13
सिम्सोन जरमेशो
1 मिनु इस्राएलीपुकीमी लेंशा परमप्रभु यावे आ ङोंइती मार मरिम्शो बाक्मे, मेको पामे बाक्त। मोपतीके परमप्रभु यावेमी मेको आन कली ४० बर्स सम्म पलिस्ती आन गुइमी गेमी बाक्त।
2 मिनु दान आ थर ङा मुर का बाक्माक्त। मेको सोराह सहरमी बाक्शो बाक्माक्त। मेको मुर आ नें मानोआह बाक्माक्त। मिनु मेको आ मीश आल मथीब बाक्माक्त।
3 मिनु परमप्रभु यावे आ स्वर्ग ङा गेय पाइब मेको मीश मुर आ ङोंइती ग्रूशा, मेको कली “गे आल मथीब बाक्नेवे। तन्न मुल गे कोव़ज कुरशा तौ थीनेवे। उत्पत्ती १५:२; उत्पत्ती २५:२१; उत्पत्ती २९:३१
4 मोपतीके होस पा बाक्को, अङगुर शांबु नु अरु दुक्तीक काइ मतूङो, मगारचा ङा जचा थोव़क मजावो। गन्ती ६:२-२१; लेवी ११:-; १सामुएल १:११
5 मारदे हना गे कोव़ज कुरशा, तौ थीनेवे। मेको आ चां गेनायो ख्रोइक्चा मदुम्ब। मारदे हना मेको वोंइश आल जरमेसे चोटीन परमप्रभु कली योव़शो नाजिरी का दुम्ब। मिनु मेकोमी इस्राएली आन कली पलिस्ती आन गुइ रे प्रोंइचा गोइब” देंमाक्त।
6 मिनु मेको मीश मुरुमी आ वोंइश कली “परमप्रभु आ गेय पाइब मुर का आं बाक्तीक जाक्त। मेको आ कुल हिंचा ङा परमप्रभु आ स्वर्ग ङा गेय पाइब खोदेंशो बाक्त। मिनु ‘सु बाक्नीनी?’ दे हिल्लो मपङ। मिनु मेकोमी यो आ नें मदे।
7 तन्न मेकोमी आं कली ‘गे कोव़ज कुरशा तौ थीनेवे। मिनु अङगुर शांबु नु अरु दुक्तीक मतूङो, मगारचा ङा जचा थोव़क मजावो। मारदे हना मेको आल जरमेसे रे मबेक्म सम्म परमप्रभु आ योव़शो नाजिरी का दुम्ब’ दे माइक्ती” देंमाक्त।
8 मिनु मानोआहमी परमप्रभु यावे कली “परमप्रभु, इन सोइश्शो मुर लेंशा आंस नेक्था सोइक्तीन। मेकोमी आंस कली मेको नोले जरमेसीब वोंइश आल कली दोपा कोल्पाइक्चा, गो निक्शीमी मार पचा माल्बा, आंस कली शेंदल” दे पुना बाक्त।
9 मिनु परमप्रभुमी मानोआह आ पुंइशो लोव़ नेना बाक्त। मिनु आ मीश रूमी बाक्मेनु, परमप्रभु आ स्वर्ग ङा गेय पाइब लेंशा जाक्माक्त। मेना आ वोंइश मेको नु मबाक्शो बाक्माक्त।
10 मिनु आ मीश दोरशा लशा, आ वोंइश कली “मेको ङोंइती जाक्शो मुर लेंशा आं बाक्तीक जाक्त” देंमाक्त।
11 मिनु मानोआह बोक्शा, आ मीश नु लशा, मेकेर जाक्दीशा, मेको कली “आं मीश नु लोव़ पाइब गे ननी?” दे हिल्लो पवा बाक्त। मिनु मेकोमी “गो नङ” देंमाक्त।
12 मिनु मानोआहमी “इन देंशो लोव़ दुम ङा मेरे मेको वोंइश आलमी मार मार पचा दुम्बा, मार मार पचा मदुम्बा” दे हिल्लो पवा बाक्त।
13 मिनु परमप्रभु यावे आ स्वर्ग ङा गेय पाइबमी “गो मार मार देंङा, इ मीशेमी रिम्शो पा टिचा माल्ब।
