3
ᤜᤡᤶᤛᤠᤔᤠ ᤏᤢ ᤜᤡᤶᤛᤠᤒᤠᤜᤠ᤹
1-2 ᤜᤧᤰᤁᤣᤗ᤹ᤖᤡᤰ ᤜᤡᤶᤛᤠᤔᤠᤛᤣ. ᤂᤡᤏᤡ᤹ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤀᤥ ᤁᤢᤓᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤧᤈᤥ᤺ᤰᤛᤠᤱ ᤂᤡᤏᤡ᤹ ᤌᤣᤀᤠᤱ ᤔᤧᤶᤔᤧᤳᤋᤣ ᤛᤣᤛᤣᤒᤠ ᤜᤡᤱᤔᤴᤏᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤁᤧᤒᤡᤖᤢᤶᤒᤠ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤛᤢᤰᤋᤢ᤹ᤖᤥ॥
3 ᤂᤡᤏᤡ᤹ᤃ ᤐᤖᤡᤰᤐᤖᤡᤰᤐᤠ ᤌᤠ᤺ᤰ ᤑ᤺ᤔᤠᤴ. ᤛᤠᤶᤔᤩᤠᤱ ᤘᤠ᤺ᤳᤋᤡᤜᤠ᤹ ᤘᤠ᤺ᤵᤔᤠᤴ ᤏᤢ ᤀᤡᤔᤧᤸᤗᤢᤱᤒᤠ ᤏᤠ-ᤏᤠ ᤐᤖᤡᤰᤐᤠ ᤆᤠᤱᤜᤠ᤹ ᤆᤠᤱᤔᤠᤴ. ᤗᤠ᤺ᤰᤁᤠᤳᤗᤠᤶᤒᤠ ᤁᤧᤎᤠ᤺ᤵᤐᤠ ᤆᤥ᤺ᤰᤛᤡᤱᤔᤥ ᤔᤧ᤺ᤴ.
4 ᤁᤖ ᤂᤡᤏᤡ᤹ ᤏᤢ᤺ᤔᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤠ᤺ᤔᤏᤠᤒᤠ ᤛᤢᤶᤛᤢᤶ ᤕᤧᤰᤕᤧᤰ ᤏᤢ ᤏ᤺ᤶᤏ᤺ᤶ ᤗ᤹ᤔᤠᤴ ᤛᤡᤃᤠᤱᤗᤠᤶᤒᤠᤀᤣ ᤏᤡᤎᤠ᤺ᤵᤗ ᤐᤥ᤺ᤱᤗᤥ॥ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤡᤔᤧᤸᤗᤢᤱᤒᤠ ᤆᤥ᤺ᤰᤗᤥ॥
5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤠ᤺ᤰᤐᤥ ᤁᤧᤈᤥ᤺ᤰᤔᤠ ᤀᤢᤴᤇᤣ᤺ᤴᤛᤔᤠ ᤛᤣᤛᤣ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤏᤢ᤺ᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤘᤕᤧᤖᤥ॥
6 ᤁᤢᤒᤡᤀᤥ ᤛᤠᤖᤠᤖᤧ ᤁᤢᤜᤡᤶᤛᤠᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤖᤥ॥ ᤂᤡᤏᤡ᤹ᤀᤠᤱ ᤔᤧᤱᤃᤡᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤖᤠᤖᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤏᤡᤱᤗᤥ॥
7 ᤜᤡᤶᤛᤠᤒᤠᤛᤣ. ᤂᤡᤏᤡ᤹ᤀᤠᤱ ᤂᤡᤏᤡ᤹ ᤜᤡᤶᤛᤠᤔᤠᤜᤠ᤹ᤏᤢ ᤛᤥᤖᤡᤰ ᤁᤧᤘᤕᤡᤸᤗᤧ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤖ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤂᤡᤏᤡ᤹ ᤜᤧᤰᤁᤣ ᤁᤧᤎᤢᤶᤔᤠ ᤔᤧᤴᤈᤥ᤺ᤰᤏᤧᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤢᤛᤱ ᤜᤡᤱᤔᤴᤏᤥ ᤂᤧᤱᤜᤠ᤹ᤃ ᤂᤡᤏᤡ᤹ ᤗᤰᤛᤠᤔᤠᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤢᤘᤠ᤺ᤴ ᤌᤣ᤺ᤸᤗᤧᤀᤠᤱ ᤔᤧᤎᤣ᤺ᤰᤋᤢᤴᤗ ᤑᤠ᤹ᤀᤠᤱ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤸᤗᤧ ᤁᤧᤍᤠ᤺ᤒᤠ ᤋᤢᤰᤂᤣ᤺ᤴ
