33
Yakob bakatumu deng dia pung kaka Esau
1 Itu hari, ju Yakob dapa lia Esau datang deng dia pung rombongan 400 orang. Ais dia babagi dia pung ana-ana dong kasi pi di dong pung mama satu-satu.
2 Dia ator ko itu dua bini piara deng dong pung ana-ana jalan di muka. Ais Lea deng dia pung ana-ana dong, baru Rahel deng dia pung ana Yusuf paling di balakang.
3 Ma Yakob jalan paling di muka dari dong samua. Waktu su mau deka deng dia pung kaka, dia tikam lutut deng tondo sampe di tana, tuju kali.
4 Ma waktu Esau dapa lia dia pung adi, ju dia lari pi katumu sang Yakob, ais paló-ciom sang dia. Ju dong dua bamanangis.
5 Waktu Esau dapa lia itu parampuan deng ana-ana dong, ju dia tanya, bilang, “Ko ini orang dong samua ni, sapa?”
Ju Yakob manyao, bilang, “Dong tu, orang-orang yang Tuhan Allah su kasi sang beta, kaka pung hamba.”
6 Ais itu, ju dia pung bini piara dong, deng dong pung ana-ana, datang soya sang Esau.
7 Lantas, Lea deng dia pung ana-ana dong, datang soya sang Esau. Paling balakang, Yusuf deng dia pung mama Rahel datang soya sang Esau.
8 Ais ju Esau tanya, bilang, “Itu rombongan binatang yang lu kirim tadi tu, dia pung maksud apa?”
Ju Yakob manyao, bilang, “Bagini, kaka! Beta parsén samua kasi sang kaka, ko biar kaka tarima sang beta deng hati luas.”
9 Ma Esau balas, bilang, “Adi Yakob! Beta pung harta ju banya. Jadi lu sonde usa kasi apa-apa sang beta.”
10 Ais Yakob manyao, bilang, “Kaka jang bagitu! Kaka musti tarima, ko jadi tanda, bilang, kaka tarima sang beta deng tangan tabuka. Te, waktu beta lia kaka pung senyum tadi, tingka ke beta lia Tuhan Allah pung senyum.
11 Jadi, beta minta deng hormat, ko biar kaka tarima beta pung hadia yang sonde ada arti ni. Te Tuhan Allah su talalu bae sang beta, andia ko Dia su kasi samua yang beta parlú.” Yakob kokoe tarús sang dia, sampe mau tar mau, Esau tarima itu hadia dong.
12 Ais itu, Esau omong, bilang, “Kalo bagitu, na, bosong siap, ko kotong jalan su! Nanti beta antar sang bosong.”
13 Ma Yakob manyao, bilang, “Sonde usa, kaka! Kaka lia sandiri. Ana-ana dong masi kici-kici, deng sonde bisa jalan capát. Deng binatang yang baru barana dong, ju banya. Kalo kotong paksa sang dong jalan capát, dalam satu hari sa, nanti ini binatang dong bisa mati samua.
14 Jadi, lebe bae, kaka dong jalan lebe dolo sa. Nanti botong samua jalan palán-palán dari balakang. Nanti beta datang lia sang kaka di Seir.”
15 Ais itu, Esau omong lai, bilang, “Kalo bagitu na, beta kasi tenga beta pung ana bua saparu deng lu, ko dong tunju jalan sang bosong.”
Ma Yakob bilang, “Kaka sonde usa repot-repot! Yang pantíng, beta su tau kaka su tarima sang beta.”
16 Dengar bagitu, ju Esau jalan kasi tenga sang dong, ko pulang pi Seir.
17 Ma dari situ, Yakob pi di Sukot. Di situ, dia bangun ruma, deng bekin kandang kasi dia pung binatang dong samua. Andia ko itu tampa, dong kasi nama Sukot (yang pung arti ‘ruma samantara’).
18 Ahirnya, Yakob dong sampe deng salamat dari Padan Aram pi kampong Sikem di negrí Kana'an. Ais dong pasang tenda ko tenga deka-deka itu kampong.
19 Itu tana yang Yakob pasang tenda tu, dia béli putus dari Hemor, Sikem pung bapa. Dia bayar deng 100 doi perak.
20 Di situ, dia susun batu bekin meja korban. Ais dia kasi nama itu tampa El-Elohe-Isra'el yang dia pung arti ‘Allah tu, Isra'el pung Allah’.