11
प्रार्थना पचा आ पर्बम शेंशो
मत्ती ६:९-१३
1 काबु येसुमी प्रार्थना पवा बाक्त। मिनु प्रार्थना पने थुमानु, आ शेंसीब कामी “हे प्रभु, यूहन्नामी दोपा आ शेंसीब आन कली प्रार्थना पचा शेंदा, मोपा आंइ कली यो शेंदीकी” देंमाक्त।
2 मिनु येसुम “परमप्रभु यावे कली प्रार्थना पनीनु ‘आं आफ, इन नें का ला ठेयब बाक्ल। इन राज्य जाक्ल।
3 नाक्त किंत किंत ङा आंइ जचा थोव़क गेकी।
4 आंइ मरिम्शो पशो क्याम्शा गेकी। मारदे हना गो यो आंइ कली मरिम्शो पाइब आन कली का का पा माफ गेनीकी। सैतानमी आंइ थुं थाम्चा मगेने’ दे प्रार्थना पने” दे शेंदीमी बाक्त।
परमप्रभुम शिशी पाइब, दे शेंशो
मत्ती ७:७-११
5 मिनु येसुमी “सुइमी नाक्दो इप्शो वारच कली पोक्शा ‘ए वारचै, शोब्ले सां गेयी।
6 वारच का ङोन रे जाक्त। मेको कली थुलु देंङानु, गो नु मारेइ जचा थोव़क मबा।
7 मोपतीके जचा थोव़क गेचा नङ’ दे पुंइतु हना, वारचम लाप्चो मरोक्थु, खिं आगा रे ‘रेयके मपावो। लाप्चो चोक्ता। आल इप्तेक्म। सेंसीनीम। बोक्शा, इ पुंइशो गेने मचाप्नुङ’ देंत हना,
8 तन्न मेकोमी पुंइस ङा पुंइस बाक्त हना, मेको मगेनुङ देंब मुरुमी वारच, दे ला ममाइ ढिपी पतीके मेको कली आ पुंइशो गेब।
9 परमप्रभु यावे कली पुनीने। मिनु इन पुंइशो ताइनीनी। मालीने। मिनु इन माल्शो थित्नीनी। ‘बाक्नी?’ दे लाप्चो ख्रोकोल पने। मो पाइतीनी हना ओव़चा ताइनीनी।
10 मोपतीके सुम पुंइबा, मेकोमी आ पुंइशो ताइब। सुम माल्बा, मेकोमी आ माल्शो थिप्ब। सुम ओव़नुङ, दे लाप्चो ख्रोकोल पाइबा, मेको ओव़चा ताइब। लूका १३:२५
11 तौमी आ आफ कली ‘ङांइ ब्वाइनुङ’ दे पुंइतु हना, मार, आ आफोमी ङांइ, दे बुस्स ब्वचा गेबा ङा? मत्ती ७:९
12 ‘ब्वोफु जाइनुङ’ दे पुंइतु हना, ब्वोफु, दे बिच्छी ब्वचा गेबा ङा?
13 गे, मरिम्शो पाइब बाक्तीनी हना यो, इन आल आन कली रिम्शो थोव़क गेने चाप्नीनी, इन पशो क्येङा स्वर्गम बाक्ब इन आफोमी आ तमी तौ आन कली आन पुंइशो गेब। मेकोपुकीमी ‘इन सोक्त गेकी’ दे पुंइतेक्म हना, आ सोक्त यो गेब” दे शेंदीमी बाक्त।
वोल ग्रुंइचा आ पर्बम शेंशो
मत्ती १२:२२-३०; मर्कूस ३:२२-२७
14 मिनु काबु येसुमी लाटा वोलम थिशो मुर का कली ग्रुमा बाक्त। मिनु लाटा वोल कली ग्रुंइशा खेरा बाक्त। वोल ग्रूम नोले मेकोमी लोव़ पने चबा बाक्त। मेकोमी लोव़ पशो नेंशा, मुर नेल्ले छक लाक्मा बाक्त।
15 मिनु का निक्शीमी चहिं “वोल आन पिप बेल्जीबुल आ सक्तिम वोल आन कली ग्रुंइशा खेरबाक्माक्त” देंमा बाक्त।
16 का निक्शीमी येसु कली थुं कोव़चा कली चिन्ड कोंइपाइक्चा माल्मे बाक्त। मर्कूस ८:११
17 येसुमी मुर आन थुं ङा लोव़ नेल्ल तुइश्शा, मेको आन कली “राज्य का ङा मुर जिशा ब्राशा गाक्तेक्म हना, राज्य जाम्शा लाइब। खिं का ङा मुरपुकी जिशा ब्राशा गाक्तेक्म हना, मेको खिं मलीब।
18 सैतान आ राज्य ङा सक्ति ब्रात हना, रीब पा आ राज्य जाम्शा मलाइबा ङा? ‘बेल्जीबुल आ सक्तिम वोल आन कली खेरबाक्माक्त’ देंतीनी।
19 गो बेल्जीबुल आ सक्तिम वोल आन कली खेरतामी हना, इन तौपुकीमी सुका आ सक्तिम खेरनीमी? इन तौपुकीमी इन कली निसाफ पाइनीम।
20 गोमी परमप्रभु यावे आ सक्तिम वोल आन कली खेरता हना, परमप्रभु यावे आ राज्य जाक्शो बाक्माक्त, दे तुइक्तीन। प्रस्थान ८:१५
21 बोल्यो मुर कामी या शेशा आ दरवार खाल पाप्तु हना, आ शोंप सुइमी खुइ पने मचाप्नीम।
