2
निनवे जाम्शा लाइब
1 निनवे, इ कली खतम सेल्ब जाक्शो बाक्ब। इ बोल्यो दरवार खाल पावो। इ लां रिम्शो पा कोव़ङो। इ किप्शुर किम्सो। इ बोल नेल्ल ग्रुंइदो। यसैया ५२:७; नहुम १:११
2 मारदे हना परमप्रभु यावेमी याकूब आ मान ततीके लेश्शा गेब। मिनु इस्राएल आ मान ततीके यो लेश्शा गेब। मरिम्शो पाइबपुकी इ रागी लेंशा मओव़नीम। मेकोपुकी खतम सेल्चा पुंइसीशो बाक्नीम।
3 मेको आ लडाइ पाइब आन तेक्तीक लल बाक्नीम। मिनु मेकोपुकीम लल वा फेक्शो बाक्नीम। मेको लडाइ पथ लची नाक्ती, आन बग्गी ङा फलाम टल्केसीब। मेको आन तूतीके शेशा हिरनीम।
4 मेको आन बग्गीपुकी शुश दोरनीम। मेको सहर आ एर ओंथ शुश हिरशा गाक्नीम। मेको तोव़शी खोदेंशो तांइसीनीम। चिला दाप्शो खोदेंशो पा ग्रूनीम।
5 मेकोमी आ लडाइ पाइब आन कप्तान आन कली ब्रेप्ब। मेकोपुकी दाइल पा आ ङोंइती जाक्नीम। मिनु रीब पा सहर ङा गारो गे दोरनीम। मेकेर आन फाम्सीतीके सेल्शो बाक्ब।
6 ब्वाक्कु बारशा यीब। मिनु दरवार ख्रिंख्रि पाइब।
7 मेको सहर ङा पिपीम कली ग्याइश्शा, आ वा प्रुइश्शा लाइक्नीम। मेको आ वाइलीम नेल्ल ग्याइश्शा ङोन लाइक्चा पुंइसीनीम। मिनु मेकोपुकी कुचु तुप्शा ढुकुर खोदेंशो पा रोंका पा ङाक्नीम।
8 निनवे ब्वाक्कु शाइक्ना शाइक्न लाइब दोम्ली खोदेंशो बाक्ब। मिनु “रिम्दो रिम्दो” दे ब्रेश्शोनु यो, सुइमी लेश्शा मकोव़नीम।
9 मेको आ सुन नु चांदी रोइक्तीन। आ शोंप हिक्ने मचाप्चा ङा पा शुश बाक्नीम। शुश क्येट लाइब मारेइ मारेइ बाक्ब।
10 मेको सहर मारेइ मारेइ रोइश्शा श्येत्थ नु खतम पोक्चा पुंइसीशो बाक्ब। मिनु मुर आन थुं लुक्च लाइब, आन पोक्च ख्रिंख्रि पाइनीम। मिनु आन ची यो ख्रिंख्रि पशो बाक्नीम। मेको आन कुल बेक्शो मुर आन कुल खोदेंशो दुम्नीम।
11 निनवे सहर ङा गुप्स खोदेंशो ठेयब मुर आ दरवार मार दुम्मे? मेको आ गाक्तीक नु आ तमी तौ आन बाक्तीके मार दुम्मे? आ आल मेकेर बाक्शो बाक्तेक्म। मिनु सुइमी मेको आन कली श्येत मगेम। यसैया १३:७-८
12 गुप्स खोदेंशो ठेयब मुरुमी आ तमी तौ आन कली शुश मार मार खुप्शो बाक्त। आ मीश कली मारेइ मारेइ चाक्शो बाक्त। आ दरवार शोंपोम प्रिंशो बाक्त। आ पुक्खी मार मार साइश्शा चाक्शा प्रिंशो बाक्ब।
13 मिनु मुर नेल्ल आन परमप्रभु यावेमी “गो इ कली काइ मदाक्थु, इ पर्बम बोक्ती। गो इ बग्गी चोशा गेनन। मिनु गुप्स आ चाइक्ब खोदेंशो इ तमी तौ तरवारमी साइक्चा पुंइसीनीम। इ रोइश्शो, इ साइश्शो रागी रे ग्रुंइनुङ। मिनु इ लोव़ कुरब मुर आन सेंदा मनेंसीब” देंशो बाक्ब।