14
यहूदा ङा पिप अमस्याह
२इतिहास २५:-
1 योआश आ तौ अमस्याह यहूदा ङा पिप दुम्माक्त। मेना यो-आहाज आ तौ योआश इस्राएल ङा पिप दुम्शो बर्स निक्शी दुम्शो बाक्माक्त। योआश नु येहो-आश नें का बाक्ब, येहो-आश कली योआश यो देंशो बाक्त।२राजा १२:२२
2 यहूदा ङा पिप अमस्याह पिप दुम्मेनु २५ बर्स दुम्शो बाक्माक्त। मिनु मेकोमी यरूसलेमम २९ बर्स सासन पवा बाक्त। मेको आ ममा आ नें येहो-अददीन बाक्माक्त। मेको यरूसलेम ङा बाक्माक्त।
3 अमस्याहमी परमप्रभु यावे आ ङोंइती मार रिम्शो बाक्मे, मेको पवा बाक्त। तन्न मेको आ किकी दाऊदमी पशो खोदेंशो चहिं मपवा बाक्त। मेकोमी आ आफ योआशमी पशो खोदेंशो पवा बाक्त। २राजा १२:३-४
4 मो हना यो मेकोमी डांडाम बाक्शो थानपुकी मताइक्ता बाक्त। मेना सम्म मुरपुकीम मेकेर क्योरशा चढ़ेतीक चढ़ेशा, धूप चोव़मे बाक्त।
5 मेकोमी आ राज्य ङा गेय बोल्यो सेला नोले, आ आफ कली साइक्ब, आ गेय पाइब आन कली साइक्मी बाक्त। २राजा १२:२१:२२; २सामुएल ३:३०
6 तन्न मेकोमी मोसा आ अरेशो किताबम ब्रेक्शो खोदेंशो पा “तमी तौ आन पाप आ पर्बम आन आम आफ आस कली मसतीन। मिनु आम आफ आस पाप आ पर्बम यो आन तमी तौ आन कली मसतीन। सुम पाप पाइनीमी मेको ला साइक्चा पुंइसमल” देंशो, मेकोमी परमप्रभु यावे आ लोव़ टिशा, नेल्ल आंम आन पशो पापम ला साइक्चा पुंइसीनीम। ब्यवस्था २४:१६
7 मेकोम हिक्सी के बेंसीम १० हजार एदोमी आन कली साइक्मी बाक्त। मिनु लडाइम सेला सहर ग्राशा, मेको आ नें योकतेल वोदा बाक्त। मेको सहर आ नें मुल सम्म मेकोन बाक्ब।
8 मेको नोले अमस्याहम इस्राएल ङा पिप येहू आ चच येहो-अहाज आ तौ योआश कली लडाइ पतीक लोव़ पा “जाक्को, गो नु आं ङोंइती राप्शा लडाइ पावो” दे लडाइ पचा कली लोव़ कुरब मुर सोइक्ता बाक्त।
9 तन्न इस्राएल ङा पिप योआशम यहूदा ङा पिप अमस्याह कली “लेबानोन ङा चू बुटा काम लेबानोन ङा लाइश्शो रवा का कली ‘इ तमी आं तौ नु ग्युंबे पचा गेवो’ देंमाक्त। तन्न लेबानोन ङा ब्वाकीमी बाक्ब जन्तु का मेको मेर पा पिमाक्त। मिनु मेकोम चू बुटा कली दिम्शा ताइश्शा पवा बाक्त। न्यायाधीस ९:१४
10 गे एदोम कली ग्राशा, ठेयब लेश्शो दुम्तीनी। इन ग्राशोम ग्येरसीने। तन्न इन खिंमी सिक्सी पा बाक्कीन। आंम इन कली नु यहूदा कली मारदे खतम सेल्चा दाक्नीनी?” देंपाइक्थ लोव़ कुरब मुर का सोइक्ता बाक्त।
11 मो हना यो अमस्याहमी मेको लोव़ मनेना बाक्त। मोपतीके इस्राएल ङा पिप योआशमी लडाइ तोवा बाक्त। मिनु मेको नु यहूदा ङा पिप अमस्याह यहूदा ङा बेथ-शेमेशम लडाइ पाम्से बाक्त। यहोसु १५:१०
12 मिनु यहूदा ङा पिप इस्राएली आन क्येङा ब्रुमाक्त। मिनु मुर नेल्ल प्रोक्मा बाक्त।
13 मिनु इस्राएल ङा पिप योआशमी यहूदा ङा पिप अहाज्याह आ चच, योआश आ तौ अमस्याह कली बेथ-शेमेशमी ग्याइक्ता बाक्त। मिनु मेको नोले योआश यरूसलेम लेश्शा जाक्माक्त। मिनु इस्राएल ङा पिपमी यरूसलेम ङा गारो एफ्राइम ङा ठेयब लाप्चो रे कुना ङा ठेयब लाप्चो सम्म ४ सहे कुबीत प्रेप्पदा बाक्त। कुबीत का आधा मिटर खोदेंशो बाक्ब।
14 मेकोमी परमप्रभु यावे आ खिंम बाक्शो नु पिप आ खिंम थिश्शो सुन चांदी नु ग्योंब नेल्ल नु मुर यो ग्याइश्शा लदा बाक्त। मिनु नोले सामरीया लेम्माक्त।
15 मेको योआश आ पशो अरु गेय, आ पशो नेल्ल, आ सक्ति नु यहूदा ङा पिप अमस्याह नु पशो लडाइ, मार, मेको नेल्ल इस्राएल ङा पिप आन इतिहासम ब्रेक्शो मबाक्बा ङा?