22 तन्न मेको क्येङा यो बोल्यो अर्को का जाक्त हना ला, मेको आ या नेल्ल रोइश्शा, ग्राशा, शोंप नेल्ल आंम के सेल्ब। कलस्सी २:१५; १यूहन्ना ४:४
23 गो नु मगारब आं जोरी सत्रु दुम्नीम। गो नु मखुप्बपुकीमी आं खुप्शो यो फ्राइनीम। लूका ९:५०
वोल लेश्शा जाक्ब, दे शेंशो
मत्ती १२:४३-४५
24 ग्रांग्रा दिचा ङा वोल मुर रे ग्रूशा लशा, ब्वाक्कु मबाक्तीकेम नाइक्तीके माल्ब। मिनु नाइक्तीके मथित्तु हना ‘ङोंइती आं बाक्तीकेमीन लेत्नुङ’ दे लेप्ब।
25 मिनु लेश्शा जाक्मेनु, आ ङोंइती बाक्तीके फिक्शा सिल्शा वोइश्शो ताइब। मिनु आ क्येङा ग्रांग्रा दिचा ङा ७ ओटा वोल आन कली माल्थ लशा चाक्ब। मिनु ओव़शा बाक्नीम।
26 मिनु ङोंइती क्येङा मेको मुर शुश मरिम्शो दुम्ब” दे शेंदीमी बाक्त। यूहन्ना ५:१४
परमप्रभु कली टीब आसीक राइब।
27 येसुमी मेको लोव़ पवानु, मीश मुर कामी ठेयब सेंदा पा “इन कली थिशा थुल्शा कोल्पाइक्ब ममा आसीक रशो मुर बाक्माक्त” दे येसु कली ठेयब सेला बाक्त। लूका १:२८:४८
28 मिनु येसुमी “आं ममा क्येङा परमप्रभु यावे आ लोव़ नेंशा, थुंमी वोइश्शा पाइबपुकी आसीक राइब नम” देंमाक्त। लूका ८:१५:२१
चिन्ड कोव़कोव़ दाक्बपुकी
मत्ती १२:३८-४२
29 येसु आ लोव़ नेंबपुकी बारना बारन लशा, शुश दुम्मा नोले येसुमी “सिनाक्त मुलाक्त ङा मुर थम मरिम्शो बाक्नीम। मारदे हना चिन्ड ला कोव़कोव़ दाक्नीम। मेको आन कली योना आ चिन्ड ङा लाक्शा, मारेइ चिन्ड मकोंइनुङमी। लूका ११:१६
30 निनवे सहर ङा मुर आन कली योना आ चिन्ड खोदेंशो पा, रागीम जरमेशो सिनाक्त मुलाक्त ङा मुर आन कली चिन्ड दुम्ब।
31 निसाफ पची नाक्त दक्खिन रागी ङा पिपीममी बोक्शा, एको पाला ङा मुर आन कली दोस ताइब सेल्ब। मारदे हना मेकोमी ङोन रागी रे पिप सोलोमन आ जोक्तीक तुइक्तीक नेंचा कली जाक्त। नेनीन, एकेर सोलोमन क्येङा यो ठेयब का बाक्ब। १राजा १०:१
32 निसाफ पची नाक्ती निनवे सहर ङा मुरपुकी बोक्शा, एको पाला ङा मुर आन कली दोस ताइब सेल्नीम। मारदे हना मेकोपुकीमी योना आ लोव़ नेंशा, आन थुं परमप्रभु यावे गे लेत्ताक्म। नेनीन, एकेर योना क्येङा यो ठेयब का बाक्ब। योना ३:५
इन रां छेङछेङ दुम्चा माल्ब
मत्ती ५:१५; मत्ती ६:२२-२३
33 बत्ती दाशा, सुइमी ख्रुइश्शा सुम्शा मवोइक्नीम। खिं ओव़ब आन कली हाम्सो दुम्ल, दे नेल्लेम ततीकेम वोइक्नीम। लूका ८:१६
34 इन मिक्च इन रां ङा छेङछेङ बाक्ब। गे हेंथे मकोव़तीनी हना, इन रां नेल्ल छेङछेङ दुम्ब। गे मरिम्शो कोव़चा दाक्ताक्नी हना, इन रां नेल्ल छिङछिङ बाक्ब।
35 मोपतीके होस पांइसीने, इन रां ङा छेङछेङ छिङछिङ मदुम्ल।
36 मिनु इन रां छिङछिङ मदुम्थु, छेङछेङम ब्रीशो बाक्त हना, बत्ती दाशो खोदेंशो पा तांइसीनीनी” दे शेंदीमी बाक्त।
फरिसी नु सास्त्री कली हुइश्शो
मत्ती २३:१-३६
37 काबु येसु फरिसी आ खिंमी खमे जथ लमेनु, आ गुइ मचिक्सीथु निस्से बाक्त। लूका ७:३६; लूका १४:१
38 मिनु फरिसीमी येसु कली गुइ मचिक्थु जचशो तशा छक लाक्माक्त। मत्ती १५:२
39 मिनु प्रभु येसुमी मेको कली “गे फरिसीपुकी बोस शेक्तीनीनु, आ तार ला शेक्नीनी। आगा मशेक्नीनी। मेको खोदेंशो पा इन थुंमी रोइक्तीके नु परमप्रभु कली मटितीकेमी ब्रीशो बाक्ब।
40 गे मूर्खपुकी, सुमी आ लाङगा ङा सेला, आगा ङा यो मेकोम सेल्शो ममाइ ङा?
