4
Dong sémba sang Tuhan Allah di sorga
1 Manusia Tulen tu omong abis Dia pung pasán kasi sang itu tuju jama'at dong, ais Tuhan buka kasi lia sang beta hal laen lai. Takuju sa, beta lia satu pintu tabuka mangada pi sorga. Ais beta dengar lai itu orang yang pung suara karás sama ke tarompet tu, bilang, “Mari! Nae datang di sini su, ko beta kasi lia sang lu samua yang nanti jadi.”
2 Itu waktu ju Tuhan pung Roh angka bawa sang beta pi sorga. Takuju beta lia ada satu korsi parenta deng ada yang dudu di atas.
3 Dia bacaya warna ijo deng mera, sama ke batu mangkilat yang mahal yang dong subu, bilang, yaspis deng sardius. Ada ju palangi satu kuliling Dia pung korsi parenta. Dia pung cahaya, warna ijo sama ke batu mangkilat samrud.
4 Di situ ju ada 24 korsi parenta kici kuliling itu korsi parenta yang ada di teng-tenga tu. Ada 24 katua yang dudu di itu korsi dong. Dong samua pake pakean puti, deng pake topi parenta dari mas.
5 Ada kilat yang basambar dari itu korsi parenta yang ada di teng-tenga tu, deng guntur dong babunyi bésar basambung. Ada ju tuju obor yang manyala di itu korsi parenta pung muka. Dong tu, sama ke Tuhan pung Roh yang ada pung tuju sisi.
6 Di muka itu korsi parenta tu, beta lia tingka ke ada laut yang jarní sama ke kaca.
Itu korsi parenta ada di laut pung teng-tenga. Ais beta lia 4 binatang luar biasa kuliling itu korsi. Dong pung badan muka-balakang ponu deng mata. Dong tu, Tuhan pung binatang yang layani sang Dia.
7 Binatang partama pung muka tu, sama ke singa. Nomer dua pung muka, sama ke sapi laki. Nomer tiga pung muka, sama ke manusia. Deng nomer ampa pung muka, sama ke burung garuda tarbáng.
8 Itu 4 binatang dong, satu-satu ada pung anam sayap. Di itu sayap dong pung bagian luar deng bagian dalam, ju ponu deng mata. Siang-malam dong manyanyi sonde putus-putus, bilang,
“Botong puji-puji sang Tuhan Allah!
Botong angka tinggi-tinggi Tuhan pung nama!
Tuhan tu, yang talalu barisi!
Tuhan tu, yang pung kuasa paling hebat.
Tuhan yang ada dari dolu.
Tuhan yang ada sakarang.
Deng Tuhan yang ada tarús sampe salamanya!”
9 Deng manyanyi bagitu, dong puji deng kasi hormat sang Tuhan Allah, deng minta tarima kasi sang Dia, tagal Dia yang dudu di atas itu korsi parenta, deng Dia yang ada tarús-tarús sampe salamanya. Waktu dong ada manyanyi,
10 itu 24 katua dong ju jato tikam lutut di muka Tuhan Allah yang ada dudu di itu korsi parenta. Dong buka dong pung topi parenta, ais taro di muka Dia pung korsi parenta tu, ko sémba sang Dia yang ada sampe salamanya. Ais dong angka puji sang Dia, bilang,
11 “O Tuhan Allah!
Botong puji-puji sang Tuhan!
Botong angka tinggi-tinggi Tuhan pung nama.
Tuhan ni, botong pung Bos.
Tuhan ni, botong pung Allah!
Tuhan yang pantas tarima botong pung puji.
Tuhan yang memang musti tarima botong pung hormat.
Tagal Tuhan yang paling kuasa.
Deng Tuhan yang paling hebat.
Tuhan yang bekin samua.
Tuhan yang kasi idop samua.
Samua yang ada,
su jadi tagal Tuhan yang bekin.
Samua yang idop,
su ada napas tagal Tuhan yang kasi.”