8 ᤁᤢᤏᤢᤵᤔᤥ. ᤂᤡᤏᤡ᤹ ᤏᤡᤱᤘᤠ᤹ᤀᤥ ᤁᤠᤰ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹. ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹. ᤔᤡ᤺ᤶᤈᤡ ᤔᤧᤳᤋᤠᤛᤡᤶᤔᤧ᤹. ᤜᤠᤱᤜᤠᤱᤘᤠ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤥ᤺ᤰᤂᤧᤶᤔᤧ᤹ᤀᤥ॥
9 ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤑᤧᤴ ᤐᤠ᤺ᤴ ᤔᤧᤈᤥᤃᤧᤶᤔᤡᤴᤏᤧ᤹. ᤁᤡᤏᤠ᤺ᤴᤍᤡ᤺ᤸᤗᤧ ᤁᤢᤗᤧᤰᤘᤠ ᤁᤡᤏᤠ᤺ᤴᤍᤡ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤁᤖ ᤂᤧᤸᤗᤧ ᤁᤢᤗᤧᤰᤘᤠᤃ ᤔᤢ᤹ᤀᤡᤛᤠᤶ ᤐᤡᤖᤧᤶᤛᤡᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤐᤡᤛᤧ ᤁᤧᤀᤢ᤺ᤳᤋᤡᤀᤠᤱ ᤘᤠ᤹ᤖᤥ॥
10 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ.
“ᤜᤡᤱᤔᤴᤏᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠᤀᤠᤱ ᤛᤢᤕᤧᤴᤜᤠ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤑᤧᤴ ᤐᤠ᤺ᤴ ᤐᤠ᤺ᤵᤔᤠ ᤏᤢ ᤀᤡᤱᤗᤧᤰ ᤐᤠ᤺ᤴ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ॥
11 ᤂᤧᤸᤗᤧ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤀᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥ᤺ᤱ॥ ᤛᤏᤠᤖᤢᤱᤅᤥ ᤘᤠ᤹ᤔᤠ ᤋᤶᤛᤡᤴ ᤆᤥᤃᤢᤖ ᤐᤥ᤺ᤱ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤐᤠ᤺ᤴᤏᤥ ᤐᤵᤔᤠᤀᤣ ᤐᤥ᤺ᤱᤗᤥ॥
12 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ᤺ᤴ ᤂᤧᤵᤛᤢ᤹. ᤁᤖ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤥ᤺ᤰᤗᤥ॥”
13 ᤂᤡᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤰ ᤛᤶᤒᤠᤸᤗᤧ ᤛᤧᤰᤂᤠᤀᤣ ᤀᤠᤳᤋᤡᤸᤗᤧᤀᤠᤱ ᤂᤠ᤺ᤶᤔᤠ ᤁᤧᤴᤇᤢᤰᤋᤡᤴᤗᤥ॥
14 ᤁᤖ ᤏᤢ᤺ᤒᤠ ᤁᤧᤈᤥᤃᤢᤶᤔᤡᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ “ᤘᤣ᤹ᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ॥”
