1Uchuchih, wi jintinkagtamua nunú kajimatkipa,

tuja mina chichameg umiktin agagbauwa nunú

amina anentaimin jukita.

2Nunú umiakum, kuashat tsawan iwaku shiig aneasam pujustinaitme.

3Tuja anenka duka, dekaskea nujai

makichkish idaisatin aipa;

duka nugkutaijai betek nugkuaju ata.

Amina anentaimtagmin

kajimatmainchau aneaku ata.

4Nuniakum Apajuí wait anentam atatme,

tuja aents aidaushkam wait anenjamjagtatui.

5Amina dekatjumin kajinmamsa anentaimtsuk,

ima Tuke Pujuuwaig ashí

kajinmamsam anentaimta.

6Ashí ame takattam duka

Apajuí anentaimtusam takasta,

nuniamin nii pujut pegkegnum etamtatui.

7Ame ima yacha jumamipa,

duka nunitsuk Tuke Pujuu umigkata,

nuniakum pegkegchau aina nunú tupanjata.

8Nuniakum jamamtuchu,

wajiu pegkeg pujuttame.

9Amina tagkujum aidau, wajijum aidau

akanka Tuke Pujuu suwakum emematta;

dutikakum ajak ajakmamu aina

nuwiyashkam yama nagkamchaku

juukbau Tuke Pujuu susata.

10Dutikakum yutanmash,

tuja umutnumash atsumkas pujuttame.

11Uchuchih,

Tuke Pujuu esetamatatus

suwimkan amaakuig dakitjaipa,

tuja nii chichagtamkuish kajekaipa.

12Wagki Tuke Pujuuk

makichik múun uchijin jintintak,

suwimkan suwama numamtuk,

nii aneamu aidaun

jintintak suwimkan suwawai.

13Datsauch unuimaju,

shiig anentaimkauwa nunak

Apajuí pegkegnum yumigkiawai.

14¡Nunú unuimata nunuwai oron nagkaesau,

plata nagkaesau pegkeja duka!

15Unuimat shiig anentaimja

pujutan sukagta duka,

kaya shiig pegkejuch akik aina

nuna nagkaesauwai.

¡Iman asa tikich waji pegkeg

wakejumain aina nujaigkish betekchauwai!

16Aents unuimaju, yacha duka

kuashat mijan pujustinai,

nunik wiakuch wajas eme anentam atinai.

17Apajuín chichame umiamua

nunú ima pegkejai,

tuja nii jintinkagtamu

betek umiamua nunú

agkan pujutan sukagtawai.

18Shiig anentaimja pujutan unuimaina

nunú pujutan juwinawai.

Shiig anentaimja pujutan juidauk,

numi pujuta sukagtinjai betek ainawai.

Tuja nunú unuimatan jukiaju aidauk

shiig aneasagtinai.