13
ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡ᤹
1 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤌᤡᤰᤕᤧᤴ ᤋᤃᤡ ᤕᤧᤛᤢᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤵᤔᤠᤀᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤔᤠ ᤕᤧᤶ ᤋᤩᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤘᤕᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥
2 ᤀᤠᤸᤗ ᤕᤢ᤺ᤴᤇᤡᤰ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤛᤡᤔᤥᤏᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤋᤢᤖ ᤑᤠ᤹ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤐᤡᤖᤢᤀᤠᤱ ᤘᤕᤧ॥
3 ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤠᤰ ᤛᤶᤍᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤔᤣ ᤋᤩᤧᤒᤠ ᤏᤢ ᤂᤢᤏᤧ᤹ᤀᤥᤀᤣ ᤏᤢ᤺ᤱᤗ ᤐᤳ ᤁᤧᤗ᤹ᤒᤠᤴ ᤕᤧᤛᤢᤖᤧ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥
4 ᤜᤧᤰᤁᤩᤠᤱ ᤂᤢᤏᤧ᤹ ᤆᤠᤈᤠᤔᤠᤍᤧᤴᤏᤥᤗᤠᤶ ᤐᤥᤃᤧᤀᤠᤱ ᤁᤢᤛᤢᤱᤄᤣ᤺ᤰᤘᤠ᤺ᤴ ᤑᤧᤴᤍᤢᤀᤠᤱ ᤕᤠᤶᤍᤢ᤺ᤰᤔᤠᤸᤗᤧ ᤁᤡᤳᤗᤡᤰ ᤁᤡᤳᤇᤡᤱ.
5 ᤜᤧᤰᤁᤣᤗ᤹ᤖᤡᤰᤁᤣ ᤆᤫᤠ᤺ᤳᤋᤡᤴ ᤂᤵᤐᤩᤠᤀᤥ ᤜᤢᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤔᤠ ᤜᤣ᤺ᤰᤋᤢ ᤜᤧᤰᤁᤩᤠᤱ ᤁᤡᤳᤇᤡᤱᤒᤠ ᤕᤠᤶᤍᤢ᤺ᤰᤔᤠᤸᤗᤧ ᤋᤢᤃᤢ ᤐᤡᤖᤢᤛᤡ॥
6 ᤂᤢᤏᤧ᤹ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤗᤠᤱ ᤘᤠᤜᤵᤛᤧ ᤑᤧᤖᤧᤸᤗᤧ ᤂᤧᤸᤗᤧ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤗᤠᤱᤅᤡᤴ ᤘᤠᤃᤧᤜᤵᤋᤢᤒᤠᤒᤡ᥅”
7 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥ ᤀᤡᤱᤃᤠ᤹ ᤌᤣ ᤆᤥᤃᤢᤱᤗ ᤐᤳᤋᤠ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤗᤥ ᤁᤖ ᤋᤠ᤺ᤴᤍᤡᤃ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ॥”
8 ᤐᤋᤪᤢᤛᤖᤧ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤠᤗᤠᤱᤜᤠ᤹ ᤘᤠᤜᤵᤔᤠ ᤔᤧᤏᤢ᤹ᤏᤧᤴᤗᤥ᥄”
ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤁᤧᤗᤠᤱᤜᤠ᤹ ᤘᤠᤔᤧᤜᤵᤋᤢᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤗᤰ ᤁᤧᤱᤄᤥ᤺ᤛᤢᤴᤗᤥ॥”
9 ᤜᤧᤰᤁᤣ᤺ᤸᤗᤧ ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤗᤠᤱᤜᤠ᤹ᤖᤰ ᤔᤧ᤺ᤴ. ᤁᤖ ᤀᤠᤜᤢᤰᤜᤠ᤹ ᤏᤢ ᤀᤠᤎᤧᤃᤣ᤺ᤰᤁᤡᤴᤏᤠᤱ ᤘᤠᤜᤵᤋᤠᤱ ᤐᤡᤖᤠᤱᤅᤧ᤹ᤀᤥ᥄”
