me, 16Pepai tomo 628me, 17Azakate tomo 2.322me, 18Atonikã tomo 667me, 19Pikiwai tomo 2.067me, 20Atim tomo 655me, 21Atea tomo (esety akorõ Ezekia) 98me 22Hasũ tomo 328me, 23Pesai tomo 324me, 24Haripe tomo 112me, 25Kipeão tomo 95me.

26Tooehse ropa ahno, itamuru tõ ynara pata tõ po nexiase: Perẽ po, Netopa po roropa 188me. 27Anatote po 128me, 28Pete-Azamawete po 42me, 29Kiriate-Jearĩ po, Sepira po, Peerote po roropa 743me, 30Rama po, Kepa po roropa 621me, 31Mikima po 122me, 32Peteu po Ae maro 123me, 33Nepo po 52me, 34Imepỹ Erão po 1.254me, 35Harĩ po 320me, 36Jeriko po 345me, 37Rote po, Hatite po Ono maro 721me, 38Senaa po 3.930me.

39Sero nase oturuketõ ekyry tõ aehtyamo Papironia poe: tuisa esety, imaro xine exiketõ tuhke exiry, enara: Jetaia tomo (Jesua pakomotyamo) 973me, 40Imea tomo 1.052me, 41Pasua tomo 1.247me, 42Harĩ tomo 1.017me.

43Sero nase rewita tõ oxiekyry tõ aehtyamo Papironia poe Jesua tomo, Katamieu tõ maro (Hotawia pakomotyamo) 74me, 44Rue etonanomo, eremiaketõ roropa, (Asape pakomotyamo) 148me, 45Ritonõpo Tapyĩ omõtoh erase tomo, (Sarũ tõ pakomotyamo, Atea maro, Taumõ maro, Akupe maro, Hatita maro, Sopai maro, enara) atapona 138me toh nexiase.

46Sero nase Ritonõpo Tapyĩ poko erohketõ ekyry tõ, aehtyamo Papironia poe. Tuisa tõ esety tõ tymerose: Zia te, Hasupa te, Tapaote, 47Kero te, Xia te, Patõ te, 48Repana te, Hakapa te, Saumai te, 49Hanã te, Jiteu te, Kaa te, 50Reaia te, Rezĩ te, Nekota te, 51Kazã te, Uza te, Paseia te, 52Pesai te, Meunim te, Nepixĩ te, 53Pakepuke te, Hakupa te, Harua te, 54Pasarite te, Meita te, Harasa te, 55Parako te, Xisera te, Tema te, 56Nexia te, Hatipa, enara.

57Sero nase Saromão poetory tõ ekyry tõ aehtyamo Papironia poe: Tuisa tõ esety rokẽ tymerose: Sotai te, Soperete te, Perita te, 58Jaara te, Tarakõ te, Jiteu te, 59Sepatia te, Hatiu te, Pokerete-Hazepaĩ te, Amõ, enara.

60Atapona mokaro Ritonõpo Tapyĩ poko erohketõ ekyry tõ, Saromão poetory ekyry tõ maro 392me nexiase.

61-62Imehnõ aehtyamo, oxiekyry tõ Teraia tomo, Topia tõ maro te, Nekota tõ maro 642me ahno nexiase, pata tõ Teu-Mera poe, Teu-Harasa poe, Kerupe poe, Atõ poe, Imea poe, enara. Yrome Izyraeu tõme toto ehtoh enetupuhpotoh pyra toh nexiase, Izyraeu pakõme nymyry toto exiry waro ehtohme.

63Oturuketõ ekyry tõ Hopaia tomo, Hakoze tõ maro, Paazirai tõ roropa pape tõ onenepyra toh nexiase tytamurukõ ehtoh waro toto ehtohme. (Mokaro Paazirai tõ tamuru typytase kynexine Paazirai pata Kireate põ ẽxiry maro. Tymeretamuru esety tapoise eya tosetyme.) 64Oturuketõme erohsaromepyra toh nexiase tytamurukõ waro nymyry pyra toexirykõke. 65Oturuketõ napyry kurã, ahno nekarotyã Ritonõpo a onenahpopyra kowenatu nexiase eya xine imepỹ oturukety, imehxo exikety oehtohto, imenekary waro exikety Urim poko, Tumĩ maro.

66Atapona Izyraeu tõ aehtyã 42.360me nexiase. 67Ipoetory tõ atapona 7.337me nexiase. Eremiaketõ 245me nexiase. 68Kawaru tõ 736me nexiase. Mura tomo 245me nexiase. 69Kameru tomo 435me nexiase. Jumẽtu tomo 6.720me nexiase.

70Tuhkãkomo a tytinerũ tokarose akorehmatohme Ritonõpo Tapyĩ ritohme ropa. Uuru tokarose kowenatu a 8,4 kirume te, 50me paxiha tõkehko Ritonõpo eahmary poko ehtohme, oturuketõ zupõ 530me. 71Oxiekyry tõ tamuximãkomo a uuru tokarose Ritonõpo a 168 kirume te, parata roropa 1.257 kirume tokarose eya xine. 72Imehnõ ahno a uuru tokarose 168 kirume te, parata roropa 1.142 kirume te, upo roropa 67me, oturuketõ zupõme.

73Morarame mokaro juteu tõ emero tõsesarise toh nexiase Juta patary tõ po, pata pitiko po roropa. Oturuketõme toh nexiase te, rewita tomo te, Ritonõpo Tapyĩ erase tomo te, eremiaketomo te, ahno rokẽ roropa te, Ritonõpo Tapyĩ poko erohketomo, enara.