3
Sarat jadi pimpinan jama'at
1 Memang batúl apa yang orang bilang, kata, “Orang yang mau jadi pimpinan jama'at, itu dia pung arti, dia su pili ame satu karjá yang talalu bae.”
2 Pimpinan jama'at tu, musti orang yang pung nama barisi. Dia musti idop satia deng satu bini sa. Dia musti tau tahan diri, kalam, orang hormat sang dia, suka buka pintu ruma ko tarima tamu, deng mampu didik orang laen.
3 Jang orang yang tukang minum mabo, deng jang yang tangan ringan. Yang paling cocok, andia, orang yang hati mas, yang suka cari dame, deng yang sonde rakus doi.
4 Dia musti bisa ator dia pung ruma tangga deng bae. Dia pung ana dong musti hormat deng dengar sang dia.
5 Te kalo itu orang sonde bisa ator dia pung ruma tangga sandiri, na, karmana ko dia bisa ator Tuhan pung jama'at?
6 Lebe bae pili orang yang su dewasa dalam Kristus. Jang angka pimpinan jama'at dari orang yang baru parcaya sang Tuhan Yesus. Te dong gampang kapala bésar. Jang sampe Tuhan toki sang dia, sama ke Tuhan toki setan dong pung bos bésar.
7 Orang luar dong ju musti hormat sang pimpinan jama'at. Deng bagitu, dia sonde usa malu apa-apa. Deng setan dong pung bos bésar sonde bisa hiki bekin jato sang dia.
Orang yang bantu pimpinan jama'at
8 Bagitu ju deng yang bantu pimpinan jama'at. Dong tu, musti orang yang pung nama bae, yang pung lida sonde bacabang, yang sonde tukang minum mabo, deng jang orang yang suka makan ontong lebe-lebe.
9 Dong pung hati musti barisi, deng dong musti pegang karás ajaran yang Tuhan su buka kasi tunju sang kotong, orang parcaya dong.
10 Pareksa bae-bae dong pung idop deng dong pung karjá. Kalo orang sonde dapa dong pung sala, baru angka sang dong ko bantu pimpinan jama'at dong.
11 Bagitu ju deng dong pung bini. Dong tu, musti parampuan yang idop pantas deng bae-bae. Jang yang tukang bekin busuk orang laen pung nama. Dong musti tau tahan diri, deng orang ju bisa parcaya sang dong.
12 Yang bantu pimpinan jama'at dong ju musti laki yang satia deng satu bini sa. Dia ju musti tau ator dia pung ruma tangga deng bae, deng musti tau ator dia pung ana-ana dong.
13 Dong yang ada layani jama'at deng bae, pasti orang tamba hormat sang dong. Deng dong tamba barani, sonde taku omong so'al dong pung parcaya sang Yesus Kristus.
Dasar dari kotong pung parcaya
14-15 Tius! Beta harap sonde lama lai, beta su bisa datang lia sang lu. Andekata beta ada halangan ko datang talát, na, ini surat su sampe lebe dolo di lu pung tangan. Beta tulis ini ko mau kasi tau sang lu, bilang, Tuhan pung kelu dong musti idop karmana. Jang lupa, bilang, Tuhan tu, Allah yang idop. Dia pung orang dong sama ke ruma yang ada pung dasar deng tiang induk yang kuat. Deng bagitu, dong musti topang Tuhan Allah pung ajaran yang batúl.
16 Tuhan su buka rahasia yang hebat dari kotong pung parcaya. Dia pung dasar bagini:
Kristus su datang di ini dunya,
pake manusia pung rupa sama ke kotong.
Tuhan pung Roh ju kasi tunju, bilang,
Yesus tu, Orang hati lurus.
Deng Tuhan pung ana bua di sorga dong ju dapa lia sang Dia.
Tuhan Allah su angka ame sang Dia pi dalam sorga,
abis, angka nae tinggi-tinggi sang Dia.
Dia pung Carita, su tasiar sampe di bangsa-bangsa di anteru dunya.
Di mana-mana di ini dunya, orang dong su parcaya sang Dia.
Kotong parcaya bagitu!