2“Tuaro exiketõ sã oturũko matose.

Otarame toorihse awahtao xine

tuaro ehtoh enahnõko mana amaro xine.

3Yrome ywy roropa zuaro ase,

asã xine ase.

Onoky senohne waro pyra hnae?

4Jeunohnõko jepe tõ mana, ywy, ajohpe pyra exikety, zae exikety.

Oturuase Ritonõpo a,

mame tozuhse ywy eya.

5Etuarimaketõ poihtõko towomaneke exiketõ mã toto,

epukasasaka exiketõ purohmãko mã toto.

6Omato kõ torẽtyke pyra mã toto tytapyĩkõ tao,

Ritonõpo kerekeremananõ roropa. Ritonõpo oneahmara mã toto;

tyjamitunuru rokẽ moĩko mã toto.

7“Zopaa, ekaropoko torõ tomo a, onokyro tomo a roropa,

ãmorepãko mã toto.

8Ekaropoko onokyro a, nono poro ytoketomo a, tuna konõto kuaõkomo a,

enetupuhpotoh ekarõko mã toto oya.

9Mokaro emero zuaro mã toto,

tyrihpõkõ Ritonõpo waro mã toto.

10Onokyro isene emero Ritonõpo poe mã toto.

Ipoe rokẽ ahno tõ emero isene exikehpyra mana.

11Jepe tomo, omi etary sã kypanarykomo a, omi kurã apiakary samo, omi xihpyry winoino.

Morararo kynapyrykõ kuhnõko roropa kunurukõ mana.

Moro sã õmirykõ etãko ase,

zae ehtoh rokẽ menekãko ase.

12-13“Tamuhpõme exiketõ tuaro exĩko mana.

Ritonõpo zuaro mana, yrome jamihme roropa mana.

Tamuhpõme exiketõ enetupuhnõko mana.

Ritonõpo enetupuhnõko mana, yrome

jamihme roropa mana zae ehtoh ritohme.

14Itahkaryhtao Ritonõpo a, onyrisaromepyra ropa ahno mana.

Tymyhse ahtao Ritonõpo a, onymyhpokasaromepyra ropa ahno mana.

15Konopo onenehpopyra Ritonõpo ahtao tonore exĩko mana.

Konopo enehporyhtao eya zueme tuna tõ exĩko mana.

16“Ritonõpo jamihme mana,

orẽpyra roropa mana.

Tonekunohse exikety Esẽme mana, onekunohto Esẽme roropa.

17Tuisa tõ tuaro ehtoh puxihkãko ropa Ritonõpo mana.

Tamuximãkõ putupyra exiketõ sã tyripõko mana.

18Tuisa tõ tuisame pyra tyripõko Ritonõpo mana,

imehnõ poetoryme toto rĩko mana.

19Oturuketomo, orẽpyra exiketõ roropa imehnõ poetoryme toto rĩko mana.

20Zae ehtoh poko imehnõ amorepananõ rĩko mynyhme Ritonõpo mana osepeme toto ahtao ro.

Tamuhpõme exiketõ tuaro ehtoh enahkapõko mana.

21Tuisamehxo exiketõ hxirõko mana.

Orẽpyra exiketõ jamitunuru enahkapõko mana.

22Saerehkatoh aropõko mana, tonẽse exiketõ xinukutumao enepotohme.

Saereh kamexipõko mana tykohmãse itamurume ahtao.

23Ahno tõ imehxo tyripõko mana jamihme roropa.

Yrome imeĩpo toto poremãkapõko mana,

toto enahkapõko roropa.

24Ahno tuisary tõ putupyra exiketõ sã tyripõko mana.

Toto arõko mana ona tonorẽ poro, tytahse exiketõ samo.

Otupĩko mã toto, osema ae pyra ytoketõ samo.

25Ixinukuturu htoko toytorykõ kuhnõko mã toto,

tonurãkara, osetapãko mã toto, toetỹse exiketõ samo.