Jeikap inagho Haranma bi Leiban natunatuna wasiwasike bata kadi waghawagha Liya da Reitsel irawayidi. Leiban kiiravine bodu 14 ibagibagi da kiiravidiye iyimiisana. Bi Liya yana wiitamariyana wasike Zilpa, Jeikap ivereni da naboni wavinena tana bi bada Reitsel yana wiitamariyana wasike Bilha, Jeikap ivereni da naboni wavinena tana. Bi God iwoneni da rawananaki yana kubura iyakuyoveni bi iyaveramagha tamananaki yana kubure. Raghanina iyaveraveramagha, na Isso yana wawaya teya inagharedi basuna yana rakaraka teya siyakayowiiaviyedi. Bi raghanina sivibanana, na Isso genuwanuwana iyapughana bo gesiyirouwa kabivivirana.
God, Jeikap ivimiiseyeni
9Jeikap, Mesapotemiyama iveramagha, bi Betel kwanatune iyamakamake na God irumaghataramagha touna biidi da ivimiiseyeni. 10 Bi iwona bo,
“Tam kam waghawagha Jeikap,
bi gegha muriye sinakwatuvem Jeikap.
Kam waghawagha na Isrel.”
Na ikwatuveni Isrel. 11 Wasina bi God iwona bo,
“Tagu God Maragata Kirakiigu.
Kuvituwa da natunatum sinakoroto.
Tam nosinosim na sinidam kiitowana bi dam mududi
bi kiikiiwawo tamve sinatubugha.
12Tagu tanawa anaverem,
noko Abraham da Aisik averedina
bi bada mmko tanavina
nosinosim murimve anaveredi.”
13Wasina bi God, noko gawarine Jeikap yawata sivisisiya, na ikuyoveni inagho. 14 Bi gawarina meme God touna biidi ivisisiya, na Jeikap akima ikabiwiimiiri bi wain iwayi debane da naboni yana suwara. Wasina bi oliv miina bada debane iwayi. 15Bi noko gawarina ikwatuveni Betel, basuna God name ivisisiya touna biidi.
Reitsel yana rabobo
16Noko murine Jeikap yana dam yawata Betel sikuyoveni bi siwagawaga siyanono, na boga gisina rabarabana bi muriye da Ifareit kwanatune siyakanibu. Na Reitsel wawaya idaguni. Bi yana wiituwa ipiropiro 17na patana iyibusura da sinivisi ghamana iyidami bi pepeya iyatubutubugha. Na wiiburaburawa wasikena iwona bo, “Gekunanagharana! Tomogha tana kuvitubuyi.” 18Raghanina Reitsel yawiina itavenatughureni - bi rabobo biidi na pepeyina ikwatuveni Benoni. Bi tamananaki ikwatuveni Benjiman. 19Wasina bi Reitsel irabobo na name Ifareit (kata sakwatuveni Betlihem) kedana ririne sidogu. 20Bi Jeikap wavinena karawagine akima ikabiwiimiiri. Noko akimina na kata patana nama da Reitsel karawagina yimatakireni.
Jeikap natunatuna bi Aisik yana rabobo
Wasina bi Jeikap natunatuna yadi 12 kadi waghawagha mma.
23Liya natunatuna:
Rubin na Jeikap natuna iyarokona,
Simiyon, Livai, Jiuda, Isaka bi Jebulan.
24Bi Reitsel natunatuna:
Jousep da Benjiman.
25Reitsel yana wiitamariyana wasike, Bilha natunatuna:
Dan da Neptalai.
26Liya yana wiitamariyana wasike, Zilpa natunatuna:
Ged da Aser.
Mmkodi na Jeikap natunatuna Mesapotemiya kubure natuwavinena sivituvedi.
27 Wasina bi Jeikap iveramagha Mamrima, Kiriyat-Aba (kata sakwatuveni Hebron) ririne, tamananaki Aisik biidi. Bi mmko kuburine Abraham imake, bi bada muriye Aisik imake. 28Bi Aisik imakae da kana bodu 180. 29Touna imoraba da ikabipipin bi irabobo, na kayekikina muridigha inagho. Wasina bi natunatuna Isso da Jeikap tubuyina sidogu.