15 ᤁᤖ ᤂᤡᤏᤡ᤹ ᤜᤡᤱᤔᤴᤏᤥ ᤂᤪᤡᤛ᤻ᤋᤧᤴ ᤍᤠᤱᤒᤠ ᤗ᤹ᤖᤡᤰ ᤛᤣᤘᤠ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤏᤡᤱᤛᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤃᤧᤶᤗᤠᤵᤋᤡᤸᤗᤧ ᤗᤢᤶᤗᤢᤶᤔᤠᤱ ᤀᤡᤱᤎᤠ᤺ᤱᤅᤡᤴᤏᤢ ᤏᤥᤃᤵ ᤐᤡᤔᤠ ᤛᤍᤠᤍᤡᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥
16 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤪᤡᤛ᤻ᤋᤀᤥᤒᤠ ᤂᤡᤏᤡ᤹ ᤏᤢ᤺ᤒᤠ ᤕᤧᤵᤗᤧᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤛᤡᤖᤡᤱ ᤔᤧᤔᤖ ᤑᤠ᤹ᤀᤠᤱ ᤛᤣᤛᤣ ᤂᤠᤛᤡᤱ ᤁᤳᤋᤧᤶᤔᤧ᤹ᤀᤥ॥
17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠᤔᤠᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
18 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤠ᤺ᤳᤇᤧ ᤀᤠᤏᤡ᤹ ᤗᤠᤕᤥᤜᤠ᤹ ᤛᤍᤠᤍᤡᤱ ᤗᤧᤵᤔᤡ ᤐᤡᤔᤠ ᤑᤠ᤹ᤀᤠᤱ ᤌᤡᤰᤗᤧᤱ ᤛᤩᤧᤖᤥ॥ ᤛᤠᤶᤕᤥᤏᤡᤒᤠ ᤂᤪᤡᤛ᤻ᤋᤧᤴ ᤗᤠᤕᤥᤒᤠᤖᤧ ᤁᤢᤗᤧᤰᤘᤠ ᤛᤩᤧᤖᤥ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤌᤰᤁᤥ ᤛᤩᤧ. ᤁᤖ ᤛᤣᤛᤣᤔᤠᤱᤅᤥᤗᤠᤶ ᤕᤠᤶᤔᤥ ᤜᤡᤅᤧᤖᤥ॥
19 ᤒᤠ ᤁᤴ ᤛᤣᤛᤣᤔᤠᤱᤗᤠᤶ ᤐᤣᤀᤠᤱ ᤂᤢᤏᤧ᤹ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠ ᤑᤧᤴᤛᤠᤶᤜᤠ᤹ ᤀᤡᤱᤓᤥ᤺ᤛᤢᤛᤡᤖᤥ॥
20 ᤂᤧᤱᤜᤠ᤹ᤖᤧᤃ ᤀᤢᤴᤇᤣ᤺ᤴ ᤏᤢᤜᤠ᤺ᤸᤗᤧ ᤘᤠᤗᤠᤎᤠ ᤆᤥᤃᤢᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤡ ᤌ᤺ᤳᤋᤢᤛᤡᤀᤠᤱ ᤜᤠᤱᤄᤢᤛᤡᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴ ᤂᤧᤶᤔᤠ ᤔᤧᤴᤍᤧᤴᤍᤧᤴᤏᤠᤱ ᤔᤧᤘᤕᤧᤖᤥ॥ ᤂᤧᤵᤔᤥ ᤕᤧᤳᤇᤡ ᤔᤏᤠᤜᤠ᤹ᤖᤰ ᤁᤡᤵᤔᤠ ᤁᤧᤄᤢ᤺ᤒᤠ ᤘᤠᤍᤥ᤺ᤰᤔᤥᤗᤠᤶ ᤋᤠᤱᤔᤧᤛᤧ᤺ᤵᤋᤧᤀᤠᤱ ᤔᤧᤘᤕᤧ॥
21 ᤁᤴ ᤘᤠᤍᤥ᤺ᤰᤁᤡᤗᤧᤴ ᤆᤫᤠ᤺ᤳᤋᤡᤱᤃ ᤋᤠᤱᤃᤧᤛᤧ᤺ᤵᤋᤡᤒᤠ ᤒᤵᤋᤡᤛ᤻ᤔᤠᤸᤗᤧ ᤁᤢᤒᤡ ᤜᤧᤰᤋᤱᤒᤠᤖᤥ. ᤁᤱᤃ ᤌᤰᤁᤥᤗᤠᤶ ᤔᤠᤰᤂᤪᤰᤁᤡᤴ ᤘᤠᤃᤧᤜᤵᤋᤢᤶᤒᤠ ᤜᤧᤰᤁᤣᤃ ᤔᤧ᤺ᤴ. ᤁᤖ ᤛᤣᤛᤣ ᤂᤠᤛᤡᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤥ᤺ᤰᤔᤏᤠᤒᤠ ᤔᤠᤱᤜᤧᤰᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤂᤠᤛᤡᤱᤅᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠᤗᤠᤶ ᤋᤠ᤺ᤖᤥ॥
22 ᤀᤠᤸᤗ ᤕᤧᤛᤢ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹. ᤕᤢᤰᤛᤠᤒᤠᤜᤠ᤹ ᤏᤢ ᤔᤢᤰᤛᤠᤶᤜᤠ᤹ ᤁᤢᤕᤢᤰᤁᤥ ᤁᤳᤋᤢᤛᤡᤖᤥ॥