7
Vatano pake raugaje mande rai awa wanui nanto 144.000
1 Umba syo naito Amisye mambisya mansaen akato, usayai irati muni so ama ami mambisye so rai. Wo ovar ami mambisye so mansaijar tenambe indamu vemo inta po nuge ramawisy inya—no yawa ndako, mayane ndako, inyo wawi oma jewen tenambe.
2 Umba syo naito Amisy kaijinta aen akato puje no ranijo uma seowi. Opamo po ananugo veano pake rananoka raugav, namirati Amisyo noa pitawabe Po raunande ai. Naije gwain to irati naito Amisy mambisye umawe mai, wenawirati Amisye po vambunine raugaje mai indamu wo yawa muno mayane randamisy.
3 Gwain akoeve pare, “Vemo wapo yawa muno mayane randami kobe inya, muno inyoe ntenambe, weye reamo pake rananoka vatano wanapatambe wama Amisye ai awa mansande rai rainya nene.”
4 Umba naito Amisy po pake rananokai vatano wanui mande rai. Onawamo awa wanuije idanito syo ranaun: nanto no ribuge tename radani muno tename jirum eane mambisy (144.000). Sonawamo manugano susye kotare rai no Israel awa susyo abusyinara eane jirume rai no taiso:
5 Susyo Yehuda 12.000
Susyo Ruben 12.000
Susyo Gad 12.000
6 Susyo Asyer 12.000
Susyo Naptali 12.000
Susyo Manasye 12.000
7 Susyo Simeon 12.000
Susyo Lewi 12.000
Susyo Isakar 12.000
8 Susyo Zebulon 12.000
Susyo Yusup 12.000
Susyo Benyamin 12.000
Vatano wanui rave wanugan no munijo ntiti, wo ansuno mpopere rave
9 Naije syerato akato. Tugae rave, syo vatano wanui rave inta mansaen, matore kakai. Onawamo vatane kotaro ntuna no mine waraya nanawije tenambe—awa munije, awa susye, awa kawasae, muno awa ayao kotar rui vayave. Vatane umaso ude tenambe, usayai no Amisy napirati tuna no Apa kursijo titi raije Amun. Muno usayai no Domba Tuvane amun tavon. Wo ansuno mpopero manawadi rave tenambe muno wo kaipe wao raijaro maneme rai.
10 Umba vatane umaso ugwaino manamoto manakoe rai ware, “Wamo wama Amisye ararimbe, Napi tuna no kursijo titi rai! Muno wamo Domba Tuvane ararimbe! Weye wama Amisy opirati po wansapaya irati kakaije rai!”
11 Naito Amisye usayai tenambe irati Amisye apa kursijo titi rakijani. Wo vatano ube akarive mansano tenam eane mambisy umawe muno ana akokoe Amisye po manari yano mambisy umawe makiani tenambe. Umba naije wo vukane ranteter no Amisye amune rai umba ubeaje Ai.
12 Wo raura ware,
“Tugae rave! Reama Amisyo winy, reangkangkamambe Nai
muno reamo Nya kovo ntiti rararimbe!
Winyamo nakarikuga mba dave
muno wimbe akarive nuge so rai tenambe
muno Winyamo mbambunin dave!
Weti reamo kove raura seo Nai muno reamo naijaseo titive ntoa nuge nuganui!
Amin!”
13 Naije vatano ube akarive umawe inta po rinanajore pare, “Vatano wo ansuno mpopere rave wato onawamo, are nawije? Muno una no ruija umba udea?”
14 Umba syo raura akananto ai syare, “Injae, winyamo nyo mansaen ivae.”
Weti po raura akanande kobe rinai pare, “Vatane sonawamo nanawirati upaya irati siuri akoe nande mine waraya rai wenawije. Awa ansuno manawadi mamo wo rapapi jirati Domba Tuvane apa mavuge rai weti mpope dave.
15 Maisyare omai ti, usea usayai no Amisye apa kursijo titi ama usye rai tutir muno wanapatambe Ai siman muno namane yanteter no Yavaro Amisye ama uga rai. Muno Amisy napi tuna irati Apa kursijo titi rai pare tuna mautan ti darino mansaora.
16 Wenawamo marore po inta mansave akatoe ramu muno mawa ngkangkamandi ramu, muno uma mamoan indamu po mansanen akatoe ramu.
17 Weye Domba Tuvane, napi tuna no Amisy apa kursijo titi ama yasyine rai, Obo pirati po mansaeranande muno Po maugavo mana ami mo kovo nuge nuganuije raunande raron. Muno Amisye po mami ngkaru raupaisy tenambe ti rakanive.”