5
Ada orang dalam jama'at yang maen parampuan
1 Beta dengar, bilang, ada satu orang dalam bosong pung jama'at yang maen parampuan. Padahal, yang dia bekin tu, lebe jahat dari orang yang sonde kanál sang Tuhan Allah. Te dia maen tidor deng dia pung mama tiri sandiri!
2 Ma bosong pung sombong lai! Yang batúl, bosong musti malu, deng rasa susa. Orang bagitu tu, bosong musti usir buang sang dia jao-jao!
3 Biar kotong bajao satu deng satu, ma beta pung hati ada tenga di bosong. Jadi, beta su putus itu orang jahat pung parkara, sama ke beta ada di situ memang.
4 Beta ada pung hak ko putus bagitu, tagal Yesus jadi kotong pung Bos, deng beta ni, Dia pung utusan. Ais bosong musti dudu bakumpul ko putus itu parkara, bawa Bos pung nama. Deng beta pung hati ada sama-sama deng bosong ju.
5 Ais, bosong musti sarakan itu orang pi di setan dong pung bos, ko biar lama-lama itu orang angka buang hal-hal jahat yang ada di dia pung hati. Ais nanti kalo kotong pung Bos datang kambali, na, Dia bisa kasi salamat sang itu orang dari dia pung sala-sala.
6 Sonde bae kalo bosong mulu bésar! Jang lupa, bilang, kotong campor bibit roti sadiki sa, ko bekin reis roti anteru. Bibit roti tu, sama ke itu orang pung jahat. Ais, kalo kasi biar dia bekin jahat di bosong pung teng-tenga, nanti orang sarani laen dong ju iko-iko bekin jahat!
7 Usir itu orang jahat dari bosong pung jama'at. Deng bagitu, baru bosong bisa jadi kambali ke orang yang sonde ada pung jahat dalam dia pung hati lai. Bosong musti jadi bagitu. Dolu, dong horo domba ana yang sonde ada pung sala ko bekin korban Paska. Dari balakang dong bunu bekin mati Tuhan Allah pung Orang Barisi, ko jadi korban yang bekin barisi kotong pung hati.
8 Dolu, orang Yahudi makan pesta Paska pake roti bakál yang sonde pake ragi. Sakarang, kotong sama ke itu roti yang sonde pake ragi. Andia ko kotong musti jaga kotong pung diri ko jang bekin hal-hal jahat dong, deng jang bekin orang laen dong saki hati. Kotong musti omong yang batúl tarús. Deng bagitu, orang lia, bilang, kotong ada bekin samua-samua iko kotong pung hati bae.
9 Dolu, beta parná tulis surat, bilang, “Jang bacampor deng orang yang maen serong deng orang yang bukan dong pung laki ko bini.”
10 Beta sonde ada pung maksud, ko bosong jang bacampor deng samua orang di ini dunya yang sonde toe sang Tuhan Allah, ko orang balalas, ko orang putar-balek yang tipu ame orang pung barang, ko tukang songgo dong. Te kalo bagitu, na, bosong musti bekin diri tapisa dari samua orang di ini dunya.
11 Ma sakarang, yang beta omong tu, andia: bosong jang campor deng orang yang bilang dia jadi orang sarani, padahal dia ada maen serong ko, dia balalas ko, dia basonggo ko, dia ada omong bekin rusak orang pung nama ko, dia mabok barát ko, dia putar-balek ko mau ame orang pung barang. Kotong jang bacampor deng orang macam bagitu dong. Jang dudu makan deng dong lai!
12 Bosong ada pung hak ko nilei orang sarani dong pung idop. Ma beta sonde ada pung hak ko putus parkara kasi orang yang sonde parcaya sang Tuhan Allah.
13 Te Dia sandiri yang nanti putus parkara kasi orang yang sonde parcaya sang Dia. Ma bosong jang lupa Tuhan pung Tulisan Barisi yang tulis, bilang, “Orang yang subu diri jadi Tuhan pung orang, ma dia maen bekin hal-hal jahat, usir buang sang dia sa!”