10 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤘᤠᤃᤧᤖᤢᤶᤛᤡᤱᤒᤠ ᤔᤏᤠ᤺ᤱᤃ ᤛᤣᤛᤣ ᤐᤥ᤺ᤱᤔᤠᤖᤧ ᤗᤠᤃᤡ ᤁᤢᤗᤠᤱᤜᤠ᤹ᤖᤰ ᤘᤠᤜᤵᤔᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤱᤃ ᤛᤣᤛᤣᤀᤣ ᤆᤥ᤺ᤰᤗᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤃ ᤛᤣᤛᤣᤀᤣ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ᤖᤥ॥”
11 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠ᤺ᤳᤗᤧ ᤀᤡᤱᤗᤧᤰᤋᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ ᤗ᤹ᤖᤡᤰ ᤔᤧᤳᤋᤢᤛᤡᤒᤠᤖᤥ॥
12 ᤕᤧᤛᤢᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡᤀᤠᤱ ᤁᤢᤈᤠᤱᤅᤡᤴ ᤆᤠᤰᤛᤡᤱ ᤜᤧᤰᤁᤩᤠᤱ ᤕᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅
13 ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤳᤋᤡ᤹॥ ᤂᤧᤴ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤶ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤒᤠ ᤂᤧᤴᤏᤠᤖᤥ॥
14 ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠᤀᤠᤛᤠᤱ ᤂᤡᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢᤱ ᤐᤡᤏᤡᤱ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤗᤠᤱ ᤘᤠᤜᤵᤔᤠ ᤐᤡᤛᤡᤱᤔᤠ ᤐᤥ᤺ᤱᤗᤥ॥
15 ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤁᤴ ᤁᤢᤒᤡ᤺ᤴ ᤕᤢᤰᤂᤢᤱ ᤐᤡᤏᤡᤱᤅᤠᤱ ᤘᤠ᤹ᤖᤥ॥
16 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤛᤣᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ. ᤜᤧᤰᤁᤩᤠᤱ ᤀᤡᤱᤛᤠᤒᤠᤴᤏᤠᤱ ᤂᤢᤏᤧ᤹ ᤁᤧᤒᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥
17 ᤀᤠᤸᤗ ᤁᤴ ᤐᤠ᤺ᤴᤜᤠ᤹ᤃ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤁᤱᤜᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠ ᤁᤧᤒᤥ᤺ᤰᤂᤡ᤹ᤖᤥ॥”
ᤕᤧᤛᤢᤖᤧ ᤂᤢᤏᤧ᤹ ᤀᤡᤱᤗᤧᤰᤁᤥ ᤌᤠᤒᤠ ᤐᤠ᤺ᤴᤏᤡᤴ ᤐᤠ᤺ᤳᤋᤢ᤹
ᤔᤳᤋᤡ ᥈᥌.᥈᥆-᥈᥋. ᤔᤷᤁᤢᤛ ᥇᥊.᥇᥍-᥈᥇. ᤗᤢᤁᤠ ᥈᥈.᥈᥇-᥈᥉
18 “ᤀᤡᤱᤃᤠ᤹ ᤂᤡᤏᤡ᤹ ᤁᤧᤖᤧᤰᤗᤧ ᤗᤠᤃᤡᤃ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ॥ ᤀᤡᤱᤃᤠ᤹ ᤛᤣ᤺ᤰᤏᤡᤱᤒᤠᤜᤠ᤹ᤃ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤁᤖ ᤀᤡᤱᤃᤠ᤹ᤏᤢ ᤛᤥᤖᤡᤰ ᤆᤠᤃᤧᤈᤠᤒᤠᤴᤏᤣ ᤀᤡᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤥᤃᤧᤖᤥ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠᤴ ᤁᤧᤳᤗᤀᤣ ᤐᤥ᤺ᤱᤗᤥ॥
