سوال: کیہ مسیحیاں نوں پرانے عہد دے قانون دی فرمانبرداری کرنی چاہیدی اے؟

جواب: ایس خاص مسئلے نوں سمجھن لئی ایہہ جاننا لوڑیندا اے پرانے عہد دے قانون اسرائیلی قوم نوں دتے گئے سن، مسیحیاں نوں نہیں۔ کجھ قانون اسرائیلیاں لئی بنائے گئے سن کہ اوہ جانن کہ کیویں رب دی فرمانبرداری کرنی اے تے کیویں رب نوں راضی کرنا اے (مثال دے طور تے دس حکم)، ایہناں وچوں کجھ دسدے نیں کہ کیویں رب دی عبادت کیتی جاوے (سوختنی قربانی دا طریقہ)، ایہناں وچوں کجھ اسرائیلی قوم نوں دوجیاں قوماں توں وکھرا کرن لئی بنائے گئے سن (کھان تے پہنن دے قانون) پرانے عہد دے قانون اج دے دور وچ ساڈے اُتے پورے نہیں ڈھکدے۔ جدوں یسوع صلیب تے مریا، اوہنے پرانے عہد دے قانون نوں مکا دتا (رومیوں 10 باب 4 آیت؛ گلتیوں 3 باب 23 توں 25 آیت؛ افسیوں 2 باب 15 آیت)۔

پرانے عہد دی تھاں تے اسیں مسیح دے قانون دے ہیٹھ آں (گلتیوں 6 باب 2 آیت)۔ جیویں اوہنے آکھیا، "اوہنے اوہنوں آکھیا کہ خداوند اپنے رب نوں اپنے سارے دل تے اپنی ساری جان تے اپنی ساری عقل دے نال پیار کر۔ وڈا تے پہلا حکم ایہو اے۔ تے دوجا ایہدے ورگا اے کہ اپنے گوانڈھی دے نال اپنے وانگوں پیار کر۔ ایہناں دو حکماں تے سارے توریت تے نبیاں دے صحیفاں دا مدار اے" (متی 22 باب 37 توں 40 آیت)۔ جے اسیں ایہہ دوویں کم کرنے آں، اسیں اوہ ای کراں گے جو مسیح ساڈے کولوں کرواؤنا چاہوندا اے، "تے خدا دا پیار اے کہ اسیں اوہدے حکماں تے عمل کریئے تے اوہدے حکم بہت اوکھے نہیں" (1۔یوحنا 5 باب 3 آیت)۔ اصطلاحی طور تے دس حکم مسحیاں لئی ضروری نہیں۔ ایہدے مگروں وی دس حکماں وچوں نو (9) حکم نوعہد وچ فیر آئے نیں (سبت دے دن نوں منن توں اڈ)۔ ظاہری طور تے جے اسیں رب دے نال پیار کردے آں تے اسیں دوجے رباں دی عبادت نہیں کراں گے یا بُتاں نوں نہیں پُوجاں گے۔ جے اسیں اپنے گوانڈھیاں دے نال پیار کرنے آں تے اسی اوہناں دا قتل نہیں کراں گے، اوہناں دے نال دغا نہیں کراں گے، اوہناں دے خلاف بھیڑے کم نہیں کراں گے، یاں اوہناں دے مال دے لوبھی نہیں ہوواں گے۔ اس لئی اسیں پرانے عہد دے کسے قانون دے ہیٹھ نہیں آں، سانوں رب دے نال پیار کرنا چاہیدا اے تے اپنے گوانڈھیاں دے نال پیار کرنا چاہیدا اے۔ جے اسیں ایہہ دوویں کم ایمانداری دے نال کردے آں، تے فیر ہر شے ٹھیک ٹھیک ہووے گی۔

پنجابی دے مڈھلے صفحے تے جاؤ

کیہ مسیحیاں نوں پرانے عہد دے قانون دی فرمانبرداری کرنی چاہیدی اے؟