سوال: چار روحانی اصول کیہڑے نیں؟

جواب: چار روحانی اصول اک راہ نیں مکتی دی چنگی خبر نوں ونڈن دا کہ جیہڑی یسوع مسیح تے ایمان لیاؤن نال ملدی اے۔ اے اک سادہ جہیا طریقہ اے جیہڑا اک اجہی سکھیا نوں چار حصیاں وچ ونڈ دا اے ۔ چار روحانی اصولاں وچوں پہلا اے، "رب تہاڈے نال پیار کردا اے، تہاڈی حیاتی بارے اجیہے منصوبے رکھدا اے"۔ یوحنا 3 باب 16 آیت دسدی اے، "کیونجے رب نے دنیا دے نال اجہیی محبت رکھی کہ اوہنے اپنا اکلوتا پتر بخش دتا تانجے جیہڑا اوہدے تے ایمان رکھے مرے نہ سگوں ہمیش دی حیاتی پائے"۔ یوحنا 10 باب 10 آیت سانوں اوہ وجہ دسدی اے جیہدی وجہ توں یسوع دنیا تے آیا، "میں ایس لئی آیا کہ اوہ حیاتی پاؤن تے کثرت نال پاؤن"۔ کیہ کوئی سانوں رب دی محبت توں روک سکدا اے؟ کیہ کوئی سانوں تابعداری دے نال حیاتی گذارن توں روک رہیا اے؟

چار روحانی اصولاں وچوں دوجا اصول اے، بندے پاپ دے نال بھرے ہوئے نیں تے رب توں بہت دور نیں۔ ایہدا سٹہ ایہہ ہویا، کہ سانوں ایہہ پتہ نا لگا کہ رب دا ساڈی حیاتی لئی کیہ منصوبہ رکھدا اے ۔ رومیوں 3 باب 23 آیت دعویٰ کردی اے، "ایس لئی ساریاں نے پاپ کیتا تے رب دے جلال توں وانجھے گئے" رومیوں 6 باب 23 آیت سانوں پاپ دے انجام بارے دسدی اے، "پاپ دی کمائی موت اے"۔ رب انے سانوں اپنے نال رفاقت رکھن لئی بنایا اے۔ ایہدے باجھوں انسان دنیا وچ پاپ لے کے آیا، تے ایس لئی رب توں دور ہو گیا۔ اسیں اوہدے نال اپنے ساک نوں تباہ کر دتا ایہدے مگروں وی اوہ سانوں اپنی نظر وچ رکھدا اے۔ فیر ایہدا کیہ اُپاء اے؟

چار روحانی اصولاں وچوں تیجا اے، "رب دے کول ساڈے پاپ دا اک ای اُپاء سی یسوع مسیح"۔ یسوع مسیح راہیں اسیں اپنے پاپ بخشوا سکنے آں تے رب دے نال اک چنگا ساک بحال کر سکنے آں۔ رومیوں 5 باب 8 آیت سانوں دسدی اے، "پر رب اپنی محبت دی صفت انج کھولدا اے، کہ جدوں اسیں پاپی سی تے مسیح ساڈے لئی مریا"۔ 1۔کرنتھیوں 15 باب 3 تے 4 آیت سانوں دسدی اے کہ سانوں کیہ جانن دی لوڑ اے تے اوہدے تے یقین رکھیئے تے مکتی پاواں گے، "۔۔۔کہ مسیح مقدس کتاب دے مطابق ساڈے پاپاں لئی مریا۔ تے دفن ہویا تے تیجے دن مقدس کتاب دے مطابق جی اُٹھیا۔۔۔" یسوع نے یوحنا 14 باب 6 آیت وچ اعلان کیتا اے کہ صرف میں ای مکتی دا راہ آں، "راہ تے حق تے حیاتی میں آں، کوئی میرے وسیلے دے بغیر پیو دے کول نہیں آؤندا"۔ میں کیویں مکتی دے ایس اجیہے تحفے نوں پا سکناں؟

چار روحانی اصولاں وچوں چوتھا اے، "سانوں ضرور ایمان رکھنا اے کہ یسوع مسیح ای ساڈا مکتی داتا اے ایس طرحاں ای مکتی دا ایہہ تحفہ سانوں مل سکدا اے تے رب دے اجہے منصوبے نوں اپنی حیاتی وچ جان سکنے آں"۔ یوحنا 1 باب 12 آیت سانوں دسدی اے، "پر جنیاں نیں اوہنوں قبول کیتا اوہنے اوہناں نوں رب دے پُتر بنن دا حق دتا یعنی اوہناں نوں جیہڑے اوہدے ناں تے ایمان لیائے نیں"۔ اعمال 16 باب 31 آیت صاف دسدی اے، "اوہناں نے آکھیا رب یسوع تے ایمان لیا تے توں اتے تیرا کنبہ مکتی پائے گا"۔ اسیں اُکا فضل دے نال ای مکتی پا سکنے آں اُکا ایمان راہیں، جیہڑا چھڑا یسوع مسیح تے ہوئے (افسیوں 2 باب 8 تے 9 آیت)۔

جے تسیں یسوع مسیح تے ایمان لیاؤنا چاہوندے او کہ اوہ تہاڈا مکتی داتا اے، تھلے دتے ہوئے لفظ رب نوں کہو۔ ایہناں لفظاں نوں کہن دے نال تسیں مکت نہیں ہو سکدے پر مسیح تے ایمان لیاؤن نال ہو سکو گے۔ ایہہ دعا سادہ جہیا اک رہ اے رب دے نال اپنے ایمان دے اظہار دا تے اوہدا شکر ادا کرو کہ اوہنے تہانوں مکتی دتی اے۔ "ربا! میں جاننا آں کہ میں تیرے خلاف پاپ کیتا اے تے میں سزا دا حقدار آں۔ پر جیہڑی سزا دا میں حقدار سی یسوع مسیح نے اوہ سزا اپنے اُتے لے لئی بس اوہدے تے ایمان لیاؤن نال میں معافی پائی اے۔ میں اپنے پاپاں توں کنارہ کرناں تے اپنا ایمان تیرے تے رکھنا آں اپنی مکتی لئی۔ میں شکر ادا کرنا آں تیرے اجہے فضل تے بخشش دا جیہڑا ہمیش دی حیاتی دا تحفہ اے آمین"۔

جو کجھ تسیں ایتھے پڑھیا ہے اوہدے پاروں کیہ تسیں مسیح لئی کوئی فیصلہ کر لیا ہے؟ جے انج ہے، مہربانی کرکے ہیٹھاں "میں اج مسیح نوں قبول کیتا" دے بٹن تے کلک کرو۔

پنجابی دے مڈھلے صفحے تے جاؤ

چار روحانی اصول کیہڑے نیں؟