16 मिनु योआश बेक्माक्त। मिनु इस्राएल ङा पिपपुकी नु सामरीयाम थिम्चा पुंइसे बाक्त। मिनु मेको आ पा ङा आ तौ येरोबाम पिप दुम्माक्त। २राजा १३:१३
17 यहूदा ङा पिप योआश आ तौ अमस्याह, इस्राएल ङा पिप येहो-अहाज आ तौ योआश क्येङा १५ बर्स शुश ब्रोंइमाक्त।
18 अमस्याह आ पशो अरु गेय, मार, मेको यहूदा ङा पिप आन इतिहासम ब्रेक्शो मबाक्बा ङा?
19 मिनु यरूसलेम सहरम मुरपुकीमी मेको कली साइक्चा माल्मे बाक्त। मोपतीके मेको लाकीश सहरम प्रोक्माक्त। तन्न मेको कली खेदा पाइब मुर सोइश्शा मेक उइ साइक्पदमे बाक्त। २राजा १२:२१
20 मिनु मेको आ बेक्शो रां शाराम कुर पा यरूसलेम चाक्गमे बाक्त। मिनु मेको कली आ किकी पिपी नु दाऊद आ सहरम थिम्मे बाक्त।
21 मिनु यहूदा ङा मुर नेल्लेम १६ बर्स दुम्शो अमस्याह आ तौ अजारयाह कली मेको आ पा ङा पिप सेल्मे बाक्त। २राजा १५:१-२
22 मेकोमी अमस्याह बेक्ने थुमा नोले एलाथ सहर लेंशा सेल्शा लेश्शा ताक्गा बाक्त। २राजा १६:६
येरोबाम इस्राएल ङा पिप दुम्शो
23 मिनु योआश आ तौ येरोबाम सामरीया सहरम इस्राएल ङा पिप दुम्माक्त। मेना योआश आ तौ अमस्याह यहूदा ङा पिप दुम्शो १५ बर्स दुम्शो बाक्माक्त। मिनु येरोबाम ४१ बर्स सासन पवा बाक्त। होसे १:१; आमोस १:१
24 मेकोमी परमप्रभु यावे आ ङोंइती मार मरिम्शो बाक्मे, मेको पवा बाक्त। मिनु इस्राएली आन कली पाप पपाइक्ब नेबात आ तौ येरोबाम आ लांम गाक्माक्त। मिनु मेकोमी येरोबाम आ लां मप्रोना बाक्त। १राजा १२:२८-३०
25 मिनु परमप्रभु यावे आ गेय पाइब नु आ लोव़ पाइब इस्राएल ङा गाथ-हफेर सहर ङा अमीत्तै आ तौ योना आ पशो परमप्रभु यावे, इस्राएली आन परमप्रभु आ लोव़ गाम्माक्त। लेबो-हमाथ रे अराबाह ङा समुन्द्र सम्म इस्राएल ङा सांद लेंशा सेल्ब येरोबाम बाक्माक्त। योना १:१
26 मारदे हना परमप्रभु यावेमी इस्राएली आन कली शुश श्येत जशो तवा बाक्त। वाइल दुम्शो नु मदुम्शो सुइ मलीमा बाक्त। इस्राएली आन कली वारच पाइब सुइ मबाक्मा बाक्त।
27 परमप्रभु यावेमी इस्राएल कली रागी रे क्याम्चा मदेंतीके, मेकोमी योआश आ तौ येरोबाममी मेको आन कली प्रोंइमी बाक्त। २राजा १३:५
28 येरोबाम आ पशो अरु गेय, मेको आ पशो नेल्ल, आ सक्ति, मेको आ लडाइ पशो नु दोपा यहूदा ङा दमस्कस नु हमाथ सहर लेंशा इस्राएल के सेला, मार, मेको इस्राएल ङा पिप आन इतिहासम ब्रेक्शो मबाक्बा ङा?
29 मिनु येरोबाम बेक्माक्त। मिनु इस्राएल ङा पिप नु थिम्चा पुंइसे बाक्त। मिनु मेको आ पा ङा आ तौ जकरिया पिप दुम्माक्त। २राजा १५:८