14 अङगुर बोट रे सिश्शो मारेइ यो जचा मदुम्ब। मेकोमी अङगुर शांबु नु अरु दुक्तीक तूचा मदुम्ब। मगारचा ङा मारेइ यो जचा मदुम्ब। गो मार मार देंङा, मेकोमी नेल्ल टिचा माल्ब” देंमाक्त। न्यायाधीस १३:४
15 मिनु मानोआहमी परमप्रभु यावे आ स्वर्ग ङा गेय पाइब कली “गो इन कली पाठा का क्योरशा क्येनीकी। मोपतीके रिम्दीन” देंमाक्त। न्यायाधीस ६:१८
16 मिनु परमप्रभु यावे आ स्वर्ग ङा गेय पाइबमी “आं कली तेक्तीसी हना यो, गो इन क्येशो मजाइनुङ। तन्न गेमी चोशा चढ़ेतीक ठीक सेल्तीनी हना, परमप्रभु यावे कली चढ़ेवो” देंमाक्त। मानोआहमी मेको परमप्रभु यावे आ स्वर्ग ङा गेय पाइब बाक्ब, दे मतुइक्ता बाक्त।
17 मिनु मानोआहमी परमप्रभु यावे आ स्वर्ग ङा गेय पाइब कली “इन नें मार बाक्बा? मारदे हना इन लोव़ थमा दुम्त हना, गो इन कली ठेयब सेल्चा दाक्नीकी” देंमाक्त। उत्पत्ती ३२:३०
18 मिनु परमप्रभु यावे आ स्वर्ग ङा गेय पाइबमी मेको कली “गे मारदे आं नें हिल्लो पाइनेवे? मेको मतुइक्चा ङा बाक्ब” देंमाक्त।
19 मिनु मानोआहमी अन्न नु पाठा लाइश्शा, फुल्लु तारी छक लाक्चा ङा गेय पाइब परमप्रभु यावे कली चढ़ेवा बाक्त। न्यायाधीस ६:२१
20 मिनु मेको चढ़ेतीक रे मी ग्रूशा, सरीङ गे लमेनु, परमप्रभु यावे आ स्वर्ग ङा गेय पाइब मेको मी नु सरीङ गे लमाक्त। मानोआह नु आ मीश कोव़स ङा कोव़स बाक्शा, सेउ पाम्से बाक्त।
21 मिनु मेको नोले परमप्रभु यावे आ स्वर्ग ङा गेय पाइब मानोआह नु आ मीश आ ङोंइती गेनायो मग्रूमाक्त। मिनु मानोआहमी मेको परमप्रभु यावे आ स्वर्ग ङा गेय पाइब बाक्माक्त, दे तुइक्ता बाक्त।
22 मिनु मेकोमी आ मीश कली “गो थमा पा बेक्नस। मारदे हना गो परमप्रभु कली ताइतस” देंमाक्त। प्रस्थान ३३:२०
23 तन्न आ मीशेमी “परमप्रभु यावेमी इस कली साइक्चा दाक्शो हना, इस चढ़ेशो चोशा चढ़ेतीक नु अन्न चढ़ेतीक मब्रव वा। इस कली मोदेंशो लोव़ मदे वा, मकोंइद वा” देंमाक्त।
24 मिनु मानोआह आ मीशेमी तौ का थिवा बाक्त। मेको कली सिम्सोन नें वोदा बाक्त। मेको आल कोल्ना कोल्न लमाक्त। मिनु परमप्रभु यावेमी मेको कली आसीक गेवा बाक्त। उत्पत्ती २४:१; उत्पत्ती ३५:९; गन्ती २२:६
25 मिनु सोराह नु एश्ताओल सहर आस दातेमी बाक्शो माहानेह-दान सहरमी बाक्मेनु, परमप्रभु यावे आ सोक्तीमी मेको कली गेय पपाइक्चा गोवा बाक्त। न्यायाधीस ३:९-१०; न्यायाधीस ६:३४; न्यायाधीस १४:६,९; न्यायाधीस १५:१४; गन्ती २४:२-४; १सामुएल १०:६,१०; १सामुएल १६:१३; इजीकीएल ११:५