14
Domba Ana deng Dia pung 144.000 orang
1 Ais beta angka muka, ju takuju sa, beta dapa lia itu Domba Ana ada badiri di atas satu gunung kici, nama gunung Sion. Dia badiri sama-sama deng 144.000 orang. Di dong samua pung testa, ada tatulis itu Domba Ana deng Dia pung Bapa pung nama.
2 Ais beta dengar satu suara dari langit. Dia pung bunyi tu, bésar sama ke aer tarjún deng karás sama ke guntur. Ma itu suara tu pung bagus lai, sama ke ada banya orang maen sasando.
3 Ju beta lia itu 144.000 orang tu ada badiri mangada sang Tuhan Allah, deng itu 4 binatang luar biasa yang kuliling Tuhan pung korsi parenta tu, deng itu 24 katua dong. Itu orang banya dong ada manyanyi satu lagu baru. Cuma dong sandiri sa yang tau itu lagu, ma orang laen sonde. Te dong ni yang su babae deng Tuhan, tagal Tuhan su pake Dia pung Ana pung dara ko tabús ame sang dong.
4 Dong pung idop barisi, sama ke orang bujang yang sonde parná maen parampuan. Dong iko-iko itu Domba Ana pi mana sa, te Tuhan su bayar ame sang dong pake Dia pung Ana pung dara, ko biar dong jadi Dia pung milik. Tagal itu, dong ni sama ke hasil partama yang orang bawa dari kabón ko sarakan kasi sang Tuhan deng itu Domba Ana.
5 Dong ju sonde tau omong putar-balek, tagal dong pung hati barisi.
Tiga ana bua dari sorga bawa kabar
6 Ais beta dapa lia Tuhan Allah pung ana bua satu lai dari sorga. Dia ada tarbáng tinggi-tinggi di langit, ko kasi tasiar Tuhan pung Kabar Bae yang sonde putus-putus. Dia tarbáng kuliling kasi tau samua orang di bumi, dari samua bangsa, samua suku, samua bahasa, deng samua negara.
7 Dia batarea karás-karás, bilang,
“Bosong musti kasi hormat sang Tuhan Allah!
Bosong musti angka tinggi-tinggi Dia pung nama yang hebat!
Tagal dia pung waktu su sampe,
ko Tuhan pareksa samua orang pung bekin-bekin.
Puji sang Dia!
Angka tinggi-tinggi Dia pung nama!
Tagal Dia yang bekin langit deng bumi.
Deng Dia yang parenta ko laut deng mata aer dong jadi samua.”
8 Omong abis bagitu, tarús beta dapa lia satu ana bua laen dari sorga, yang datang iko sang dia. Dia kasi tau, bilang, “Su ancor! Su ancor! Kota Babel yang hebat tu, su ancor! Itu kota yang jahat tu, su rubu rata tana. Dolu itu kota sama ke palacor yang paksa-paksa samua bangsa di bumi minum mabo deng iko-iko dia pung basundal. Ma sakarang itu kota su rasa Tuhan pung mara na!”
9 Ais beta dapa lia ana bua dari sorga yang laen lai, yang datang iko sang itu ana bua yang nomer dua tu. Dia batarea karás-karás, bilang, “Awas, ó! Samua orang yang songgo itu binatang buas deng dia pung patong, ko tarima dia pung cap di testa, ko di tangan, nanti dong ju rasa Tuhan pung mara!
10 Nanti Tuhan sandiri po'a datang Dia pung mara kasi sang dong, sama ke Dia kasi minum sang dong anggor kapala yang pait. Nanti Dia lempar buang sang dong pi api balerang yang manyala sonde abis-abis. Dia pung ana bua dari sorga dong, deng itu Domba Ana ju lia itu hal.
11 Pokonya, samua orang yang songgo itu binatang deng dia pung patong, ko, tarima ame dia pung cap, nanti dong dapa siksa bagitu deng sonde tau abis-abis. Asap dari dong pung sangsara nae kaluar siang-malam sonde tau barenti.
12 Jadi, samua tu pung maksud, bilang, Tuhan Allah pung orang dong musti dengar bae-bae Dia pung parenta, parcaya tarús-tarús sang Yesus, deng jang ondor.
13 Ais beta dengar satu suara dari langit yang kasi tau sang beta, bilang, “Yohanis! Lu musti tulis bagini: Mulai sakarang, kalo orang yang parcaya sang Tuhan Yesus dong mati, na, dong dapa ontong.”
Ais Tuhan Allah pung Roh yang Barisi manyao, bilang, “Batúl! Nanti dong ontong batúl! Te dong su dapa susa sangsara di dunya, ma dong batahan ko iko Tuhan tarús. Jadi, nanti Tuhan balas dong pung cape, deng dong sonde idop sangsara lai di sorga.”
Tuhan pung hukuman di bumi sama ke pake sabit ko panen
14 Abis itu, beta angka muka. Takuju sa, beta dapa lia satu awan puti bacaya, deng ada satu orang dudu di atas itu awan. Itu orang tu, tingka ke Manusia Tulen. Dia ada pake topi juara dari mas, deng ada pegang satu sabit tajam.
15 Ais beta dapa lia lai satu ana bua yang laen dari sorga, kaluar dari Tuhan pung Ruma Sambayang. Dia batarea kasi tau sang itu orang di awan, bilang, “Pake itu sabit ko mulai panen su! Te dia pung waktu kumpul ame bumi pung hasil dong, su sampe.”
16 Ais, itu Orang yang dudu di awan tu, ayun Dia pung sabit ko panen, deng kumpul ame bumi pung hasil dong.
17 Ju ada satu ana bua yang laen lai kaluar dari Ruma Sambayang di sorga. Dia ada pegang satu piso tajam ko mau ketu bua.
18 Ais, ada satu ana bua yang laen kaluar datang dari itu tampa bakar dara kayu wangi di Ruma Sambayang di sorga. Ana bua ni pung tugas, andia jaga api di itu tampa bakar dara kayu wangi. Dia batarea suru itu ana bua yang pegang itu piso, bilang, “Pake lu pung piso tu, ko pi ketu bua di bumi su! Te di sana pohon anggor pung bua dong su masak-masak.”
19 Ais, itu ana bua ayun dia pung piso pi bumi, ko potong ame anggor pung rangke dong. Ju Dia kasi maso itu bua anggor dong pi dalam bak parés. Tarús dong inja-inja ko mau ame dia pung aer. Inja-inja bua anggor di bak parés tu, andia Tuhan pung mara.
20 Itu bak parés tu ada di luar kota. Waktu dong inja itu anggor pung bua dong, ju dara malele kaluar bam-banya. Itu dara malele sama ke kali satu, dia pung panjang 300 kilo, deng dia pung dalam satu meter satenga.