19 ᤁᤴ ᤐᤠ᤺ᤴᤜᤠ᤹ᤃ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤧᤳᤋᤡᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗᤥ॥
20 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤐᤠᤱᤄᤢᤱᤛᤡᤱᤒᤠᤜᤠ᤹ ᤗᤠᤱᤍᤠ᤺ᤰᤋᤢᤛᤡ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠ. ᤂᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤧᤴ ᤗᤠᤱᤍᤠ᤺ᤰᤋᤢ᤹ᤖᤥ॥”
21 ᤕᤧᤛᤢᤖᤧ ᤂᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤁᤢᤕᤥ᤺ᤶ ᤐᤢ᤹ᤖᤧᤖ ᤀᤰᤂᤣᤗ᤹ᤖᤡᤰ ᤀᤡᤱᤓᤥ᤺ᤛᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”
22 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤀᤡ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤥᤔᤧᤔᤧᤳᤇᤡᤱ॥
23 ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤎᤡᤰ ᤁᤢᤒᤣᤛᤠᤱ ᤂᤧ᤺ᤶᤛᤡᤱᤅᤠᤱ ᤕᤢᤅᤧᤖᤥ॥
24 ᤛᤡᤔᤥᤏ ᤐᤋᤪᤢᤛᤖᤧ ᤂᤧᤴ ᤜᤢ᤹ᤛᤠᤶᤒᤠᤴ ᤂᤢᤏᤧ᤹ ᤜᤠ᤺ᤵᤐᤣ ᤑᤠ᤹ᤀᤠᤱ ᤛᤣ᤺ᤴᤍᤥ᤺ᤛᤧ᤹ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤡᤰᤛᤣ᤺ᤴ ᤐᤡᤖᤢᤖᤥ॥
25 ᤜᤧᤰᤁᤣ᤺ᤸᤗᤧ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤕᤧᤛᤢᤀᤥ ᤂᤧ᤺ᤶᤛᤡᤱᤗ ᤛᤣ᤺ᤴᤍᤥᤛᤢ. “ᤍᤠᤱᤒᤣ ᤂᤧᤱᤃ ᤜᤠ᤺ᤳᤏᤧᤒᤣ᥅”
26 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤁᤴ ᤂᤖᤧ᤺ᤱᤅᤡᤸᤗᤧ ᤁᤢᤄᤧ᤺ᤱᤅᤡᤴ ᤂᤥᤷᤕᤠᤀᤥ ᤏᤡ᤺ᤵᤛᤢᤱᤅᤠᤱ ᤐᤡᤖᤢᤱᤒᤠ ᤔᤏᤠ᤺ᤴᤏᤧᤖᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤖᤧ᤺ᤱᤅᤡᤸᤗᤧ ᤁᤢᤄᤧ᤺ᤱᤅᤡᤴ ᤏᤡ᤺ᤵᤛᤢᤀᤠᤱ ᤛᤡᤔᤥᤏᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤧᤴ ᤐᤡᤖᤢ॥
27 ᤕᤜᤢᤍᤠ᤺ᤸᤗᤧ ᤂᤧᤴ ᤋᤠ᤺ᤰᤋᤢᤏᤠᤔᤧ᤺ᤴᤏᤣ ᤔᤠᤑᤧᤴᤛᤠᤶᤔᤡᤸᤗᤧ ᤂᤧᤴ ᤕᤢᤰᤋᤢᤖᤥ॥
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤧᤔᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤘᤠ᤹. ᤂᤧᤴ ᤜᤠᤖᤠᤀᤣ ᤆᤥᤃᤧ᤹ᤀᤥ॥”
28 ᤁᤖ ᤂᤧᤵᤔᤥ ᤆᤠᤈᤠᤀᤡ ᤁᤧᤕᤢᤱᤒᤠᤜᤠ᤹ᤖᤧ ᤕᤧᤛᤢᤖᤧ ᤜᤧᤰᤁᤣ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
29 ᤕᤜᤢᤍᤠ᤺ᤱᤃ ᤕᤠᤱ ᤕᤠᤱᤔᤠ ᤛᤢ᤺ᤰᤘᤠ ᤁᤧᤃᤢᤒᤠ ᤘᤕᤧᤒᤠᤸᤗᤧ ᤛᤠᤓᤠᤱᤈᤠᤀᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤀᤡᤱᤔᤠ ᤀᤡᤃᤪ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤈᤠ ᤜᤠ᤺ᤵᤔᤠᤛᤡ ᤑᤠ᤹ᤀᤠᤱ ᤕᤧᤛᤢᤖᤧ ᤔᤧᤳᤋᤢᤒᤠᤒᤡᤗᤠ ᤗ᤹ᤖᤡᤰ ᤁᤢᤓᤠᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