41 गे आगा ङा थोव़क मथीब आन कली गेने। मिनु इन कली नेल्ल रिम्शो दुम्ब।
42 तन्न आबी, फरिसीपुकी, गे खतम बाक्नीनी। मारदे हना सुप्तीके के १० भाग ङा भाग का परमप्रभु यावे कली गेनीनी। तन्न गे मुर आन कली ठीक निसाफ मपथु, परमप्रभु यावे कली मदाक्नीनी। गे ङोंइती नु नोले ङा निम्फा पचा माल्नीनी। यूहन्ना ५:४२
43 आबी, फरिसीपुकी, गे खतम बाक्नीनी। मारदे हना ग्रुम्तीक खिंमी मान तशो ठेयब मुर आन नित्तीकेमी नित्चा दाक्नीनी। बजारमी गाक्नीनु, मुरपुकीमी मान पा सेउ पशो ताक्चा दाक्नीनी। लूका १४:७
44 आबी, फरिसीपुकी, गे खतम बाक्नीनी। मारदे हना गे मततीक तुरस खोदेंशो बाक्नीनी। मुरपुकीमी मेको कली मतुइक्थु, दिम्शा गाक्नीमी” देंत।
45 मिनु सास्त्री कामी “शेंब हजुर, इन हुइश्शो फरिसी आन कली ला ममाइ। आंइ कली यो हुइक्ताक्नी” देंमेनु,
46 येसुमी “आबी, सास्त्रीपुकी गे यो खतम बाक्नीनी। मारदे हना हेल्शो भारी सेल्शा, मुर आन कली कुरपाइक्नीनी। गे चहिं ब्रेप्चो कामी यो नेप्शा वारच मपाइनीनी।
47 आबी, गे खतम बाक्नीनी। मारदे हना इन किकी पिपीपुकीमी परमप्रभु यावे आ लोव़ पाइब आन कली साइक्तेक्म। मिनु गे मेको आन तुरस सेल्तीनी। प्रेरित ७:५२
48 मोपा इन किकी पिपी नु गारशो दुम्तीनी। मेको आन पशो ठीक बाक्माक्त, दे आन पशो खोदेंशो पाइब दुम्तीनी। मारदे हना इन किकी पिपीपुकीमी परमप्रभु यावे आ लोव़ पाइब आन कली साइक्ना साइक्न बाक्तेक्मे। गेपुकीमी चहिं तुरस सेल्ना सेल्न बाक्तीनी।
49 साइ नेसी परमप्रभु यावे आ तुइक्तीक पाइश्शोमी ‘गो आं लोव़ शेंब मुर सोइक्नुङमी। मेको आं सोइश्शो मुर का निक्शी आन कली खेदा पा श्येत गेनीम, का निक्शी आन कली साइक्नीम’ देंशो बाक्त।
50 साइ ङोंइती रे मुल सम्म परमप्रभु यावे आ लोव़ पाइब शुश आन कली साइश्शो क्येक्क एको पाला ङा मुर आन रे ताक्सीब।
51 ङोंइती साइश्शो हाबील बाक्त। नेल्ल क्येङा नोले साइश्शो जकरिया बाक्त। मेको कली परमप्रभु यावे कली चढ़ेतीक नु आ खिं आस दातेम साइश्शो बाक्त। मेको नेल्ल आन कली मोपा साइक्तीके सिनाक्ती मुलाक्ती ङा मुर दोस गेने पुंइसीशा सजाइ ताइनीम।
52 आबी, सास्त्रीपुकी, गे खतम बाक्नीनी। मारदे हना गे जोक्तीक तुइक्तीक सांचो ताक्तीनी, तन्न मेकेर मओव़नी। मिनु ओव़चा दाक्ब आन कली यो ओव़चा मगेनी” दे हुइक्तीमी बाक्त।
53 मिनु येसु फरिसी आ खिं रे गाक्चवानु, सास्त्री नु फरिसीपुकी गाइश्शा, शुश लोव़ हिल्लो पा आ थुं थाम्मे बाक्त।
54 मारदे हना आ लोव़ ख्राइक्पाइश्शा, दोस गेचा माल्मे बाक्त। लूका २०:२०