“Jomiry etatoko, tõsepynanopyry se exiketomo, ya oehketomo tãtakorehmapotohkõme!

Moro topu poko osenetupuhtoko ewino taxikase mexiatose,

topu ahkatoh esary poe touse mexiatose.

2Atamurukõ Aparão poko osenetupuhtoko, Sara poko roropa onotykomo.

Tumũkue pyra ro Aparão ahtao tykohmase ynororo ya,

yrome kure rokẽ tyrise ynororo ya tumũkue, typakõke roropa aehtohme tuhke.

3Ywy, Ritonõpo, Jerusarẽ põkõ emuhkehkapõko ase,

etuarimaketõ pynanohnõko ikararahtyã taõkomo emero.

Inonorykõ tonore toehse ahtao ro, tupito kurãme tyrĩko ropa ase, ynarykahpyry sã Etẽ po.

Tãkye exĩko moro põkõ mana, oseahmãko toto;

eremiãko mã toto jeahmaryme, ‘Kure mase,’ ãko mã toto ya.

4“Etatoko pahne, ypoetory tomo, otato ehtoko jomiry poko:

Ynyripohpyry tõ ekarõko ase imeimehnõ nonory põkomo a,

jomihpyry saerehkaneme exĩko eya xine mana.

5Okynã pyra oehnõko ase toto pynanohse,

moro ẽmepyry oehsasaka mana tuisame imehxo jehtohme,

sero nonory põkõ emero tuisaryme exĩko ase.

Moe nono põkõ joepyry eraximãko, jeraximãko mã toto,

jenetupuhnõko mã toto typynanohnekõme.

6Osenuhmatoko kakoxi kapu enetoko,

nono enetoko roropa.

Kapu osenepyra exĩko mana orexĩto samo,

sero nono osenahkãko mana upo samo pakatome toehse ahtao,

ahno epõkõ orihnõko mã toto moromoro samo.

Yrome tuisame imehxo jehtoh osenahkara mana jũme,

yjamitunuru jũme enahpyra exĩko mana.

7“Etatoko pahne zae ehtoh waro exiketomo,

ãmorepatohkõ ya tukurãkase okurohtao xine mana!

Enaromyra ehtoko ohtomarykohtao imehnomo a,

opoihtorykohtao roropa eya xine penekehpyra ehtoko.

8Mokaro osenahkãko mã toto upo samo nuko a tonahse ahtao!

Yrome tuisame imehxo jehtoh osenahkara mana jũme.

Yjamitunuru enahpyra, jũme exĩko mana.”

9Apakako Ritonõpo, yna akorehmako!

Ajamitunuru ke yna ipynanohko,

onyrihpyry sã pake ahtao, yna tamuru tõ isene ahtao.

Oya ihpory Raape tysahsahkase tuna konõto kuao,

mokyro totapase oya.

10Oya tuna konõto tonore tyripose, tuna tõ zueme aexityamo.

Osema tyrise oya tuna konõto rãnakuroko,

opoetory tõ, typynanohse exiketõ akuohtohme.

11Naeroro onypynanohtyã ytõko ropa mã toto Jerusarẽ pona tytapyĩkõ taka,

eremiãko, atãkyemãko, kohtãko tãtãkyemarykõme.

Jũme tãkye exĩko mã toto, atasamara exĩko mã toto,

onyhnamozomopyra exĩko mã toto.

“Ywy ase ajamihtanohneme.

Naeroro ahno zuno pyra ehtoko, axĩtao rokẽ mã toto, onahpoty samo.

13Wenikehnõko matose ywy Orihpõkõ poko;

ya kapu tyrise myahxo, sero nono roropa.

Enaromyra ehtoko ozehno xine orohmanohponanõkõ poko,

oenahkaporykõ se exiketõ poko.

Oryhmapozomosaromepyra xine toehse ozehnotokõ mana.

14Okynã pyra ãpuruhpyry taõkõ tutũtanohposẽme ropa exĩko mã toto;

orihpyra exĩko mã toto,

tonahsẽ nae ropa exĩko mã toto.

15“Ywy ase Ritonõpo Oesẽkomo.

Tuna konõto axikyhmãko ase, pohkane tomo,

panaikato konõto rĩko ase.

Ritonõpo, Jamihmehxo Exikety jesetyme mana.

16Kapu tyrise ya taunuhmapose roropa, sero nono tyrise ya roropa.

Ynara ãko ase Jerusarẽ põkomo a:

‘Ypoetoryme matose, jomihpyry ekaroase oya xine,

jemary ke oewomatorỹko ase.’ ”

17Apakatoko, Jerusarẽ põkomo.

Apakatoko owõtohkõme!

Eukuru sã awãnohtohkõ tõse oya xine,

Ritonõpo nekarohpyry, ozehno xine aehtopo;

tõse oya xine porehme, toetỹse exikety sã osetapãko matose.

18Opoenõ maro, atapyĩ taõkõ maro, toiro oemary apoine pyra mana aarotohme, ãkorehmatohme oytory poko.

19Popyra ehtoh asakoro toehse oya xine:

ononorykõ tonahkase oepetõkara a etonatoh ke te,

apatary põkõ emitapãnõko, orihnõko mã toto.

Yrome opyno exikety pyra mana, oemuhkehkane pyra.

20Osema tõ ae oekyry tõ epukãko mã toto

tapotũkehse tomirykõke toexirykõke;

kapau sã mã toto tapoise ahtao apoitoh ke apoinanomo a.

Toepukase toto tyehno xine Ritonõpo exiryke,

tuãnohse roropa toexirykõke eya.

21Jerusarẽ põkõ myhene!

Aetỹtyã sã matose,

yrome eukuru jehnahpyry ke pyra.

22Seromaroro etatoko pahne Ritonõpo Oesẽkõ omiry oya xine, typoetory tõ ewomane:

“Enetoko ke oemah poe xine moro eukuru apoĩko ropa ase, ozehno xine jehtopõpyry,

ike toetỹse mexiatose.

Moro poe onẽzomopyra exĩko matose, jũme.

23Moro kasana eukuru maro ekarõko ase oepekõkara a,

ynara kahpõkomo a oya xine:

‘Imihme ehtoko nono pona yna a otũtũmatohkõme.

Imihme mexiatose nono po,

moroto tytũtũmase mexiatose nono samo osema tao.’ ”