30 ᤂᤖᤧ᤺ᤱᤅᤡᤴ ᤆᤏᤢᤔᤧ᤺ᤴᤏᤣ ᤕᤜᤢᤍᤠ᤺ᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤂᤠᤔᤠᤰᤗᤢᤶᤔᤥ ᤗ᤺ᤴᤍᤧ ᤐᤣᤖᤥ॥
ᤐᤋᤪᤢᤛᤖᤧ ᤕᤧᤛᤢ᤺ᤴ ᤏᤠ᤹ᤖᤢ᤹
ᤔᤳᤋᤡ ᥈᥌.᥉᥇-᥉᥋. ᤔᤷᤁᤢᤛ ᥇᥊.᥈᥍-᥉᥇. ᤗᤢᤁᤠ ᥈᥈.᥉᥇-᥉᥊
31 ᤕᤜᤢᤍᤠ᤺ᤴ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤀᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤠᤔᤡᤔᤡᤍᤡᤱ ᤐᤥ᤺ᤱᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤀᤥ ᤔᤡᤔᤡᤍᤡᤱ ᤐᤥ᤺ᤱᤗᤥ॥
32 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛ᤻ᤛᤠ᤺ᤀᤥ ᤔᤡᤔᤡᤍᤡᤱ ᤐᤥ᤺ᤱᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤔᤡᤔᤡᤍᤡᤱ ᤆᤥᤃᤢ᤹. ᤂᤧᤴᤏᤠᤱ ᤜᤠᤖᤠᤀᤣ ᤔᤡᤔᤡᤍᤡᤱ ᤆᤥᤃᤢ᤹ᤖᤥ॥
33 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤛᤵᤑᤠᤖᤰ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤔᤧᤳᤏᤡᤱ. ‘ᤀᤡᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠ ᤂᤧᤵᤔᤥ ᤋᤠ᤺ᤔᤠ ᤁᤧᤴᤇᤢᤰᤋᤡᤴ॥’
34 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤢᤛᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥ ᤂᤡᤏᤡ᤹ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥
35 ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤏᤧ ᤑᤠ᤹ᤃᤪ ᤂᤧᤴᤗᤠᤶᤔᤣ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤡᤏᤡ᤹ ᤀᤠᤜᤢ᤹ᤛᤠᤶᤒᤠᤏᤡᤱ ᤑᤠ᤹ᤀᤠᤱ ᤁᤢᤛᤡᤱ ᤁᤧᤶᤏᤡ᤺ᤳᤋᤡ᤹ᤖᤥ॥”
36 ᤛᤡᤔᤥᤏ ᤐᤋᤪᤢᤛᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣ᤺ᤰᤐᤠᤒᤣ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤀᤠᤸᤗᤥ ᤋᤡᤶᤔᤠ ᤁᤧᤴᤇᤢᤰᤁᤠᤴᤗᤥ. ᤁᤖ ᤕᤠᤱᤛᤡᤃ ᤀᤡᤱᤃᤠ᤹ ᤁᤧᤍᤡᤶᤔᤠ᤹ᤖᤥ॥”
37 ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤌᤣᤀᤠᤱ ᤀᤠᤸᤗᤥ ᤋᤡᤶᤔᤠ ᤔᤧᤛᤢᤰᤏᤧᤴᤒᤣ᥅ ᤂᤧᤏᤧ᤹ ᤁᤧᤗᤠᤃᤡ ᤀᤡᤱᤃᤠ᤹ ᤀᤠᤸᤗᤥ ᤛᤡ᤺ᤔᤠᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”
38 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤀᤠᤗᤠᤃᤡ ᤛᤡ᤺ᤔᤠ ᤕᤠᤖᤡᤵ ᤁᤧᤘᤠ᤹ᤒᤡ᥅ ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤧ᤹. ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”