1“Onokyroimo Rewiatã apoiry waro mahno oka ke?

Inuru mykyry waro mahno eary ke?

2Eutary aka eunary ae eary riry waro hma,

jematary posohkary waro mahno oka konõto ke?

3Emyhpokapõko ropa nae oya?

‘Ajohpãme samo ypyno exiko,’ ãko nae oya?

4Tõmiry etapõko nae oya toerohtohme opoetoryme, toorikyry ponãmero?

5Imaro osemeikãko mano torõ pitiko maro osemeikary samo?

Oekyme imyhnõko mano opoetory tõ osemeikatohme imaro?

6Mokyro ekamõko mah kana anỹnanomo a?

Ipũ sahkatohme?

7Warata tõ emary waro mahno ipihpyry wotohme?

Zupuhpyry pokona tuotoh waro mahno pyrou potyry tõ ke kana wotoh samo?

8Ikuhko oemary ke mokyro apory, itemuhmako toiro, moro onyrizomopyra mase,

jũme wenikehpyra exĩko mase moro oesekatopõpyry poko eya.

9“Mokyro ihpory Rewiatã eneryhtao rokẽ oserehnõko ahno mana,

enaroxitapãnõko mana,

epukãko nono pona aorikyhpyry samo.

10Ihtomaryhtao zehno exĩko mana.

Onoky ytõko nae mokyro ẽpataka ikuhtohme?

11Onoky imaro osetapãko nae, osesekapopyra roropa?

Arypyra, osewomara sero nono põkõ mã emero porehme.

12“Seromaroro oturuxi oya onokyroimo Rewiatã axiry tõ poko, zumo aexiry poko te, jamihme aexiry poko, enara.

13Ipihpyry onousaromepyra ahno mana; ipũ eworine.

Mokyro osewomatoh onyposohkasaromepyra roropa mã toto.

14Onoky mokyro mytary mytakapõko nae, mokyro zery taere exikety?

15Ĩpary tupuhtuke tũpore topu samo tyõtose aosewomatohme, tuhke osepokona, zakare puhturu samo.

16Morararo osepokona tõsexihse mã kehko kure samo, tyryrykane omõpyra ehtohme zaka, enara.

17Tõsexihse mã kehko osepokona;

morararo anapiakasaromepyra ahno mana.

18Mokyro ihpory Rewiatã ahtiuh karyhtao ikarany pisarara sã osenẽko mana,

enuru tõ zemime sã exĩko mã kehko xixi tũtary samo.

19Ĩtary ae apoto tũtãko mana ikarany pisarara samo roropa.

20Eunary ae orexĩto tũtãko mana, oripo zopino amoriry tõ zatyry samo.

21Mokyro puu karyhtao apoto zukãko mana,

ĩtary ae apoto tũtãko roropa.

22Ipymyry ao ijamitunuru mana,

ẽmyty eneryhtao enaromỹke exĩko emero porehme mã toto.

23Ipihpyry jamihme, tũpore roropa kurimene samo.

24Ipuropuru topu samo, imehnõ zuno pyra;

tũpore mana topuimo samo.

25Towõse ynororo ahtao jamihme exiketõ oserehnõko mana;

epasaromepyra mã toto.

26Tapema mokyro anakohpyra mana.

Warata, pyrou roropa mokyro onuopyra mã kehko.

27Eya kurimene jamihme pyra mana, tiriiku zoko samo, metau eya wewe motasẽ samo.

28Pyrou tõ mokyro onerehpyra mana.

Topu tõ tomase ahtao epona otyro akumuru sã rokene eya.

29Etaetaparyhtao kaparu ke tiriiku zoko ke etapatoh sã rokẽ mana eya.

Eunohnõko mana ahno a warata tõ emaryhtao epona.

30Zuakuru mã toxiõtose ipuhturu tõ ke, oripo ehmosẽ sã, suisuime mã kehko.

Morohne ke ikurepato ahkãko mana

kurimene risẽ ke samo.

31Tuna zueme exikety kurokuro kamexipõko mana oripo ao samo, oriu samo kurokuro karyhtao oripo konõto ao.

32Aytoryhtao tuna kuao, esemary saerehkaneme sã exĩko mana,

tuna konõto akurome tyrĩko mana.

33Onoky sã nã ynororo?

Imepỹ ipanõ pyra mana, tyrise ynororo imehnõ zuno pyra aehtohme.

34Imehnõ enẽko mã mokyro emero popyra exiketõ samo.

Onokyro tõ rãnao epyrypaketõ maro ynoro rokẽ tuisamehxo osekarõko mana.”